Bangec kisiu 27
27
Tselafehad naroangfora
1Anu Yosef medaha Manasse, yeac medaha Makirac medaha Gilecadac medaha Hefer yeac medaha Tselafehad yeac naroangfora yeneac kpacngina yofi, Mehela, Noca, Hagela nga Mileka amma Tirtsa. Yeni enara yeneac kicnginau hama fingecgec. 2Yeni Kebugoc ewacemeemeac kporucamaac naguyau hama Mose nga womonggareng Elecadzar amma ngicenarafocngina nga ngichabu hafoangoc yeneac kicfu namma yofi degec, 3“Mannina ye bangeckisiu homeec. Nga ye ine Kora nga habufora Kebuac yoac kpegec, yenigoc kpedzucnema yeneac botucnginau mi kefec. Amma ye medacfora kpac nga ye yengena kopocsicac amma homeec. 4Nga ye medaha kpac kefecac amma kpara arengfora yenearu kpac anude imoc naric mi heide. Imocac manninaac dacmunafora yeneac botucfu bangec mong nemmebisia.”
Yeac fingecsahe manaunac tosea mong migec
5Ifi degec Mosengo yoacngina imoc Kebuac kicfu mekenec. 6Kenu Kebungo yofi edeec, 7#Bki 36:2“Tselafehad naroangfora yeni yoac dedae imoc naric. Imocac ge mangnginaac dacmunafora yeneac botucfu bangec mong yemmena mangnginaac bangec imoc megec imocngo yeneac bangecyombong ambeso.
8Amma Isracelngicngac yofi edeyunubesena, ‘Ngic mong ye medaha kpac kecma homeudeu bangecyombonga imoc naroangaac ambeso. 9Me naroanga mong mi kefudeu bangeha imoc dacmunafora yemmegec yeneac ambeso. 10Me dacmunafora mong mi kecgecdeu bangeha imoc waecfora yeneac ambeso. 11Me waecfora mong mi kecgecdeu ine bangeha imoc yeac fingecsahe manaunac tosea mong migec yeac ambeso. Desi desiyoac imocngo Isracelngicngac yenearu fakangina seria feu Kebungo Mose dederecge ammiec, ifi isoc yombong ambisia.’ ”
Kebungo Mose homeudeac edeec
12 #
Dser 3:23-27; 32:48-52 Anu Kebungo Mose yofi edeec, “Ge Awarim tikiu emma Isracelngicngac bangec ngemmeai imoc hembesena. 13Henna wisickeu dacga Aharon arengfora yenigoc torokpeyunuec ifi isocngoc kennade. 14Warac Tsin bangeckisiu ngichabu yeneng yoacna kpegec. Tsin bangeckisiu Kades imohai Meriwa doku fede ngeri imohai ngichabu yeneac kicfu namma kpetiac anduae imoc mi mekperagiyemmema waocac ifi fingecgenude.”
Yehosuacngo Moseac tatac mebeso
15Anu Mose ye Kebu yofi edeec, 16“O Kebu Anutu, ge ngic sebifusigoc sasawa asunginaac kunengngina, geng ngicngacarenniraac enara mong meisinggema ngickuneng anudeac desima faibesena. 17#1Ngt 22:17; Edz 34:5; Mat 9:36; Mrk 6:34Faina yeng waraiyemmema hesicyunuu kembisia nga yengngoc enara meyemmemanu meyunuma dzigenebisia. Yeng hesicyunuu kembisia nga yengngoc meyunuu dzigenebeso. Kebu geac kpebung yeni ramahabu garengngina kpac ifi isoc mi kecgecdeac ifi ambesena.”
18 #
Mke 24:13
Ifi deu Kebungo Mose yofi edeec, “Nun medaha Yehosuac yeac hereu asu femide. Ge ye mema mariga yeac witiau faibesena. 19Faima dena womonggareng Elecadzar nga ngichabu hafoangoc yeneac kicfu nammanu uayaac dekperagibesena. 20Dekperagima yeng geac tatac mema garengyunuudeac kuc tosea mina Isracelkpebung hafoangoc yeni imoc hemma negemma yoara negentofoho amma kecbisia. 21#Mke 28:30; 1Sm 14:41; 28:6Nga ye womonggareng Elecadzar yeac kicfu namma kpesi kpesi faikecbeso. Fau Elecadzarngo yeac turunga Kebuac kicfu namma urim nga tummin#27:21 urim nga tummin Kpeing kpegecac wiac womonggarenggaru feec imocac kpara. kpeing kpeu imocngo yoac fora desibeso. Desiu isracelngic yeni imoc modacma kengkecbisia amma dzigenekecbisia. Imoc ye nga Isracelac ngichabu hafoangoc yeni yegoc yacma kengkecbisia amma dzigenekecbisia.”
22Anu Mose ye Kebungo dederecge ammiec, ifi isoc yombong amma Yehosuac deu yeng womonggareng Elecadzar nga ngichabu hafoangoc yeneac kicnginau kemma nanec. 23#Dser 31:23Nanu Mose ye Kebungo yoac dederecge ammiec, ifi isoc amma maria Yehosuacac witiau faima desima ua meudeac dekperagiec.
Sélection en cours:
Bangec kisiu 27: Ded
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© (Active), Wycliffe Bible Translators, Inc. All rights reserved.