Versets bibliques populaires de UPUTUKILO 49

Partager

Lukanda kechi kakatuka kuli Yunda; mbwechi ya mukwa kuyula kuyichi kakatuka hakachi ka yiliato yenyi, ndo mwenyayo makeza mba kuli iye atu makazeyela.

José iye mutango wa kwima mihuko, mutango wa mihuko ku fuji ha meya. Ana jenyi kakutanjila ndusu sali lia chipanga. Ngashi amupinjishile chikolo, amwashile, amuhungumionene.

Hindu uta wenyi watwama ni tachi. Moko jenyi aatakamishine ku moko ja Mukwa-Ndundo wa Yakomba. (Kwenako mukukatuka mwe kafunga, lie liwe lia Izalele;) Kwe kuli Zambi ya tatenu yoze makakukwasa. Kuli mwe Mukwa-Ndundo-Jeswe yoze makakuwahisa ni yiwape ya mwilu, ni yiwape ya kalunga-lwiji watwama kushi. Ni yiwape ya mele, ni yiwape ya jimo.

Yunda, akwenu makuchichimieka. Kwoko lie mulikakwata ha kota ja akwa kole je. Ana ja tatenu makalihetamisa kuli yena. Yunda iye mwevu wa ndumba. Mwanami, unachikatuka ku yifwo ya kushiha. Iye wautamine, waliumbile ngwe ndumba, ngwe chihwo cha ndumba. Iya mamuhindwisa?

Rupene, ena uli mwe kapula-jimo, uli ndundo jami, we uputukilo wa tachi jami. Wahiana ulemu, Wahiana ngolo. Wafulukila ngwe meya, kuchi kukumba, mumu wakundamine ku muhela wa tatenu. Wauchishile, wakundamine ku muhela wami.