Matié 2
2
Kalang ga nadurong saga a toiné ’erga solé Jésu
1Ké wo Jésu a Bétlehém duro gulong go gumu go a ca gesong ga Judé a duro saman do kelma Hérod toi. Kardené kalang ga nadurong ga solé désiddiyong saga a toiné ’erga Jorsalem. 2Ké ’enger wa: Kurong go ké ba woi go da ddi termala do Juib togé lé, wa andi ga? Cawa ni sela désiddin doi a toiné, ni ’erga ca melauoi.
3Kiddin ga kelma Hérod ba jé kual lé na, ddi sol kogero dang kalang ga Jorsalem mam bu’. 4Ddi yau ga tibé Kumu gemdong gagé mam, dang ga gelé kalang so go Kumu koi, ddi ’engergé wa: Kiddin ga ka wo Krist kené la andi ga? 5Ké jogu yei wa: Ké woia a Bétlehém, a gulong go gumu go a ca gesong ga Judé, cawa go cogelé kebu go Kumu koi pasua main kain:
6Mé Bétlehém do ca gesong ga Judé,
A duro gulong go gumu go a ca gesong ga Judé na,
Ma go wusin ’eno,
Cawa kelma go pena da andong a gusé,
Ddia jom go magé kalang gang ga Israél.
7Kardené Hérod té kalang ga nadurong lé wasuai jang, ddi ’engergé dang angal ca kiddin ga désiddin lé ba andegeng kené. 8Kardené ddi gigé ’yé Bétlehém, ddi yégé wa: ’Erageng dara kurong lang duro, kiddin ga kenga waii na, kang ’erang yang ca ’enung kau oré melauoi.
9Kiddin ga ké ba jé kelma kual goi lé na, ké sai ’yé, ké sol désiddin do ké ba selga a toiné lé, to ’yé tumoigé bera to ’yé ’eré dang a kiddin ga kurong go wusin lé wo kené. 10Kiddin ga ké ba sol désiddin lé dang ’eré na, gusugé mowegé bbani ’eno. 11Ké andong gulong, ké sol kurong go wisin lé kuaba ’yoi Maram, ké poi gomdigé tumoi dugo, ké melaui, kardené ké hangu mageliyong gagé, ké bi lugunya dang kajaju ga daua tuna dang jamsinda. 12Kardené Kumu bigé solé a duro soné ca kandia jogé gusu Hérod ’eno. Ké ai giyong go ddang ca jogé tagé.
Ké ger ’yé ca gesong ga Ejibté
13Kiddin ga kalang ga nadurong lé ba sai ca jogé inji na, kangito go Bagulong koi gel gusi cin Josép duro soné, ddi yei wa: Sa, ji ai kurong lé kang ’yoi, keng ger ’era ca gesong ga Ejibté, jimageng kené bera ’enunga go yogeng ca keng jigang dé, cawa Hérod wa daré kurong lé ca deddei.
14Josép sai, ddi ai kurong lé kang ’yoi, ddi ’yang nagé Ejibté dang soindo. 15Ddi jom kené bera kiddin ga Hérod ma ba’. Henga lé la ca ser to kual go Bagulong ba yé a kebu go cogelé kebu go Kumu koi, ddi yé wa: ’Enung tega Kurandang a Ejibté dong.
Deddé go karang kogé
16Kiddin ga Hérod ba sol ca kalang ga nadurong babia babé na, ddi lé mainyé bbani ’eno. Ddi gi ca kandia deddu karang ga bainyong mam ga a Bétlehém bua, dang gulong go lura bu’. Ddi deddu karang ga bainyong ga ba bbal main ddegelé sua kain bua, dang ga ba bbal ddegelé sua ’eno bu’. Ddi gesé ca wolé go ddi ba jé kual go désiddin koa a kebu kalang ga nadurong kerab. 17Henga lé ser to kual go Jérémi go cogelé kebu go Kumu koi ba yé waldong wang, ddi yé wa:
18Ké jé ’elé a Rama,
Ké ’elé nain dang tubu do cindegé,
Rasél wa ’elé ca karndo,
To kain cobé cong cawa karndo ma.
Ké sai a Ejibté jogé tai
19Kiddin ga Hérod ba ma na, kangito go Bagulong koi gel gusi cin Josép duro soné a Ejibté. 20Ddi yei wa: Ji sa aia kurong lé kang ’yoi, ji jigang nagé ca gesong ga Israél, cawa ké ga ba dar ca deddé kurong lé na, ké ma. 21Na ca ma Josép sai ai kurong lé kang ’yoi, ké jogu ’yé ca gesong ga Israél. 22Ama kiddin ga ddi ba jé na Arsélau na ddo termala a Judé baimé Hérod na, ddi lé muro, ddi ’era ca gesong lé ’eno. Kiddin ga ddi ba jé kual duro soné na, ddi sai ’yé ca gesong ga Galali. 23Ddi ’yé jomé duro gulong go gumu go ké ba tei Nasarat. Henga lé la ca ser to kual go go cogelé kebu go Kumu koi ba yé: Ké teia go Nasarat.
Tällä hetkellä valittuna:
Matié 2: TNG1978
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Alliance biblique universelle (United Bible Societies) 1978.