Ibeb 4
4
Mfufuk kè Ken mè Eben
1Adam onenigọọk Îfu ogwu nwa ilaak. Îfu oninin̄ owot, mè iman gwun̄ enerieen̄, mè inyi erieen̄, Ken,#4:1 Ken ìsibi ‘nkaan̄.’ mije Okumugwem otapbe ubọk irọ inyi ọmọ ikaan̄ enerieen̄. 2Îfu okpọkpọk iman ofifi gwun̄ enerieen̄, òrere Eben, igọọk Ken ogwu ngwan̄.
Eben ìre ogwu òkikpukpo anam. Sà Ken ore ogwu òkiwop uko. 3Me ibot mgbọ irọrọkọ inu me uko, Ken onenisa usini mfut uko kan̄ inu inigwa ngwugwa inyi Okumugwem. 4Ikeya si, Eben onenitet okpa owot arọọn̄ kan̄ mè ebot kan̄, echi òmimiin̄ ufuk, isa inigwa ngwugwa inyi Okumugwem. Okumugwem obebele ejit me lek kè Eben melek ngwugwa kan̄. 5Ire, ìkabele ejit me lek kè Ken melek ngwugwa kan̄. Mije keyi, Ken onanaan̄ ejit enenen. Isi kan̄ onwenwene.
6Okumugwem onenido Ken ibe, “Ìre keke orọ owu ònaan̄ ejit? Sà ìre keke orọ mè isi kwun̄ inwene ikeyi? 7Ire owu morọ inwọn, ìre owu kpomobọkọ umin? Ire, mije owu òkarọ ìnwọn, kpọ, ijo inu òwa me otu isotu uwu kwun̄ otuun̄be ikup ikiweek itetet owu. Ire, owu, katele ibe itọ ikọ inyi owu.”
Ken îkpan̄ Eben ogwu ngwan̄
8Usen ge, Ken ogwegwen Eben ogwu ngwan̄ ibe inu mè ema enin̄ oron. Mgbọ ema erebe emen oron ya, Ken osusulu ogwu ngwan̄ ikpan̄.
9Okumugwem onenido Ken ibe, “Mọmọ Eben ngwan̄ kwun̄?”
Ken ofọfọọk ibe, “Ǹkariọọn̄ ere îkupbe! Ìre emi nkisun̄ ngwan̄ n̄a ni?”
10Okumugwem ododo Ken ibe, “Ìre keke ke owu orọ ikeyi? Kpọ, ida ito eje kè ngwan̄ kwun̄ òkinan̄a me emen ijọn̄ inire emi utọn̄. 11Môfieek inyi owu igak ijọn̄ ya,#4:11 Mè ìyaka ire, ‘Môfieek inyi owu. Mîrieen̄ owu isibi me ijọn̄ ya.’ eyi òkaka otu ibọkọ eje ngwan̄ kwun̄ me ubọk kwun̄. 12Owu môwop mfut me ijọn̄, ire, ijọn̄ ìkpoyaka itibi inu geege inyi owu. Owu môkana ogwu nyanya mè ogwu teeteek me linyọn̄, òkpokaan̄ isiki-efuuk.”
13Ken otutumu inyi Okumugwem ibe, “Osusut yi îmin enenen igak inu mbakọt ibeme. 14Cherekeyi, owu olap emi isan̄a me inyọn̄ ijọn̄, mè ilap emi isan̄a si me isi kwun̄. Emi m̀bayaka inikana ogwu nyanya mè ogwu teeteek me linyọn̄. Ene geelek òmumun̄ emi ìbokpakpan̄ emi.” 15Okumugwem ofọfọọk Ken ibe, “Ire ikeya, ene geelek òkpakpan̄ owu môbọkọ ojelek osusut kwun̄ mgbọ jaaba.” Mije keya, Okumugwem otatap Ken iman̄ me lek, inyi ene geelek òmumun̄ ọmọ ikakpan̄ ọmọ. 16Ken onanan̄a me isi Okumugwem, mè isi iluk me inyọn̄ ijọn̄ agan̄ ekigwen Nọdu,#4:16 Nọdu ìsibi ‘nyanya.’ eyi òkup me agan̄ mbum-ura inyi Iden.
Mfufuk owot iman kè Ken
17Ike mgbọ okije, Ken onenigọọk ogwu nwa ilaak. Ogwu nwa oninin̄ owot, mè iman gwun̄ enerieen̄ ge, ogwu enyibe erieen̄ Enọk. Ken oneninama ama ge, mè isa isan̄a gwun̄ kan̄ Enọk. 18Enọk onenibon Iradi. Iradi onenibon Meyujayen. Meyujayen onenibon Metusayen. Metusayen onenibon Lemek.
19Lemek onenido nwa iba. Ogwu adasi ore Ada, sà ogwu òso iba ore Jila. 20Ada oneniman Jaban. Jaban ore adasi ene òbebene ikiluk me uwu ọfọ, mè ikikpukpo anam. 21Jaban onenikaan̄ ngwan̄ enerieen̄ ge ekigwen Juban. Juban ore adasi ene òbebene ikikwak uneen̄, mè ikiwut òja. 22Jila si oneniman gwun̄ enerieen̄ ge ekigwen Tubali Ken. Tubali Ken ore adasi ene òbebene ikisa ekwe mè okwukwut itọkọ nroon̄ ikwaan̄ òkup esese esese. Tubali Ken onenikaan̄ ngwan̄ enenwaan̄ ge ekigwen Nayama.
23Usen ge, Lemek onenikigugo lek inyi ebi nwa kan̄, Ada mè Jila, mè ikitumu inyi ema ibe,
“Enyi ebi nwa kè Lemek, ìgban̄ ida n̄a,
ìgban̄ utọn̄ me lek ikọ mbatumu.
Ikaan̄ ogwu isak emi unan me lek, m̀bakpakpan̄,
ìrere sọntiik gwun̄ enerieen̄ onyiaan̄ emi lek,
m̀bakpakpan̄.#4:23 Mè ìyaka ire, ‘Mkpan̄ enerieen̄ ogwu òsasak emi unan me lek, mè ikpan̄ sọn̄ gwun̄ ogwu ònyanyiaan̄ emi lek.’
24Ire ene ibọkọ osusut mgbọ jaaba me useen̄ ibot kè Ken,
me ibot n̄a, ìbobọkọ akọp mgbọ jaaba mè jaaba.”
Mîman Set mè Enọs
25Adam onenikpọk igọọk ogwu nwa ilaak. Ogwu nwa oninin̄ owot, mè iman ofifi gwun̄ enerieen̄, mè igwen Set,#4:25 Set ìsibi ‘enyinyi.’ mè ibe ke Awaji înyi ọmọ ofifi gwun̄ me useen̄ kè Eben ogwu Ken okpan̄be. 26Set onenibon gwun̄ enerieen̄ ge, mè igwen Enọs.
Ike mgbọ ya ke ebi ene ebene ikigwen erieen̄ Okumugwem me mgbọ ekitọbọ ebum inyi ọmọ.
Sélection en cours:
Ibeb 4: Obolo
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.