Bangec kisiu 22
22
Mocaw yeni Isracel yeneac kengec anggec
1Isracelngicngac yeni efaima yacma kporucamangina meickema kporucamabangec imoc wama kengkecma Mocawac bangec tumiau Yardendoku tegia yeibigeng Yereho wegenahau sikema kporucbedzongina kpedzigec enu guru mema tacyac anggec.
2Anu Tsippor medaha Balak ye Isracel yeneng emoringicngac faka ayemmedacgec, imoc hennegeng andarec. 3Anu Isracel ngicngacareng yeni homac yombong anggecac amma Mocaw yeni kengec anggec, yeni yeneac kengec kuneng yombong anggec. 4Ifi Amma Midyan ngicenarafocngina yofi edeyunugec, “Yaguc ngicngachabu imoc yeneng wiac sasawa oronnunuma fenemmede imoc sasawa nedacgecde. Burumakangiwa gbomangina meic meickea imoc yeneng kpindzing tengging tengging bangecfu neandae ifi isoc bangecninau wiacnina ifi nedacgecde.”
Balakngo yoacdedengicfora Bilecam yearu sueyunuec
Anu Tsippor medaha Balak ye naso imohai Mocaw yeneac ngictau kefec. 5#Bki 31:8; 2Pe 2:15-16; Yud 11Anu ye yoacdedengicfora sueyunuu Becor medaha Bilecam yearu haudeac edegecdeac yearu kenggec. Anu Bilecam nga ngicngacarengfora yeni amangina kpara Petor,#22:5 Petor imoc agac yombong Eufrat doku tegiau notbigeng yombong. imoc Eufrat dokuac wegenahau bangec feecac amma yeni imohai sueyunuu kenggec. Kemma ngictauac yoac yofi edegec, “Negennec, ni geac yofi negenduae, ge mong kenehenade ye kenehagoc anude nga mong soweckenade ye sowecac bageu kefude.
Anu ngicngacareng mong yeni Aigitabangecfunac erema hama neac wegenacnau bangec kiwa kpac sokodacma tacyac andae. 6Yeneac kucnginango neac kucna ferahadeac ge naric hama neac amma ngicngacareng imoc sowecyunubang me? Geng hama ifi annadeu ni wasaingicfocnagoc neni gedang firang amma yunuma bangecninaunac kisangyununi kenggecde.”
7Anu Mocaw yeneac ngicenarafocngina nga Midyan yeneac ngicenarafocngina yeni kpefingyoacac bung maringinau mema Bilecam yearu kensikema Balakac yoac imoc edegec.
8Edegec yofi edeyunuec, “Ngeni tofocnac yei femagec, Kebungo yoac dafi edenuude imoc edengunubade.” Ifi deu Mocaw ngictaumedacareng#22:8 ngictaumedacareng yeni Mocawac ngictauac medacforasac kpac. Yeni ngictau hania hania yeneac medacfocngina amma yeni Mocawac ngictaugoc kengha angkecgec. yeni Bilecamgac amau fegec.
9Femagec Anutungo hama Bilecam yofi kpesimiec, “Ngic imoc damoc yeneng gegoc kecdae?”
10Ifi deu Bilecam ye Anutu yofi edeec, “Mocaw yeneac ngictau Tsippor medaha Balak, yeng nearu yoac yofi fau hadac. 11‘Negennec, Aigitabangecfunac ngicngacareng mong yeni erema hama yaguc bangeckiwa kpac sokodacma kecdae. Imocac amma ge hama neac amma sowecyununa kucngina kpac anu naric gedang yenigoc ewema yunukporac ayemmema kisangyununi kenggecde.’ ”
12Ifi deu Anutungo Bilecam yofi edeec, “Ge yenigoc mi kembesena. Ngicngacareng imoc yeni kenecnginagoc, imocac ge mi sowecyunubesena.”
13Ifi deu Bilecam ye asoac yacma Balakac ngictaumedacareng yofi edeyunuec, “Ni ngenigoc kembeso ambareng Kebungo kpetarinendeac ngeni bangecnginau dzigenegec.”
Balakngo monggoc sueyunuec
14Ifi deu Mocaw ngictaumedacareng yeni yacma Balak yearu dzigene kemma yofi edegec, “Bilecam ye nenigoc haudeac waec.”
15Ifi degec Balak ye ngictaumedacareng homac kpackunengnginagoc monggoc sueyunuu kenggec. 16-17Kemma Bilecam yearu sikema yofi edegec, “Tsippor medaha Balak ye yofi dede, ‘Ni eweheiheitoagoc yombong eweheigembade amma wiac sasawa edenunade imoc ni andacbadeac ge nearu hanadeac wiac mongngo mi dzegegubeso. Ge hama neac amma ngicngacareng imoc yeni sowecyunubesena.’ ”
18Ifi degec Bilecam ye Balak enactofoc tofohofora yoac yofi merengyemmeec, “Balak ye ameau silwa nga gol wakema febac dede nga imoc neac anudeac deude isoc ni ine sifu Kebu Anutunaac yoac kpema wiac kapia me kuneng naric mi ambade. 19Amma ngeni ifingoc naric yei femagec Kebungo noc yoac monggoc edenude, imoc negembesare.”
20Anu Anutungo tofocnac imohai Bilecam yearu hama yofi edeec, “Ngic imoc yeni wangecgubeso hadau isoc yacma yenigoc kenna. Anu neng wiac edegubade, imocsac ambesena.”
