Bangec kisiu 24
24
Kpefing kpete harebec
1Anu Bilecam ye yofi henec, Kebungo Isracel kenecyunuudeac negenu ngereede. Ifi negemma ye warac kpefingyoac deudeac ma hania hania meficgeudeac angkefec isoc mi kenec. Ye eng kiwa bangec kisiubigeng fiec. 2Fima henu Isracel yeni kisicfocnginasoc modacma guru mema kporucamanginau tacyac anggec. Ifi henu Anutuac Asungo yeac witiu maec. 3Mau kpefingyoac yofi dekperagiec,
“Ni Becor medaha Bilecamngo
yoac yofi deduae,
ni yoacna imoc
ngic kiwa tegec tegeraac yoac.
4Yeng Anutuac yoac negende,
ye Kuctoa Mingina
yeac dedekperagiyoacac
kpefing hennegengande.
Ye bangecfu ngonducnemanu
kiwa tegeru wiac hengande.
5O Yacakow, geac kporucamaga sasawa
imoc siricngina gombunga yombong.
Isracel, geac amagerecga guruya guruya
imoc songodzidziagoc.
6Imoc tumiatoa emu
tiki botucnginau fekendae, ifi isoc
imoc semeng ua
dokutoa fekendeac tegiau isoc.
Imoc aloe#24:6 aloe Ic imoc kpara eagelwood.
Kebungo homerec ifi isoc,
imoc cedar ic#24:6 cedar ic onga hafac 441.
doku tegiau nangandae ifi isoc.
7Yeneac fawaunac doku maude,
wiac gbomea homecbesandae
imocac doku soha ambesande.
Ngictaungina ye Agag ferahabesande,
yeac eucererenga imoc miacgec
engena ambesande.
8Anutungo Aigitabangecfunac
hesicyunuu eregec
kuc imoc kateburumakangiwaac kuc
ifi isoc yemmeec.
Yeni ngabafocngina bangeha bangeha
neyunudacgecde,
yeni sicngina hetackema
tebemedahanginango kpesariyunubesandae.
9 #
Fing 12:3; 49:9 Yeni laionyang isoc mama fedae,
yeni laiongngagera isoc fedae.
Mongngo ye yarudeac
ammiudeacsoc mi ambesande.
Ngic kenecngunubesandae,
yeni kenecnginagoc.
Sowecngunubesandae
yeni sowecnginagoc.”
Bilecam bangehau sueec
10Ifi deu Balak ye yoac imoc negemma Bilecamgac herea buyombonggeec imoc gerec isoc dzeu maria kpema yofi edeec, “Ni ngabafocna sowecyununadeac hana dema heitaiguai nga geng ine imoc wama kenecyununa naso harebec bic ande. 11Imocac worama bangecgau kenna! Ni yofi edeguai, eweheihei anggemma bung gembade nga negennec, Kebungo ine imoc hedzickema wadac.”
12Ifi deu Bilecamngo yofi edeec, “Yoacdedengicfocga nearu sueyununecmoc yeni yofi edeyunuai, 13‘Balak ye ameau silwa nga gol wakema febac dede nga imoc neac anudeac deude isoc ni ine sifu Kebu Anutunaac yoac kpema wiac kapia me kuneng naric mi ambade. Kebungo yoac edenude, imocsac debadeac kucna fede.’
14Amma ni yaguc ngicngacarengfocna yenearu dzigenebade. Anu ngicngacareng yomoc yeni kecma ngade ngicngacarengfocga dafi ayemmegecde, imocac yoac edeguba negenna.”
15Ifi dema kpefingyoara yofi dekperagiec,
“Ni Becor medaha Bilecamngo
yoac yofi deduae,
ni yoacna imoc
ngic kiwa tegec tegeraac yoac.
16Ni Anutuac yoac negenduae,
ni negen negeng Engenatoa yearunac meduae.
Kuctoa Minginango wiac hende imoc henduae,
ni bangecfu manuu kicna tegecande.
17Ni henduae amma yofinenggac kpac.
Ni kic fima hemba ye wegenac kpac.
Yacakow yearunac
asomeng mong fingecbesande,
ngictauac yasu mong
Isracel yenearunac erebesande.
Imoc Mocaw tuturunga sasawa
medzameyunudacma
Set medacfora sasawa
kpetotieyunudacbesande.
18Ye ngabafora bangecngina mema
imocac mingina ambesande,
ye Edom nga Secir yeneac bangec mema
mingina ambesande.
Isracel ye kuhagoc yombong ambesande.
19Ngictau ye Yacakow yearunac fingerec,
ngictauac kucngo garengyunuude,
ye taonnu tosea sufuma kecgecde
yeni kpetotieyunudacbesandae.”
20Bilecam ye ifi dema Amalek hemma kpefingyoara yofi dekperagiec,
“Amalek ye mikingicngacareng sasawa
yeneac warac waracngina
nga yeni wisic wisickeau
ye kpetotiegec kpac ambesande.”
21Ifi dema keningic yenemma kpefingyoara yofi dekperagiec,
“Keningic ge amagerecga imoc seria,
ge hoc peperandziac witiau
faecga faina tackende.
22Nga gearu sifu yofi fingecbesande,
Assurngo keningic ngunuma
mengunuma witicngunubesandae.”
23Ifi dema kpefingyoara torokpema wisic wisickeau yofi deec,
“Ebictoa yombongngo fingengemmebesande.
Anutungo ebicnginagoc anggecdeac ifi deu
mongngo naric mi kefude.
24Kittingic yeneac kondung tegiaunac
wage yeni hama
Assur nga Ewer memayunubesandae
yeni ifingoc kecma
kpetotieyunudacbesandae.”
25Anu Bilecam ye ifi dema yacma amabangehau dzigeneu Balak ye ifingoc yengena singau dzigene kenec.
Sélection en cours:
Bangec kisiu 24: Ded
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© (Active), Wycliffe Bible Translators, Inc. All rights reserved.