Tepehuán del Norte - GP (NT) NonDrama

Tepehuán del Norte - GP (NT) Drama

Dai bhodïrï ayi go Suxi Jerikoïrï dai mos sïïrhi daibuña agai. Dai ami Jerikoana dakatadai ïmo kïïrhi Zakeo tïgidukami. Tïanïdamigadïkatadai ïgai go gaa tanïdami kuota ami dai kïï gï bidakatadai.
Daidi go Zakeo nïida ïrhiditadai go Suxi dai maatia ïrhidi dïï mai xii tïkabaga ïgai dai maiti ixtutuidikïi xi nïidagi mos ïï mui odami saagida imïitai go Suxi. Dai bhaitï mïï ïgai xako daibuña agai go Suxi dai tïsai ïmo uxiana ix makïdï ami kïakatadai.
Dai aidïxi ayi go Suxi ami xako uxiana daka go Zakeo dai tïï ix tïka daja ïgai daidi potïtïdai,
—Xibi gï agai xi gï kiiyïrï gin urhiñdagi aanï. Obaidañi tudu dai tïbanda abhiadïrï— itïtïdai.
Dai otoma tïbai go Zakeo go uxiañdïrï dai bhai ïrhiarakïdï miadïgidi ïgai go Suxi sai gï urhiñana ïgai ami kiidïrï. Daidi tïïgakai go odami sai go Suxi gï urhiñda agai kiidïrï go Zakeo sai bïïxkatai ïgai soi kaitimi daidi ikaiti,
—Daiñi, ïmo soimaaxi ibuadami kiidïrï gï urhi gobai. Maiti gï agai xi pobuada Suxi. Go Zakeo ïr ïmo taanïdami kuota di— ikaitimi mai bhai gïn ïrhiditai ïgai Suxi bui.
Dïï gia go Zakeo kïkiba ami bïïxkatai buitapi daidi potïtïdai ïgai go Suxi,
—Daiñi aapi gin Tïanïdamiga, maaki iñagai tajukami gin buxtuidaga go soititigami. Dai bïïxi go tuminxi ix makïdï gaïïxidiña aanï buirmadatai aanï odami, gobai aa noraidamu aanï ïpamu. Xibi aanï aagai sai maakobako bamioma aa noraidamu aanï ix makïdï gaïïxidi aanï— itïtïdai.
Daidi Suxi potïtïdai go Zakeo ïmadï bïïxkatai ix makïdï ami darakatadai,
—Aapi Zakeo ka ïma dukai gï tïgito dai podukai maaxitu aapi sai buaboikïdï ïr pipiixaradï aapi go Abraamkaru. Kaxkïdï xibi ka kïïgakïrï busai aapi ïmadï bïïxi gï aaduñi tami idi kiiyïrï óídakami. Daiñi aanï ïr otosadï Diuxi ix makïdï ïmo kïïrhi busai dai dibia aanï gaaga iñagaitai odami ix makïdï ïr xibhï iimiadï Diuxi bïïtarï. Dai aapi Zakeo ïr ïmoko ix makïdï gaagaitadai aanï. Dibia aanï dai kïïgakïrï bubaida iñagai soimaaxi ibuadami tudu— itïtïdai.

