Тархал 32
32
Иордан гӀурул бакъбаккул рахъалда ракьал рикьи
(Къан. 3:12-20)
1Рувимилги Гадилги наслабазул букӀана кутакалда гӀемераб боцӀи. Гьезда бихьана Язералъулги ГилгӀадалъулги ракьал боцӀи хьихьизе санагӀатал ругеблъи. 2Гьел рачӀана Мусахъеги, кашиш Элеазарихъеги, халкъазул кӀудиязухъеги ва гьез абуна:
3-4«Нижер, дур лагъзадерил, гӀемераб боцӀи буго. БЕТӀЕРГЬАНАС ГӀизраилил халкъалъе мутӀигӀ гьарурал ракьалин абуни – Атаротги, Дивонги, Язерги, Нимраги, Хешбонги, Элеалеги, Невоги, Беонги – боцӀи хьихьизе санагӀатал ракьал руго. 5Дур ракӀ рекъани, кье гьел ракьал нижее, дур лагъзадерие. Рачунге ниж Иордан бахун дорехун».
6Мусаца Гадилги Рувимилги наслабазда абуна:
«Нужер вацал рагъде араб мехалда, нуж гьанирищ чӀезе ругел? 7Щай нужеца, БЕТӀЕРГЬАНАС кьурал ракьазде ине гӀизраилазул гъира чӀвалеб? 8Гьебго гьабуна нужер умумуз Кадеш-Барнеаялдаса Ханааналъул ракьалъул хал-шал гьабизе дица гьел ритӀараб мехалдаги. 9Эшколалъул гӀатӀиракьалде щвезегӀан ракьалъул халги гьабун тӀадруссиндал, гьез гӀизраилазул гъира чӀвана БЕТӀЕРГЬАНАС гьезие кьураб ракьалде ине. 10Гьеб къоялъ БЕТӀЕРГЬАНАСУЛ ццин бахъана ва Гьев гьедана: 11„Мисриялдаса къватӀиве вахъарав къого соналдаса тӀаде араб ригьалъул цониги чиясда бихьизе гьечӀо Ибрагьимиеги, ИсхӀакъиеги, Якъубиеги кьезе бугин абун Дун гьедараб ракь! Щайгурелъул гьел ракӀ-ракӀалъ Дида хадур рилълъинчӀо. 12ГӀицӀго кенизияв Ефуннил вас Халевги Нунил вас Егьошуаги ракӀ-ракӀалъ Дир амруялда нахъ рилълъана“, – ян. 13ГӀизраилазда бахъараб ццидаца БЕТӀЕРГЬАНАС кӀикъого соналъ авлахъалда свердизе тӀамуна халкъ, БЕТӀЕРГЬАНАСДА рихаралщинал жал гьарураб гӀел тӀубанго тӀагӀинегӀан.
14Гьанже нужецаги нужер умумузго гьабураб гьабулеб буго! Мунагь-хӀакъалъул агьлу, нужее цӀидасан ГӀизраилил халкъалде БЕТӀЕРГЬАНАСУЛ ццин бачине къваригӀунищ бугеб? 15БЕТӀЕРГЬАНАСЕ нуж мутӀигӀлъичӀони, Гьес гьаб халкъ нахъеги тезе буго салул авлахъалда, ва нуж сабаблъун тӀолабго халкъги хвезе буго!»
16Мусада аскӀорегӀанги рачӀун гьез абуна:
«Нижеца гьанир нижер боцӀуе ручналги хъизан-лъималазе шагьаралги рала, 17цинги ниж, борчун ярагъгун гӀизраилазул тӀоцересел кьераздаги чӀун, гьел гьезул ракьалде щвезаризе рилълъина. Гьеб заманалда нижер хъизан-лъимал сверун къарал шагьаразда рукӀина, гьаб ракьалъул гӀадамаздасаги цӀуна-къан. 18ГӀизраилазул щивасе жиндирго ракьалъул бутӀа щвезегӀан ниж рокъоре тӀадруссинаро. 19Иордан гӀурул доб рахъалда ракьалъул бутӀаги босиларо нижеца, щайгурелъул нижер бутӀа гьаниб, Иорданалъул бакъбаккул рахъалда букӀине бугелъул».
