Mat 2
2
‑Zɔlʋkopenya ya Zozii kopekan mʋ
(Luk 2.8-20)
1Daa ma valɩ 'lɛ Zozii Bɛtɩlɛmʋ, Zudeebhlɩa 'kʋ, nyɩbhɛlʋ Ewlɔdʋ 'la 'bhlɛsʋa nɩkplaan na, ‑zɔlʋkopenya ya gbazɩa 'ylʋbhuoa bholu 'lɛ 'kʋ na, 'wlʋlʋ 'nyɩ ma ya Zolizalɛmʋ ci. 2Ma ya neencla lebhe: «'Ndagbazɩ Zifʋnyaa* 'la nyɩbhɛlʋa ma wlʋ 'lɛ valɩda na, ‑kʋa 'lɛ bha? ‑A ya ɔla ‑zoliea 'lɩ, dɛ ‑a ci 'lɛ le ‑a kɔɔ gʋgwla.» 3Nyɩbhɛlʋ Ewlɔdʋ 'nu 'lɛ wɔlɩ ‑naa na, 'wugo yɔɔ 'wlu 'wlʋ, ɔya Zolizalɛmʋnyaa 'fɩan. 4Ɔ ya Izlayɛlɩlɔlʋ* 'la ‑teyiyinyaa tocɩa 'fɩan ɩya ‑jlɩmaazienyaa* 'wluwlalɩ 'nyɩ ɔ ya maa neencla le ma palɔɔ daa 'titia ma cɩ 'kaa 'lɛ Laagɔ 'la ‑Sasanyɔa* valɩlɩ na. 5Ma yɔɔ 'cla lebhe: «Bɛtɩlɛmʋ, Zudeebhlɩa 'kʋ. Sa 'lɩka ɩmɩa Laagɔnekʋnyɩtɛnyɔa* zie 'lɛ na:
6 ‑Mɔ Bɛtɩlɛmʋ, Zuda 'la ‑dʋdʋ,
‑n ‑kʋmʋ ‑nʋawlɛɛsa Zuda 'la dikadɩa nɩkplaan.
Sa, ‑mɔ nɩkplaan ‑kwletoa ‑ɔ -cɩ ka 'lɛ Izlayɛlɩ, 'na 'lɔlʋa, kpa na, cɩ 'ka 'lɛ 'wlʋlʋ.»
7Na, Ewlɔdʋ ya gba, ma ya ‑zɔlʋkopenyaa ziziekoteen lalɩ 'nyɩ ma yɔɔ ‑zoliea 'la 'wlʋclɩɩa pala. 8Ɔ ya maa Bɛtɩlɛmʋ lobhu, ɔ ya maa 'cla lebhe: «A mʋ a 'cla 'cileea 'la da bɩkʋ 'nanɩ, ɩya a ‑kɔɔ 'lɩ na, a gba n cibhlili sɛɛ ɩya ‑amʋ ‑ma, n 'ka mʋ, n 'kɔɔ gʋgwla.»
9Nyɩbhɛlʋa ‑bhle 'lɛ na, ma ya ‑gugwie 'ma 'nyɩ ‑zoliea ma 'lɩa 'lɛ 'ylʋbhuoa 'la 'wlʋlʋdaa na, ‑kʋa maa 'kʋklʋʋn, ɛ ya mʋ ‑aan 'nyɩ ɛ ya daa 'cileea ‑kʋa 'lɛ na 'nylugo. 10Ma 'lɩɛ 'lɛ na, ɩ ya ma pɔlɛkʋmɛnɔ 'kadie 'nʋ. 11Ma ya ‑palʋa ‑zɔn ble, ma ya 'cileea ɩya ɔ nɔ Malii 'lɩ, ma ya ‑kukoonkplii sasla 'nyɩ ma yɔɔ gʋgwla. Ma ya mala bedia ‑blulu 'nyɩ ma yɔɔ ‑asɩkɛ, donyi ɩya ‑asʋnbanyɩa ma la 'lɛ 'mili na va. 12‑Ma 'claawluun, Laagɔ ya maa flɩɩnzʋ le ma 'la cɔlɔanɩ Ewlɔdʋ 'bhlɩ. Na, ma ya ‑buun ‑gugwie 'ma 'nyɩ ma ya 'lɛ ma 'bhlɩ cɔlɔ.
