Тархал 31
31
Мидяниязулгун рагъ гьаби
1БЕТӀЕРГЬАНАС Мусада абуна:
2«ГӀизраилазе гьабураб квешлъиялъухъ рецӀел босе мидянияздаса. Хадув мун хвела ва дурго умумузухъе ина».
3Мусаца гӀизраилазда абуна:
«Рагъухъаби чабхъад рахъине къачӀай, мидяниязда данде рагъ гьабизе ва, БЕТӀЕРГЬАНАСУЛ амруялда рекъон, гьездаса рецӀел босизе. 4ГӀизраилазул щибаб къавмалдаса аза-азар рагъухъан чабхъад вахъине ккола», – ян.
5ТӀолалго гӀизраилазда гьоркьоса вищана 12 000 рагъухъан – щибаб къавмалдаса аза-азар чи. 6Мусаца гьел рагъде ритӀана – щибаб къавмалдаса аза-азар рагъухъан – ва мукъадасаб рукъалъул цӀарагӀгун, пулаго гӀарцул суралгун, гьезда цадахъ витӀана кашиш Элеазарил вас Пинхасги.
7Мидяниязда данде рагъги гьабун, БЕТӀЕРГЬАНАС Мусаде гьабураб амруялда рекъон, гӀизраилаз гьезул киналго бихьинал чӀвана. 8Гьезда цадахъ Мидяналъул щуявго ханги чӀвана: Эвиги, Рекемги, Цурги, ХӀурги, Реваги; гьединго Беорил вас БилгӀамги хвалчаца чӀвана. 9ГӀизраилаз Мидяналъул руччабиги лъималги асирлъуде рачана ва гьезул кинабго боцӀиги, гӀиял рехъабиги, тӀолабго мулкги жидеего давлалъун босана; 10гьезул шагьаралгун росабиян абуни, цӀаги гъун рухӀана. 11Кинабго давлагун, ай гӀадамалги боцӀи-рикъзиги цадахъги босун, 12гьел тӀадруссана Ерихон шагьаралда дандбитӀараб Иордан гӀурул рагӀалда МогӀавалъул гӀатӀиракьалда халкъ рещтӀараб бакӀалде, ва асиралги тӀолабго давлаги щвезабуна Мусахъеги, кашиш Элеазарихъеги, гӀизраилазул жамагӀаталъухъеги.
13Мусаги, кашиш Элеазарги, халкъазул бутӀрулги гьезда данде рилълъана. 14Цинги Мусал кутакалда ццин бахъана рагъдаса руссун рачӀунел рагъул церехъабазда – азарил ва нусил бутӀрузда.
15«Нужеца руччаби чӀагойищ тарал? – ин кӀалгьикъана Мусаца гьезда. 16– Гьел руччабаз гурищ, БилгӀамил малъа-хъваялда нахъги рилълъун, гӀизраилал БЕТӀЕРГЬАНАСЕ хилиплъизе тӀамурал? Пеоралда рукӀаго БЕТӀЕРГЬАНАСУЛ халкъалда тӀаде квешаб унтиги гьел сабаблъун гурищ биччараб? 17ЧӀвай гьабсагӀаталда киналго бихьинлъималги, бихьиналгун рукӀарал киналго руччабиги! 18Бихьинчи хъвачӀел ясал чӀаго те нужеего.
19Хадуб нуж анкьго къоялъ къайи чӀвараб бакӀалдаса къватӀирехун чӀа. Чи чӀварав яги жаназаялда хъварав щивав чияс, нужеда гьоркьоса вукӀаниги, асиразда гьоркьоса вукӀаниги, лъабабилебги анкьабилебги къоялъ рацӀцӀалъиялъул низам тӀобитӀизе ккола. 20Кинабго ретӀелги бацӀцӀад гьабизе ккола – къохьолги, цӀцӀел квасулги, цӀулалги гьабураб щибаб жо».
21Кашиш Элеазарица рагъда рукӀарал рагъухъабазда абуна:
«Гьале БЕТӀЕРГЬАНАС Мусаде гьабураб амруялдалъун чӀезабураб къанун: 22меседги, гӀарацги, мазгарги, маххги, гъалайги, тӀухьиги, 23цӀаялъ бухӀуларебщинаб кинабго жоги цӀадулъан биччазе ккола. Цинги гьеб бацӀцӀадаблъун лъугьуна, амма гьел рацӀцӀалъиялъул лъецаги чуризе ккола. ЦӀа рекӀунебщинаб жойин абуни, гӀицӀго рацӀцӀалъиялъул лъеца чуризе ккола. 24Анкьабилеб къоялда нужерго партал чуре ва гьебмехалда нуж рацӀцӀалъила. Гьелдаса хадуб нуж халкъалда гьоркьоре рачӀине бегьула».