20Мусаца гьезда абуна:
«Нужеца гьедин гьабуни, БЕТӀЕРГЬАНАСЕ гӀоло рагъизе ярагъги борчани, 21ярагъ борчарав щивав чи БЕТӀЕРГЬАНАСДА цеве Иордан гӀор тун довехунги вилълъани, тушбабазухъа бахъараб 22гьеб ракь БЕТӀЕРГЬАНАСЕ мукӀурлъун хадуб гурони нуж рокъореги тӀадруссинчӀони, гьебмехалда нужеца БЕТӀЕРГЬАНАСДА ва ГӀизраилил халкъалда цебе нужерго налъи тӀубазабила. Цинги гьаб ракь нужее БЕТӀЕРГЬАНАСУХЪА щвараб даимаб мулклъун букӀина.
23Амма нужеца гьедин гьабичӀони, нуж БЕТӀЕРГЬАНАСДА цере мунагьалъукье ккезе руго. Гьебмехалъ нужеда лъан букӀа: мунагьалъухъ букӀунеб жазаялдаса рорчӀизе бакӀ нужее гьечӀо. 24Рай нужерго хъизан-лъималазе шагьаралги боцӀуе ручналги ва нужецаго кьураб рагӀиги ккве».
25Гадилги Рувимилги наслабаз Мусада абуна:
«Ниж руго дур лагъзал. Дуца малъухъе гьабила нижеца. 26Нижер хъизан-лъималги гӀи-боцӀул рехъабиги гьанир тела, ГилгӀадалъул шагьаразда. 27Амма ниж, дур лагъзал, ай рагъуе ярагъ борчарал киналго, БЕТӀЕРГЬАНАСУЛ амру тӀубан, гӀурул доб цояб рахъалда рагъизе рилълъина, дуца малъухъе».
28Гьебмехалда Мусаца кашиш Элеазаридеги, Нунил вас Егьошуадеги, ГӀизраилил халкъалъул кӀудияздеги 29гьадинаб амру гьабуна:
«Гадилги Рувимилги къавмазул ярагъ борчаралщинал бихьинал БЕТӀЕРГЬАНАСЕ мутӀигӀго нужеда цадахъ рагъизе Иордан бахун дорехун рилълъани, гьеб ракь нужеца кверде босун хадуб, гьезие мулклъун кье гьаб ГилгӀадалъул ракь. 30Нагагь гьел, борчун ярагъгун нужеда цадахъ рилълъинчӀони, гьезул ракьалъул бутӀаби рукӀине руго нужеразда аскӀор Ханааналда».
31Гадилги Рувимилги наслабаз жаваб кьуна:
«Ниж руго дур лагъзал. Нижеца БЕТӀЕРГЬАНАСУЛ амруялда рекъон гьабила кинабго. 32Нижеца борчун ярагъгун гӀор бахина ва БЕТӀЕРГЬАНАСДА цере Ханааналде рилълъина, амма биччанте нижер мулклъун букӀине Иорданалъул гьаб рахъалда бугеб ракь».
33Гьебмехалда Гадилги Рувимилги наслабазеги Юсупил вас Манассил бащдаб къавмалъеги Мусаца кьуна амориязул Сихон пачаясул букӀараб улкаги Башаналъул Ог пачаясул букӀараб улкаги – гьезул киналго ракьал, цадахъ тӀолалго шагьаралгун ва шагьаразул сверухълъабигун.
34Гадил наслабаз цӀидасан рана Дивон, Атарот, АрогӀер, 35Атерот-Шофан, Язер, Ягбогьа, 36Бет-Нимра ва Бет-Гьаран абурал сверун къарал шагьаралги боцӀи гъезе ручналги. 37Рувимил наслабаз цӀидасан рана Хешбон, Элеале, Кирятайим, 38Нево ва БагӀал-Меон (гьез гьезул цӀарал хисизаруна) ва Сивма абурал шагьарал. ЦӀидасан рарал шагьаразе гьез батӀиял цӀарал кьуна.
39Манассил вас Махирил наслабаз ГилгӀадалде гьужум гьабуна, ва гьенир рукӀарал амориялги нахъе къотӀун, гьенир чӀана. 40Мусаца ГилгӀад кьуна Манассил вас Махирил наслабазе ва гьел гьенир рещтӀана. 41Манассилго къавмалдаса Яирица гьенир сверухълъиялда рукӀарал росаби рахъана ва гьезда «Яирил Росаби» абураб цӀар лъуна. 42Новахица Кенатги, гьелда сверухъ рукӀарал росабиги рахъана ва гьезда жиндирго цӀар лъуна – Новах абун.
Tällä hetkellä valittuna:
Тархал 32: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023