Mazatec Ixcatlán - 2013 SBM (NT+Gen,Exd) Non Drama

Traducción Bíblica: Mazateco de San Pedro Ixcatlán, 2013© Sociedad Bíblica de México, A.C.,2013www.sbm.org.mx Grabación: Mazateco de San Pedro Ixcatlán ℗ Hosanna, 2021

Ni̱xtjin nga Néná ítsꞌi̱yanii̱ nga katsꞌénda nkꞌaján ko̱jo nga̱sondiee̱,
ta̱xkiya kisꞌijña kuí nga̱sondiee̱,
kó jmí ni kisꞌiejiín xi kisꞌińdo tikón.
Jñó kisꞌijña ndójoa xi kisꞌie nga̱són tꞌananguii̱,
ta̱nga A̱sién Ni̱xtjii̱n Néná
ki̱a̱ kistsoꞌbásón nga̱són ndójoaa̱.

Kó bi̱ katsó Néná:

«¡Mejénna nga ka̱matsijen!».

¡Kó ti̱kjiꞌa kamátsijen!
Kó nga kamábe Néná nga tsjachon kamá nguije kamátsijee̱n,
xín íjñá nga tsijee̱n, kó xín íjñá nga jñoó.
Kó Néná «ni̱xtjin» katsoó nga tsijee̱n,
kó nga jñoó «ni̱xtji̱e̱n» katsoó.
Kó bo̱a̱ tsꞌén kamájñó, kó jaskan kisisie̱én.
Kuí boá xi̱ꞌba̱ ni̱xtjin xi tjoón.

Kósꞌe̱ bi̱ katsó Néná:

«Mejénna nga kꞌuijñá ngu̱i̱jinꞌa̱sien ngamasiee̱n ndójoaa̱,
kó kui ngu̱i̱jinꞌa̱sie̱én xi ngatꞌaxiékjo ndójoaa̱».

¡Kó ti̱kjiꞌa bo̱a̱ kamá!
Kó Néná katsꞌénda ngo ngu̱i̱jinꞌa̱sien ngamasiee̱n ndójoaa̱,
kó masien kui ndójoaa̱ kisꞌijña nguindieján,
kó xi ngui masiee̱n nkꞌaján kisꞌijña.
Kó nga kamábe Néná nga tsjákisꞌie ngu̱i̱jinꞌa̱sie̱én.
«Nkꞌaján» katsoó.
Kó bo̱a̱ tsꞌén kamájñó, kó jaskan kisisie̱én.
Kuí boá xi̱ꞌba̱ ni̱xtjin xi ma joó.

Kósꞌe̱ bi̱ katsó Néná:

«Mejénna nga ngo ngu̱i̱ndie ngatamatikó ndójoa
xi tikón nguindiee̱ nkꞌaján,
kó ngatjatjokjaní ngu̱i̱ndie nínga kixí».

¡Kó ti̱kjiꞌa bo̱a̱ kamá!
Kó Néná «tꞌanangui» katsoó ngu̱i̱ndie nínga kixií,
kó nínga kamátikó ndójoaa̱ «ndáchíkón» katsoó.

Kó nga kamábe Néná nga tsjakon kamá kui nii̱, bi̱ katsó:

«Mejénna nga kꞌuié ngu̱i̱jin tꞌananguii̱
kꞌijñá xkjuién ko̱jo yá xí nga tsjá to ko̱jo xojmá».

¡Kó ti̱kjiꞌa bo̱a̱ kamá!
Kó ngu̱i̱jin tꞌananguii̱ kisꞌie yá ko̱jo kꞌijñá xkjuién,
yá xí kisꞌiee̱ to,
ko̱jo kꞌijñá xkjuién xí kisꞌiee̱ xojmá.

Kó tji̱e̱nga Néná askotsijee̱n nga tsjákisꞌie kui nii̱,
kamájñó, sꞌe̱ jaskan kisisie̱én.
Kuí boá xi̱ꞌba̱ ni̱xtjin xi ma jaán.

Kósꞌe̱ bi̱ katsó Néná:

«Mejénna nga ngasꞌie ndiꞌí ngu̱i̱jinꞌa̱sie̱én,
tsi̱ꞌe̱ nga kja̱ xín kja̱ xín ngasꞌijña ni̱xtjii̱n ko̱jo ni̱xtji̱e̱e̱n,
kó kui ndiꞌií xi ngatakó cha̱a̱n,
ko̱jo ni̱xtjii̱n ko̱jo noó,
kó kui xi ngatsꞌéntsíjen ngu̱i̱jinꞌa̱sie̱én
tsi̱ꞌe̱ nga ka̱matsijen nga̱sondiee̱».

¡Kó ti̱kjiꞌa bo̱a̱ kamá!
Kó Néná katsꞌénda jó ndiꞌí xí yiꞌi:
Ngo ndiꞌí xí je, kui xi tsꞌueé, tsi̱ꞌe̱ nga ko̱tíxoma nga ni̱xtjii̱n,
ko̱jo ngo ndiꞌí xi chichí, kui xi saá, tsi̱ꞌe̱ nga ko̱tíxoma nga jñoó.
Kó ti̱ katsꞌénda ńñoo̱ nga.
Kó Néná índo kui ndiꞌií ngu̱i̱jinꞌa̱sie̱én,
tsi̱ꞌe̱ nga sa̱ꞌíntsijen nga̱sondiee̱,
ko̱jo tsi̱ꞌe̱ nga ko̱tíxoma nga ni̱xtjii̱n ko̱jo nga ni̱xtji̱e̱e̱n,
ko̱jo tsi̱ꞌe̱ nga kja̱ xín kja̱ xín kꞌuijñá nga tsijee̱n ko̱jo nga jñoó.