Давла бикьи
25БЕТӀЕРГЬАНАС Мусада абуна:
26«Кашиш Элеазаргун ва тухумазул кӀудиялгун цадахъ асиралги боцӀиги рикӀкӀе, 27ва рагъда рукӀарал рагъухъабаздаги хутӀараб халкъалдаги гьоркьоб гьеб кинабго давлаги бащад бикье. 28Чабхъад ун рукӀаразул бутӀаялдаса БЕТӀЕРГЬАНАСЕ магъало бакӀаре: щивав щунусго асирасдаса цо-цо чи, гӀи-боцӀул ва хӀамузул щибаб щунусго жоялдасаги – цо-цо бетӀер. 29Гьеб бутӀа бахъе рагъухъабазул бутӀаялдаса ва кашиш Элеазарие кье, БЕТӀЕРГЬАНАСУЛ бутӀа хӀисабалда. 30ХутӀарал гӀизраилазе кколеб бутӀаялдаса бахъе: кӀикъоялда анцӀ-анцӀ асирасдасаги, хӀайваналдасаги, хӀамидасаги, гӀиялъажоялдасаги цо-цо бетӀер. Гьеб кинабго кье БЕТӀЕРГЬАНАСУЛ Мукъадасаб Чадиралъул тӀалаб-агъазалда рукӀунел левитазе».
31Мусацаги кашиш Элеазарицаги кинабго гьабуна БЕТӀЕРГЬАНАС Мусаде гьабураб амруялда рекъон.
32Рагъухъабазе давлалъун щвана кинабниги: 675 000 гӀиялъажо, 3372 000 хӀайван, 3461 000 хӀама 35ва жеги бихьинчи хъвачӀей 32 000 ясгӀадан.
36Рагъул гӀахьалчагӀазул бутӀалъун ккана:
337 500 гӀиялъажо, 37гьелдаса БЕТӀЕРГЬАНАСУЛ бутӀалъун ккана 675 бетӀер;
3836 000 хӀайван, гьездаса 72 бетӀер – БЕТӀЕРГЬАНАСУЛ бутӀа;
3930 000 хӀама, гьездаса 61 бетӀер – БЕТӀЕРГЬАНАСУЛ бутӀа;
4016 000 асир, гьездаса 32 чи – БЕТӀЕРГЬАНАСУЛ бутӀа.
41Мусаца БЕТӀЕРГЬАНАСУЛ бутӀа кашиш Элеазарие кьуна, БЕТӀЕРГЬАНАС Мусаде гьабураб амруялда рекъон.
42Рагъухъабазул давлаялдаса батӀа гьабун, Мусаца хутӀарал гӀизраилазе кьураб бутӀа 43(жамагӀаталъул бутӀа): 337 500 гӀиялъажо, 4436 000 хӀайван, 4530 500 хӀама 46ва 16 000 асир. 47ГӀизраилазул бутӀаялдаса Мусаца босана: кӀикъоялда анцӀ-анцӀ асирасдаса цо-цо асир, гьединго гӀи-боцӀудасаги. Ва гьел киналго кьуна БЕТӀЕРГЬАНАСУЛ Мукъадасаб Чадиралъул тӀалаб-агъазалда рукӀунел левитазе, БЕТӀЕРГЬАНАСУЛ амруялда рекъон.
48Рагъухъабазул бутӀрулги, азарил ва нусил бутӀрулги рачӀана Мусахъе, 49ва гьез абуна:
«Нижеца, дур лагъзадерица нижер нухмалъиялда гъоркь ругел рагъухъаби рикӀкӀана, ва гьезул цонигияв тӀаса камун ватичӀо. 50Гьале нижеца, нижер гӀумруялъухъ хӀакъ хӀисабалда, БЕТӀЕРГЬАНАСЕ кьолеб буго нижер щивасе давлалъун щвараб месед: гъуждузда ралел рухьаби, курхьаби, баргъичал, кӀилкӀал ва жавгьаразул цӀалал».
51Мусацаги кашиш Элеазарицаги гьезухъа гьел киналго меседил тӀагӀелал къабул гьаруна. 52Рагъул церехъабаз бачӀараб ва Мусацаги Элеазарицаги БЕТӀЕРГЬАНАСЕ гӀоло садакъа гьабураб меседалда кинабниги букӀана 16 750 шекел#31:52 ГӀага-шагарго 184,250 кило.. 53(Рагъухъабазе щвараб хутӀараб давла гьезие тана). 54Мусаца ва кашиш Элеазарица рагъул бутӀрузухъаги, азарил ва нусил бутӀрузухъаги къабул гьабураб месед ДандчӀваялъул Чадиралъуб БЕТӀЕРГЬАНАСДА цебе лъуна, гӀизраилал кидаго Гьесда цере рукӀиналъул гӀаламат хӀисабалда.
Tällä hetkellä valittuna:
Тархал 31: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023