MATEU 2
2
Bame-ngëme ban pëni biki uleka umay-unu
1Bi Yeesu bëka bi di Betëleem tsi pëboos Judeeya, tsi uwal wi Eroodis ro wi ci nasien, a bame-ngëme pëni uleka umay-unu, a ba baandi Jerusalem. 2A ba yepar aja: “Nasien Bajudeu na ndu buka, aci tsum-i? Wund awin upesajul di umay-unu, a wund bi pëbëndanul.” 3Bi Eroodis, nasien, te bi irim yan a na lënk, a bañaan Jerusalem lënkand bëlieng. 4A na júkëlën bawiak-bajakan, ni bapican-ulua bañaan-ucaak, a na yepar bukul tsi Këristu ka tsi pëbukëna. 5A ba yankul aja: “Di Betëleem Judeeya. Par ko wi, wi nayëlia pican wun, aja: 6#Mik 5.1‘A wi Betëleem tsi pëboos Juda! Cits pëjaa ne m pe ank këpe pëtiesës tsi iraasa iwiak tsi Juda; par tsi wi tsi nasien kë pënëni tsun, nuu yafan Israel, bañaan nji.’” 7Din a Eroodis rui bame-ngëme, te ñaan meets; a na ja bukul ba leentsul tsi ko un jënts wi, uwal wi upesaj cili wi. 8A na yël bukul Betëleem; aja bukul: “Nda tsëpan ndii yepar tsi ko un jënts wi, uleka napäts. Nda yaa nda winul, ndë leentsin; nji buts ka tsëp kee jintëlaul.” 9Bi ba ba bi pëcikëndën nasien, a ba pën pëtsëp. Din a ba win upesaj wi ba ro wunk win di uleka umay-unu kë tsëp tsi bërun bukul, aa u bi ee nats tsi ruets tsëko tsi napäts ciina tsi. 10Bi ba win bi upesaj, a ba cum ni ulílan uwiak. 11A ba niaj kato, a ba win napäts ni aninul Maaria; a ba yër ajintëlaul. Din a ba pënani bëka bukul, a ba wëlul ngëko bëtseend: uwëru, ni ucuraay, ni ulicar wi kanjaka wi #2.11 Miira: Aci pëñaak mlon mko, pi kandola pi ulicar, a puu roa bëko bucuunkanaani mmaak mcumal miira. 12A bi bee car aleentsa tsi utsaafi ne bukul tsë witsa di Eroodis, a ba yaana bëlon bëga awitsa ucaak bukul.
Juse ni Maaria túk atsëp Ejipët
13Bi ba pën bi tsëp, a u ka uwaanju Ajug un cili wi tsi Juse tsi utsaafi, a u jaul: “Natsaan, kë pënand napäts ni aninul, kë túk ka tsëp Ejipët. Ciindul aa ka n ñakanaanu, par Eroodis yecis ink pëtsas napäts na fiŋ.” 14A Juse natsa, a na jej napäts ni aninul, bërëm, a na kikara Ejipët. 15#Ose 11.1A na ci rul aa Eroodis bi cäts; a umënts wan piban ne wël wi Ajug ro wun ja nayëlia na ja; iink di na ja run: “Mandui abuk nji na pëni di Ejipët.” 16Bi Eroodis win bi bame-ngëme riatul këriat, a na riabats mak. A na tsu upäts uyënts ba fiŋa di Betëleem ni tsi ulai dul bëlieng, pëkur-ni tsi ban ka biki ngëwaanu ngëtëb pëwëlee utsia; ajaakëni tsi ko wi bame-ngëme jaul wi tsi uleka uwal wi upesaj cili wi. 17Din, a u ci bi Jeremias nayëlia ro bi leents, aja: 18#Jer 31.15“Përim atea di Rama; aci irug ni ikaan puum iwiak; Rakel ka kaandar un upätsul, a ŋalats përaaca, par bu katse wam.”
Juse ni Maaria bë pëni di Ejipët pëtsíisi Nasaret
19Bi Eroodis cäts bi, a u ka uwaanju Ajug un cili wi tsi Juse tsi utsaafi, di Ejipët; 20a u jaul: “Natsaan, kë pënand napäts ni aninul ndë witsa ucaak Israel. Par, bando biki ka tsas pëfiŋ napäts, bu cäts.” 21A Juse natsa; a na pënand napäts ni aninul awitsa ucaak Israel. 22Maa, bi na te bi u jaka Arkelaus ruka un sien Judeeya tsi pëlas asinul Eroodis, a na lal pëtsëp rul. A tsi utsaafi, a Nasien-batsi car apibanul, din a na kikara kajara Galileeya. 23#Mar 1.24; Lúk 2.39; Joŋ 1.45Ubandul, a na ciina përaasa pi kanjaka pi Nasaret, pa u ci ko wi bayëlia ro wi ja; iink di ba ja run: “Kee ru jaka, ‘Kanpënë-ni-nasaret.’”
Tällä hetkellä valittuna:
MATEU 2: KPKNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Le Nouveau Testament en langue Manjaku © Alliance Biblique du Sénégal, 2020.