Versets bibliques populaires de RUUMIYA 12

Partager

Dhalku/ mii ki tash me’d ’kwani kun ’koni mony’cesh yan mo ma. Hili aḵi a/aḵ mo mmota ga dun this mo ki um mini pal a’di jin ta bwa ma Arumgimis mo jin ta a’dim ’boro’d mo dhali jin mishu bu’th mo dhali jim ’borgaŋ gana/ mo be.

Haali/ a’di gi wakan mo tani aha/ yip̱a ’kup̱ ’kup̱ ki um mo, iwaḵ, gom momiimii ma Arumgimis jin mina umi c̱i is bum ka Arumgimis mo mmota to jin ’ciṯẖu/ ’kus jin di ki e mo, jin ḵogu mo, jin mish ma Arumgimis bu’th mo, jin ta to gi shi/in bum jin luŋa uma luŋ mo be.

’Kunyi bwa mo ma e mo ma ’teŋ kap̱em bum mo. ’Kuc̱i bwa mo ma ki ’kari’th e monṯo’c bwa mo. ’Dimi ’kup̱ ki sule/ e mon’tho mo ma.

Dhalku/ ki war ki uni gun p̱inu e ki tonthus mo ma. Hili p̱iya ris tonthus e mo ki miim ’borga/ mo.

Eni ka rem ’kup̱ mo mmota ikam gana/ mo dhali tayi ashu/um bway mo mmotaḵa taḵ ka rem ’kup̱ mo mmoṯor montaḵ mo.

Dhalki mo/en wara’d ki jiŋ gana/ mo. Shi/i a’di i e mo tani jin ta jin thus mo. ’Dap̱i ’twa/ mo e a’di jin ’boro’d mo.

Waḵki/ mishu mii isi mmomisha /e a’di mii mo tani c̱a’bi mo ki mo ma ḵu’th is nyaḵka ris ’kwani ’baar mo.

Um gun enka/ dhalka ri’c ki ri’c ki is bum mo ki sule/. Hili dhalki a’di ka nyor ma Arumgimis mo. Haali/ a’di ’kwarkunu mo ki: Mo ma ri’c mo tani ta jim pem mo be. Aha/ mina raḵ to ibway mo. A’di ta gwon Tap̱a mo be.

Dhalku/ ki ta ṯumu’c eya nyor ki sule/ mo ma. Tayi awa’bpa/ e Shi/in mo mmomii to gom Tap̱a mo.

Haali/ ka ’the jin c̱ikunu aha/ mo tani aha/ ona um gwo ka ’deṯe/ ’deṯe/ ibwam um ki a’din ’de/ midi diki kar is piti mmoboloc̱a boloc̱ ki bwa mo jin mina a’di mii diki ḵa kar is kan mo ba/. Hili mmokulum bwa gi ṯalu ’de/ mo aris ’kwani ’baar ka ’deṯe/ ’deṯe/ isi ki sheŋ gwo ma Arumgimis jin gamu is mo jin c̱inu a’di mo be.

Dhalki tonthus ki raḵi bway mo a’di jin ta jin thus mo mmokulum gwo ibwa nṯwa/a/ mo a’di jin ’boro’d e bwambor jis/eŋ ’kwani ’baar mo.

’Ka’di bwa ki ’ka’d mo ka rem ’kup̱ mo ma. Dhalku/ is ki kar ki ca mo, hili wuyi is ka ’cesh nyaḵki ’kwani en’thi/ mo ma. Dhalka boloc̱ ki boloc̱ ki sule/ mo.

Hili waḵki/ a’di jin ta ’kup̱ pini ’kosha ṯe/ mo tani c̱iyi a’di tonṯe/ mo ma. Dhali waḵki/ a’di budha yi’de/ mo tani c̱iki a’di mmop̱i mo ma. Haali/ gom mii gi wakan mo tani /e ki wola kap̱any o’di ’kup̱ piti mo be.

’Bori uni gwansan mii mo ma kun ṯo’c um bwa mo. ’Bori a’bor bwa i is mo ma. Dhali dhalki uni ki jee mo. ’Kunyi bwa mo ma nyaḵki uni gwansan kun ’kunya bwa mo. Koyi mo ma nyaḵki uni gwansan kun gwokin mo.

Nyaḵi to kun minu ta mo gom imandhunu ki she/ mo. Boṯi ki mii jin mina ci ta gu’b bum ŋal mo ma.

Haali/ me’d jin ṯala buŋgwar isa ’de/ mo tani ana tana gi tom buŋgwar is ka ris mo. Dhala ris tom buŋgwar is uni ’koki ta jasi en ’de/ mo. Wakan ana bala wana risa e buŋgwar is ma Ḵrisṯẖos mo dhali ka ’deṯe/ ’deṯe/ mo tani tom buŋgwar is ta anan tiya mo.