Dai mui odami kaïkatadai aatagidï Suxi dai xibi ka miadïrï imïitadai Suxi Jerusalenïrï bai go odami po gïn ïrhiditadai sai ka kïsa agaitadai gobiernogadï Diuxi sai tïanïna Diuxi oidigi daama. Xi kaxkïdï go Suxi aagidi ïmo maaxidaragai aatagi sai maatïkana ïgai sai mai kia kïsa agaitadai ïgai gobiernogadï. Potïtïdai ïgai,
—Daiñi, ïmo imidagai oidakatadai ïmo kïïrhi ix makïdï ïr pipiixaradïkatadai ïmo rey. Dai ïmo imidagai gï dasa agaitadai ïgai rey ïpï ami oidigïrï xako oidakatadai ïgai. Dai biakatadai ïgai xi mïkaxi imiagi dai nïidagi ïmai rey dai ami bhïiyagi go sïïrhikami xi ïr reykagi dai bhodïrï dibiagai dai gatïanïda agai ami xakoga oidakatadai ïgai. Dai mai kia imïkai sai báí ïgai bhaibuxtama pipioñigadï dai nukaturhi ïïmo oro tuminxi ïïmoko. Daidi potïtïdai,
—Aaduintuldabïrai idi tuminxi asta xïxkadï dibiagi aanï ïpamu— itïtïdai.
—Dai bhodïrï jii ïgai dai mïï bhïiyi agai sïïrhikamigadï—.
—Dïï gia go óídakami ami sïïrhikïdï kïïdaitadai go kïïrhi ix makïdï bhïiyi agaitadai go sïïrhikami. Maiti ipïrhiditadai ïgai xi ïgai ïr reygadïkagi tudu. Dai ka imïkai ïgai sai go óídakami otoi jaa sai mïï aituldana ñoki go gïmai rey mïkaxi dakïdï dai aagidi sai mai bhai aagai xi ïr reygadïkagi ïgai ix makïdï gamo bhïiyi agai go sïïrhikami—.
—Dai bhodïrï sai dibia go kïïrhi ïpamu kiiyïrï ka reykatai dai báí ïgai go bhaibuxtama pipioñi ix makïdï maatadai ïgai oro tuminxi. Ga tïkaka ïrhiditadai ïgai ix dui ïgai go tuminxi. Dai go ïpïgadï ayi ami daidi potïtïdai,
—Gin amu, gin nukaturhi aapi ïmo oro tuminxi dai gokïdï gamaitï aanï ïpï bhaibuxtama gï bïïtarï— itïtïdai.
—Dai go rey potïtïdai,
—Kïï tuiga aapi in pioñi, kïï dui aapi. Lïïchi gï maa aanï dai sïïrhi aatadui aapi gokïdï xi kaxkïdï xibi gï maakimu aanï sïïrhikami sai tïanïda aapi bhaibuxtama gïgïr kiiki— itïtïdai.
—Dai bhodïrï dibia ïpï ïmo pioñigadï daidi potïtïdai,
—Gin amu— itïtïdai. —Gin nukaturhi aapi ïmo oro tuminxi dai gokïdï gamaitï aanï ïpï taama gï bïïtarï— itïtïdai.
—Daidi go rey potïtïdai,
—Kïï dui aapi. Gï maakimu aanï sïïrhikami sai tïanïda aapi taama gïgïr kiiki— itïtïdai.
—Dai bhodïrï dibia ïpï ïmai pioñigadï go rey daidi potïtïdai,
—Gin amu, tami daka gï tuminxiga— itïtïdai. —Duadimukatadai aanï maatïkatai sai mai taata tïanïi aapi. Kaxkïdï duadiko aanï dai ïmo pañituïrï buu gï tuminxiga dai bhai dáí. Kïï maatï aanï sai aapi buyiña aaduindadï jaa dai yoobaiña jaa ïïxidï ïpï kaxkïdï duadiko aanï dai mos bhai dáí— itïtïdai.
—Daidi go rey potïtïdai,
—Agia mai kïï tuiga aapi pioñi. Maiti ïr soiñi aapi toma lïïchi— itïtïdai. —Ïïgi gïpiïrï gï daitudai aapi gï ñokikïdï di. Ka pokaiti aapi sai aanï mai taata tïanïi dai sai buyiña aanï aaduindadï jaa dai sai yoobaiña aanï ïïxidï jaa ïpï. Daiñi, xi ïr buaboikamudai ix dukai aagai aapi aidï gia gï agaitadai xi ïmo bankoïrï dasagi aapi gin tuminxiga. Ix poduñimudai aapi aidï gia dibiakai aanï buimudai aanï gin tuminxiga ïmadï modukai go maitïki ix makïdï aa namïidi go banko ïpï. Pomaaxi iduñimudai aapi— itïtïdai.
Dai bhodïrï go rey potïtïdai go gaa ix makïdï ami gukatadai,
—Bhïibïrai go tuminxi daidi abïr maaka gobai ix makïdï bia go bhaibuxtama tuminxi— itïtïdai.
Dai go gaa potïtïdai,
—Aapi rey, ¿Tuixi maakia ïrhidi aapi gobai? Ka bia gobai bhaibuxtama tuminxi di— itïtïdai.
Daidi go rey potïtïdai go odami,
—Gin kaïkabïrai. Daiñi, aanï aagai sai xorai biakagi maitïki gï maakiadamu bamioma. Dai xorai mai biakagi maitïki gï popoidamu ixtumaxi biakatadai ïgai— itïtïdai.
—Dai go rey potïtïdai ïpï go odami,
—Bhai gobai abïr buapa ïgai ix makïdï ïr gin buidïrï bïïtïkamiga dai pokaiti sai maiti ipïrhidi xi gatïanïda aanï. Bhai gobai abïr buapa dai tami gin buitapi abïr koda— itïtïdai go rey aaduñdï mïkaxdïrï dibiakai.
Potïtïdai Suxi go odami aagaitai ïmo maaxidaragai aatagi. Dai bhodïrï oi gï imidaga maigo daana Jerusalenamu dai mamaatïrdamigadï oiditadai ïpï.

