Samz 139
139
Pou chèf mizisyen-an
Sé an sam David
Bondyé Konnèt Mwen Byen
1Bondyé Senyè, ou ja ègzanminé mwen
èk ou konnèt mwen.
2Ou konnèt lè mwen asid èk lè mwen lévé,
byen lwen koté ou yé-a ou konnèt tout sa ki ka pasé an lidé mwen.
3Ou konnèt tout sa mwen ka fè,
ou konnèt lè mwen lévé èk lè mwen kouché.
4Avan pawòl-la menm sòti an bouch mwen, Bondyé Senyè,
ou ja konnèt sa mwen kay di-a.
5Ou ni dèyè mwen ni douvan mwen,
èk lanmenʼw ka pwotèkté mwen.
6Mwen pa sa konpwann ki mannyè ou fè konnèt mwen byen kon sa,
katjil ou twò ho pou mwen.
7Koté mwen sa alé pou lèspwiʼw pa jwenn mwen?
Koté mwen sa kouwi pouʼw pa la èk mwen?
8Si mwen mouté an syèl, ou la,
si mwen kouché koté sé mò-a yé-a, ou la tou.
9Si mwen volé alé koté sòlèy-la ka lévé-a,
épi si mwen wèsté an bout lanmè-a koté sòlèy-la ka kouché-a,
10jis la lanmenʼw kay kondwi mwen,
èk lanmen dwèt ou kay sipòté mwen.
11Si mwen di nwèsè-a pou kouvè mwen
èk klèté-a ki oliwon mwen-an pou vini fènwè,
12pa menm nwèsè-a ki nwèsè pou ou.
Fènwè-a ka kléwé menm kon lajouné pou ou.
Nwèsè èk klèté pa ni diféwans pou ou.
13Sé ou ki fòmé tout sa ki andidan mwen,
ou byen pentwi mwen an bouden manman mwen.
14Mwen ka glowifyéʼw èk wèspé lè mwen wè ki otan bèl ou fè mwen.
Mwen konnèt byen tout sa ou fè bèl.
15Ou té konnèt tout zo mwen,
dépi lè ou fòmé mwen an sigwé,
lè ou byen wanjé mwen an bouden manman mwen.
16Ou té ja wè mwen avan mwen té fèt.
Tan-an ou té ban mwen pou viv-la
té ja ékwi an liv ou
avan tan sala té koumansé.
17Bondyé, ou konnèt tèlman!
Sé bagay-la ki an lidéʼw-la twò difisil pou mwen konpwann.
18Si mwen té kay sa konté yo, la té kay ni plis pasé sab ki bò lanmè.
Si mwen fini konté yo, mwen té kay menm koté-a mwen koumansé-a.
19Bondyé, pa dé anvi mwen anvi ou tjwé sé méchan-an!
Tiwé kòʼw bò mwen, débann nonm ki ka mété san moun dèwò!
20Yo ka malpaléʼw,
yo ka ensilté nonʼw.
21Bondyé Senyè, pa dé hayi mwen hayi sé moun-an ki hayiʼw-la!
Mwen pa sa wè sé moun-an ki ka lévé kont ou-a!
22Mwen hayi yo èk tout tjè mwen,
mwen ka gadé yo kon lèlmi mwen.
23Ègzanminé mwen, Bondyé, èk konnèt tjè mwen!
Chaché an lidé mwen èk konnèt sa ki andidanʼy.
24Gadé si mwen ni pyès movèzté andidan mwen,
èk kondwi mwen an chimen-an ki la pou tout tan-an.
Tällä hetkellä valittuna:
Samz 139: acfDBL
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 1999, Wycliffe Bible Translators, Inc. All rights reserved.