Angerongo donggi fingecmiec
21Ifi edeu Bilecam ye ama wereckenu yacma donggingagera witiau sate#22:21 sate becosicfu me donggiu kenggecde yeni eng witiau mi tacgecde. Yeni tatac mong donggi witiau faima tatac imocac witiau tacgecde nga imocac kpara sate. faima Mocaw ngictaumedacfocngina yenigoc kenec. 22Kenu Anutungo ine herebu negenu Kebuac angerongo kpae heimiudeac negemma singa hedzickema sinnu nanec. Nanu Bilecam ye ine enactofoc tofohofora yenearunac yohockang yereng modarec Bilecamngo donggingageraac witiau tacma kenec. 23Kenu donggingagera ye Kebuac angero mongngo dzikacac beanga mariau mema sinnu nanu hemma sinnunac meremma tegiau ua nadunu kenu Bilecam ye donggingagera sinnu monggoc dzigeneudeac kpeec.
24Ifi anu angerongo kemma waing ua yohockang botucngirau sing kapiau, noboc noboc imohai ine hocodango oroc oronggea imohai nanec. 25Nanu donggingagera ye Kebuac angero hemma odau yongonggeu odango Bilecam hania heacgec. Heacgeu Bilecam ye donggi monggoc kpeec.
26Ifi anu Kebuac angerongo torokpema kemma sing gonggonga mong feec imohai nanec. Imohai tegia foiubigeng me kanaubigeng kengkenggac sing mong mi feec. 27Nga donggingagera ye Kebuac angero ifi hemma Bilecamgac bageau mama feu Bilecam ye ifi hemma herea buu yasungo donggi kpeec.
Donggingo yoac deec
28Ifi anu Kebungo donggingageraac enara meefaiu Bilecam yoac yofi edeec, “Ni noc wiac mong mangana anggemba ge imoc hemma nuna naso harebec ande?”
29Ifi deu Bilecam ye donggingagera yofi edeec, “Ge sisic homac anenna yeni nenggec gamenude. Ni dzikacac beanna marinau mekecbai debac yagucngoc kpebucgubai.”
30Ifi deu donggingagera ye Bilecam yofi edeec, “Ni geac donggingagera nga ge neac witiu tacma kengha amma kekecga sasawa kecnecngoc nga yaguc ifingoc tacnec. Nga edenuna, ni faka ifia mong warac anggenai me kpac?” Ifi deu Bilecam ye yofi deec, “Kpac.”
Bilecamngo angero henec
31Ifi demanu Kebungo Bilecamgac kiwa merecgeu Kebuac angerongo dzikacac beanga mariau mema nanu henec. Hemma ngonducnemima kicmesuya bangecfu hetutuckema feu 32Kebuac angerongo yofi edeec, “Ge nocac donggiga ngagera kpena naso harebec andac? Negennec, ge kicnau yoacna nga sinna kpenadeac bic yombong nedzima kennec, imocac ni singga hedzickebadeac hadua. 33Haba donggingagera ye ni nemma kicnaunac meremma tegiau kenu naso harebec andac. Ye kicnaunac meremma tegiau mi kembac dede ni imohaingoc ge kpebucguma yeac kekeha onggonggebai.”
34Ifi deu Bilecam ye Kebuac angero yofi edeec, “Ge sinnu ni meficnunadeac nandang imoc mi negemma kopocsic meficgedua, imocac negenna mi ngereedeu ni dzigenebade.”
35Ifi deu Kebuac angerongo Bilecam yoac yofi meremmiec, “Ge ngic yenigoc kenna, nga neng yoac edegubade ge imocsac debesena.” Ifi edeu Bilecam ye Balakac ngictaumedacareng yenigoc kenec.
Balakngo Bilecam heitaiec
36Anu Balak ye Bilecam hama kecde, siduc ifi negemma Mocawbangec imoc Arnon dokuac tumiatoau emu feec nga ma wegenahau imocac tegiau yombong bangec edibigeng feec, imohai meficgeudeac kenec. 37Kemma meficgema Balakngo Bilecam yofi edeec, “Ni seseri amma heitaiguma ngic sueyunuba hagec ge nocac mi hanec? Me negenna ni seseheguma eweheihei naric mi anggemma bung gembadeac negennec me?”
38Ifi deu Bilecamngo yoac yofi meremmiec, “Negennec, ni yaguc gearu haduae nga ni neanna ubanaac yoac mong debadeacsoc mi anduae. Anutungo yoac enacnau faiude imocsac debade.”
39Ifi dema Balakgoc kengkecma Kiryat-Husot imohai kensikegec. 40Kensikema Balak ye imohai sese dema ramaburumaka goa kpehou amma Bilecam nga ngictaumedacareng yegoc tacgec yenearu faiu kenec. 41Anu ama wereckenu Balak ye Bilecam hesickeu kemma Bamot Bacal imohai emma imohacsing Isracelac ngicngacareng noboha tegiau tacgec yenenec.
Sélection en cours:
Bangec kisiu 22: Ded
Surbrillance
Copier
Comparer
Partager
Tu souhaites voir tes moments forts enregistrés sur tous tes appareils? Inscris-toi ou connecte-toi
© (Active), Wycliffe Bible Translators, Inc. All rights reserved.