Zozɛfʋ ya Ejibhitibhlɩa 'kʋ mʋ
13Daa ‑zɔlʋkopenyaa mʋ 'lɛ na, ‑Kwlenyɔ 'la 'bhlaandleea* ya Zozɛfʋ 'claawluun 'cla lebhe: «‑Bho 'kʋ, 'ma 'cʋa ɩya ɔ 'nɔ ɩya ‑n 'gu ‑n mʋ Ejibhitibhlɩa 'kʋ. Kʋ 'yɛpɩ ‑aan ɩya n 'kɔɔ 'cla lebhe ‑n cɔlɔ, sa Ewlɔdʋ cɩ 'ka 'cileea 'matɩ le ɔ 'kɔɔ 'bhla.» 14Zozɛfʋ ya dobhesa 'kʋ ‑bho, ɔ ya 'cʋa ɩya ɔ 'nɔ 'ma, 'nyɩ ma ya 'plɩ, ma ya Ejibhitibhlɩa 'kʋ mʋ. 15Ɔ ‑kʋ 'yɛpɩ ‑aan 'nyɩ Ewlɔdʋ ya 'lɛ 'ku. ‑Sa ɩmɩa ‑Kwlenyɔa 'plɩlɩa 'lɛ ɔla nekʋnyɩtɛnyɔa 'kʋ 'nyɩ ɔ nyɩtɛa 'lɛ na, ɩ ‑glalɩ 'lɛ 'kʋ: Ejibhiti n lalɩ 'na 'cʋa le ɔ 'wlʋ ‑zɔn.
Ewlɔdʋ ya Bɛtɩlɛmʋdua 'kʋ 'la 'cuoa 'bhla
16Daa Ewlɔdʋ 'lɩ 'lɛ lebhe ‑zɔlʋkopenyaa yɔɔ 'nyiglili na, ɔ ya dɔgbɛ 'kadie 'ma. Ɔ ya ncɛlɩ lobhu le ma 'bhla Bɛtɩlɛmʋdua ɩya ʋla cɩa 'dia 'la 'ciŋodicuoa 'fɩan, ‑ɔ -bhɔlʋɔ 'lɛ clɩɩbhlocuoa 'kʋ ‑aan 'nyɩ ‑ɔ ‑ŋenio 'lɛ liowlimɔsɔcuoa 'kʋ na. Sa, ‑zɔkpaa ‑naa aya ‑zoliea 'la 'wlʋclɩɩa, ɔ gba 'lɛ 'nyɩ ‑zɔlʋkopenyaa palaa 'mɔɔ 'lɛ na, bhlilia nebhlo na. 17Na, Laagɔnekʋnyɩtɛnyɔ* Zelemii 'la niwɔlia ya 'kʋglalɩ:
18 Ma ya ‑blɩɩzɔn bhlo Ghlamaa 'nunu,
'nʋgbʋkasɛ ɩya bhʋtʋɛa ‑ɛ do 'taan 'lɛ na,
Ghlasɛlɩ tu 'lɛ ɔla 'cuoa,
'nyɩ ɔ 'ta ‑wa lebhe ma zʋɔ pɔlɛɛn,
sa ma 'tanɩ ‑kʋ na.
Zozɛfʋ ya Ejibhiti 'wlʋ
(Luk 2.39-40)
19Daa Ewlɔdʋ 'ku 'lɛ na, ‑Kwlenyɔ 'la 'bhlaandleea* ya Zozɛfʋ 'yɛpɩ Ejibhitibhlɩa 'kʋ 'claawluun futolu. 20Ɔ yɔɔ 'cla lebhe: «‑Bho 'kʋ, 'ma 'cʋa ɩya ɔ 'nɔ ɩya ‑n 'ma Izlayɛlɩbhlɩa* 'kʋ 'la ‑gugwie. Sa, maa ‑ɔ 'matɩa 'lɛ 'cʋa 'la 'bhlada na, ma ya 'ku.» 21Zozɛfʋ ya 'kʋbho, ɔ ya 'cileea ɩya ɔ 'nɔ 'ma 'nyɩ ma ya Izlayɛlɩbhlɩa 'kʋ cɔlɔ. 22‑Ma ɔ 'nu 'lɛ lebhe Akelayusu ‑ɔ ‑kʋanɩa 'lɛ ɔ to Ewlɔdʋ 'la 'jeen, Zudeebhlɩa 'kʋ na, 'yɛpɩ 'la mʋlɩɛa yɔɔ ŋanɔ ‑pla. Na 'claawluun, Laagɔ yɔɔ flɩɩnzʋ 'nyɩ ɔ ya 'plɩ ɔ ya Galileebhlɩa 'kʋ mʋ. 23Ɔ ya 'dua ma la 'lɛ Nazalɛtɩ na 'kʋ mʋ 'nyɩ ɔ ya sakʋ. ‑Sa ɩmɩa Laagɔnekʋnyɩtɛnyaa 'bhlia 'lɛ 'kʋ lebhe: Ma cɩ 'kɔɔ Nazalɛtɩnyɔ la na, ɩ -glalɩ 'lɛ 'kʋ.
Tällä hetkellä valittuna:
Mat 2: NTLD13
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Dida New Testament © Bible Society of Côte d'Ivoire, 2013.