Kó tji̱e̱nga Néná askotsijee̱n nga tsjakon kamá kui nii̱,
kamájñó, sꞌe̱ jaskan kisisie̱én.
Kuí boá xi̱ꞌba̱ ni̱xtjin xi ma nijoón.

Kósꞌe̱ bi̱ katsó Néná:

«Mejénna nga ngu̱i̱jin ndáchíkoón
ngasꞌikitsie ngayeje to̱ko̱ya xi síndo.
Mejénna nga kꞌuié cho̱ xi fítji̱e̱n nga̱són nga̱sondiee̱,
kó ngatꞌítso̱ma xikó kjiꞌi nga tiyá nkꞌaján».

Kó bo̱a̱ tsꞌén katsꞌénda Néná
cho̱ xi yiꞌi ngu̱i̱jin ndáchíkoón.
Ko̱jo ngayeje to̱ko̱ya cho̱ xi síndo xi tsꞌéntíyá,
kui xi kamáxchá ngu̱i̱jin ndójoaa̱,
ko̱jo ngayeje cho̱ xi fítji̱e̱n nkꞌaján.

Kó nga kamábe Néná nga tsjakon kamá kui nii̱,
bi̱ katsoó nga katsꞌénchikonñé:

«Mejénna nga ngayeje cho̱ xi tjín ngu̱i̱jin ndáchíkoón,
ngatamatji̱e̱, kó ngatamakjín, ngasꞌikitsieni ngu̱i̱jin ndójoaa̱ ndáchíkoón,
kó mejénna nga ni̱siee̱
ka̱makjín kui nga̱sondiee̱».

Kó kamájñó, sꞌe̱ jaskan kisisie̱én.
Kuí boá xi̱ꞌba̱ ni̱xtjin xi ma uún.

Kósꞌe̱ bi̱ katsó Néná:

«Mejénna nga ka̱maxchá ki̱a̱ tꞌananguii̱
ngayeje to̱ko̱ya cho̱ xi síndo,
cho̱ xi ma ꞌbítji̱e̱,
cho̱ kꞌijñá,
cho̱ xi ꞌbifé yojoo̱ ko̱jo ndí cho̱ xi ꞌniú xi̱xi̱i̱».

¡Kó ti̱kjiꞌa bo̱a̱ kamá!
Kó Néná katsꞌénda cho̱ kꞌijñá,
cho̱ xi ma ꞌbítji̱e̱,
cho̱ xi ꞌbifé yojoo̱ ko̱jo ndí cho̱ xi ꞌniú xi̱xi̱i̱.

Kó nga kamábe Néná nga tsjakon kamá kui nii̱, bi̱ katsó:

«Si̱ꞌanda xotaa̱ ꞌne̱, xikó má kjiꞌi a̱sie̱énná,
ko̱jo xikó má kón ñá, bo̱a̱ má tsꞌén si̱ꞌanda,
kó kuí ngatatixómaá cho̱ xi tjín ngu̱i̱jin ndáchíkoón,
ko̱jo ni̱sie xi tjín nkꞌaján, ko̱jo ngayeje cho̱ xi tjín tꞌananguii̱,
ko̱jo ngayeje cho̱ xi ꞌbifé yojoo̱, ko̱jo ngayeje ndí cho̱ xi ꞌniú xi̱xi̱i̱».

Kó bo̱a̱ tsꞌén katsꞌénda Néná xota̱ nga̱sondiee̱,
xikó kjiꞌi a̱sie̱én ko̱jo xikó kjiꞌi kui,
bo̱a̱ má tsꞌén katsꞌénda,
xi xi̱ꞌin ko̱jo xi chjo̱on katsꞌénda.
Kó Néná bi̱ katsoó nga katsꞌénchikonñé:

«Mejénna nga kꞌuiéjnú ndí,
kó ngatamakjínjnú,
mejénna nga jún xi kꞌuikítsienijnú nga̱sondiee̱,
kó ni̱ꞌantꞌiéjnú ko̱jo tatíxomájnúu̱
cho̱ xi tjín ngu̱i̱jin ndáchíkoón,
ni̱sie xi tjín nkꞌaján,
ko̱jo ngayeje cho̱ xi síndo,
ko̱jo ngayeje cho̱ xi ꞌbifé yojoo̱ nga̱són tꞌananguii̱».

Kó Néná ti̱ bi̱ ti̱ katsó ngasee̱:

«Ngotꞌe̱ ꞌne̱ kꞌi̱e̱ tjítsꞌenkꞌasꞌienjnúꞌun jún,
ngayeje to̱ko̱ya kꞌijñá xi tsjá xojmá,
ko̱jo ngayeje yá xí tsjá to,
kuí boá xí ka̱ma xi̱ni̱e̱jnú jún.
Ta̱nga ngayeje cho̱o̱ kꞌijñá xkjuieén
boá xi ka̱ma skji̱ni̱e̱ kui».

¡Kó ti̱kjiꞌa bo̱a̱ kamá!
Kó tji̱e̱nga Néná askotsijee̱n nga tsjakon kamá ni xi katsꞌéndaa̱,
kamájñó, sꞌe̱ jaskan kisisie̱én.
Kuí boá xi̱ꞌba̱ ni̱xtjin xi ma juu̱n.

Écouter Jénesii̱s 1