Dai ayi Suxi Betpagiïrï dai Betaniïrï ukami. Miadïrï bipiïyi gobai go gidi Olibo tïgidukïdï. Dai abhiadïrï bhaitïki otoi ïgai goka mamaatïrdamigadï dai potïtïdai,
—Iimibïrai mïï arhi kiikiïrï mobai dai ami tïïgimu aapimï ïmo axñitu burhikami ix makïdï tomarhi ïmadutai mai kia dadaïjïi daama. Bïrai upanda dai bhaigobai buapa— itïtïdai. —Dai xi ïmadutai gïn tïkakagi ix tuixi upasai aapimï gobai bïrai potïda sai gïn Tïanïdamiga tïgito— itïtïdai Suxi otosakai ï goka mamaatïrdamigadï.
Daidi iji go mamaatïrdamigadï dai bïïxi tïï ixdukatai aagidi Suxi. Dai aidïxi ka upasaitadai ïgai go axñitu sai go soigakami potïtïdai,
—¿Tuixi upasai aapimï go axñitu?— itïtïdai.
Dai go mamaatïrdami potïtïdai,
—Gïr Nukadakami tïgito gobai— itïtïdai.
Dai ka bhïidakai ïgai Suxi go axñitu sai bhodïrï daama darai ïgai gïn yukuxi dai ami daama dáí ïgai go Suxi. Dai Suxi oi imidadï axñitu daama daitugaitai bai go odami boiyïrï urhigiña yukuxidï ïmo xadutudaragai dukai ïgai bïïtarï sai daama daibunana ïgai. Dai aidïxi ka miadïrï imïitadai ïgai xako koidamu kaatï boi go Olibo gidiañdïrï sai bïïxkatai go mamaatïrdamigadï Suxi ix makïdï oiditadai iñakimitadai dai ganïïjimi. Kïïga bhai gïn ïrhiatugaitai ïgai tudu dai aagaimi xïï kïï tuiga Diuxi. Tïtïitoi ïgai ixtumaxi nïiditadai ïgai, go naana maaxi maaxidaragai ix makïdï idui Diuxi xigiamaaxkami dai bhai gïn ïrhiatugai. Daidi adukai ikaitimi ïgai,
—Ipïrhidi aatïmï sai kïïga biakana bhai ïrhiaragai idi gïr Reyga ix makïdï gïr dibiji xibi. Otosadï gobai Diuxi gïr Tïanïdmiga kaxkïdï. Dai xibi ka bhai duñimu gobai sai ka mai ïko darakagi aatïmï Diuxiañdïrï ix makïdï tïbagiana daka. Agia gï agai xi oidakagi gïdukami xadutudaragai Diuxi bïïtarï ami tïbagiana— ikaitadai go odami.
Dai ïïmadutai go fariseos kaï ix kaititadai go odami daidi potïtïdai ïgai go Suxi,
—Gobai ïr gï mamaatïrdamiga dai pokaitimi di. Bhagaidañi aapi. Daidañi ix ka mai Reygadï gï aagada ïgai— itïtïdai ïgai bhakoikai.
Dïï gia Suxi mai ïïgidi dai bhaiyoma potïtïdai,
—Daiñi— itïtïdai. —Ix idi odami dodorhi biyagi dai ka maiti gin xadutuadagi aidï gia asta go ojodai iiñakada antaada gin xadutudaitai— itïtïdai.

Daidi bhodïrï ka miadïrï aijimi go Suxi Jerusalenïrï dai suakimi ïgai nïiditai daidi ikaiti,
—Aapimï Jerusalenïrï óídakïdï, aapimï bamioma gï agaitadai xi maatïkagi ix dukatai bhïiyagi ibhïxtaragai dïï mos mai maatï aapimï. Xïïxi ïr kïïgaikamudai ix maatïkamudai aapimï tudu. Dïï xibi mai bhaiga aapimï xi maatïkagi kia. Maiti ipïrhi aapimï xi buaboitudagi Diuxi aidïxi gïn dibiji ïgai kïïgakïrï gïn bubaida agaitai. Maiti ipïrhi aapimï dai kaxkïdï ayimu ixtuigako gïn xikorhimada agai gïn buidïrï bïïtïkamiga. Kïïsamu ïgai ïmo gïï kurarai bïï xikorhi gïn kiiki sai ka mai bhaigakamu aapimï ix bubuakiagi abhiadïrï xako óídaga aapimï Jerusalenïrï. Bïïxi aipadïrï gïn bui surhigimu ïgai tudu dai bïïxi naato surhigimu ïgai gïn kiiki dai gïn kodamu. Bïï naato xia duadamu ïgai go Jerusalen tudu. Maiti ipïrhi aapimï xi buaboitudagi Diuxi gïn dibidakai ïgai kïïgakïrï gïn bubaida agaitai kaxkïdï— itïtïdai.

Dai ka aïkai Suxi Jerusalenïrï sai ami baa ïgai go gïï kiupiïrï dai aadaki ix makïdï gagaagaraitadai naana maaxi ami dai ix makïdï gasapïdaitadai ïpï. Dai ñokidi ïgai daidi potïtïdai,
—Diuxi ñokidïrï ikaiti sai, Diuxi kiidï ïr daanïdaragai bïïtarï Diuxi. Maiti ïr ïmo gagarakaru gobai tudu. Dïï aapimï ïmo ïïxibogami kiidï dukai bia— itïtïdai Suxi.
Dai bïïx tasai gamamaakaitadai Suxi aatagi ami kiupiïrï. Dai go tïtïanïdamigadï go dadaxdadami ïmadï go tïtïgiadami sïïrhikami dai go bhaitï gukakamigadï go judidiu bïïxi gaagaitadai ixdukatai muagi dïï mai tïtïgaitadai ïgai ixdukatai. Go odami sïïrhikïdï ojoiditadai ix kaïkagi ñokidï go Suxi kaxkïdï.

Écouter Lukas 19