मत्ती 18
18
स्वर्गेरै राज्य मझ बड़ा केणु?
1तेसै टैंमा चैलै यीशु किनि अईछी करि पुछणा लगै, कि “स्वर्गेरै राज्य मझ बडा केणु आ?” 2तेत पन यीशु अक छोकरू शदा करि तेन्हैरै बिच खड़ु कियु। 3जां बौलु, “आंउ तुहां सिंउ सच बोलता, कि ज्यो-तेईनी तुवे अपड़ै आपा बदली करि ऐस बच्चै सैयि ना बणि गाहलै त्यो-तेईनी तुवे स्वर्गेरै राज्य मझ ना पुजि सकतै। 4ऐठणीरै तेईनी जै कौ अपड़ै आपनि ऐस बच्चै सैयि हल्का बंणाला सैहै स्वर्गेरै राज्य मझ सभनियांं बडा भूंणा। 5जां जै कौ मिंडै नाँईयें ला एकि ऐतियै बच्चै ग्रहण काता, सै मूं बि ग्रहण काता।”
पाप कांनेरी परीक्षाई
(मरकुस. 9:42-48; लूका 17:1-2)
6“पण जै कौ ऐन्हां हल्का मझांं जै मूं पन विश्वास कातै एकि बि पाप कांना पन मजबूर करिया, ता तेसेरै तेईनी ऐ छै भूंणु कि अक भारी घौड़ तेसेरै गआ मझ बंन्ही करि मरनेरै तेईनी समुन्द्रा मझ सुट्टी दियो। 7ठौकरा केरै कारण संसारा पन हाय! ठौकर लगणी जरूरी आ, पण हाय! तैस मैहणु पन जेसेरै कारण ठौकर लगती। 8अगर तिंडा हत्थ या तिंडा पैयिड़ ताउनि पाप कांननी मजबूर करिया, ता तैस बढि करि सुटि दै, केईनी कि स्वर्गा मझ बिना हत्थै पैयिड़ै अनन्त जीवना मझ गांहणु तिंडै तेईनी भलु आ, केईनी कि दो हत्थ दो पैयिड़ होते हुऐ बि तु नर्केरी अनन्त आगी मझ सुटियूंणा। 9जां अगर तिंडु टीर ताउंनि पाप कांननी मजबूर करिया, ता तैन्हांं पापा कांना छडि दै! केईनी कि अनन्त जीवना मझ गांहणैरै तेईनी ऐक्यु तिंडै तेईनी भलु आ कि दुवां टीरा संन्थै तु नरकेरी आगी मझ ना सुटणा पुईया।”
हराउरी भ्रैडैरा उदाहरण
(लूका 15:3-7)
10ऐठणीरै तेईनी तका, तुवे मिंडै ऐन्हां मासूम चैला मझां कोस बि घटिया मेईं समझतै; आंउ तुहांनि शुणाता कि तेन्हैरी रक्षा कांने बाऐ स्वर्गदूत हर-टैंमा मिंडै पिताऐरै सांमणै हाजिर रींहथै। 11केईनी कि आंउ मैहणुरा पुत्र हराउरा मैहणुवां बचाणेरै तेईनी यौउरा। 12तुवे कितु समझतै अत्तै, अगर कोसक्यै मैहणुरी शाउ भ्रैडै भुईया, जां तेत मझां अक हरा गहिया, ता क्या तैस होरी नाड़ेनुवें भ्रैडै बाड़ा मझ छडि करि तैस तौपणा ना गांहणु? 13जां अगर ऐहीं भुईया कि तैस सै मेईं गांहथी, ता आंउ तुहां सिंउ सच बोलता कि, सैक्या तैन्हांं नाड़ेनुवें भ्रैडा केरै तेईनी यौउता खुश ना भूंणा जै बाड़ा मझ थी, ज्योता खुश सै ऐसै हराउरी भ्रैडैरे तेईनी भूंणा। 14ऐहियें तुवाड़ै पिताऐरी जै स्वर्गा मझ आ, तेसैरी ईच्छा आ कि ऐन्हां मासूम चैला मझां अक बि नाश ना भुईया।
अपराधिया केरै प्रति व्यवहार
(लूका 17:3)
15अगर तिंडा विश्वासी साथी तिंडै विरूद्ध पाप काता, ता तु गहि करि तैस सिंउ अकेलै मझ गल करि तेसनी तेसैरा पाप शुणा, अगर सै तिंडि शुणि लिया जां पछतावा करिया, समझ कि तीं सैक्या परमेश्वरा किनि वापस लै अंणा। 16“पण अगर सै तिंडि गल ना शुणिया ता, एकि या दुवां मैहणुवां ऐपु सेईतै लै गा, केईनी कि मूसेरी व्यवस्थायरै अनुसार हर-अक गल दो या त्रियां उगाहिया केरै सांमणै साबित भूंणी चेहिंथी।” 17अगर सै तेन्हैरी बि ना शुणिया ता, विश्वासिया मैहणुवां सिंउ बोल, पण अगर सै कलीसिया केरै मैहणुवां केरी बि ना शुणिया ता फिरी तु तैस सिंउ तेतिया व्यवहार कर, जेतिया तुवे होरनियां जातिया या चुंगी लींणारा सिंउ कातै।
रौकणा जां मौका दींणा
18“आंउ तुहां सिंउ सच बोलता कि जै किछ धरती पन तुहां किठु कांनु सै स्वर्गा मझ बि किठु भूंणु, जां जै किछ तुवे धरती पन मैहणुवंनी कानेंरी अनुमति दैलै तैस कांनेरी अनुमति परमेश्वरा बि दींणी। 19आंउ तुहांनि दुबारे याद करांता कि अगर तुहां मझियें दो मैहणु धरती पन कोस्केरी परेशानि दूर कांनेरै तेईनी अक मंन भौ करि विनती करिया ता मिंडै पिता परमेश्वरा जै स्वर्गा मझ बेठौरा सै समस्या दूर कांनी। 20केईनी कि जेठि दो या त्रा जंणै मिंडै चैलै भूंणेरै नातै परमेश्वरा किना मजतिरै तेईनी प्रार्थना कांननी किट्ठै भूंतै, तैठि आंउ तेन्हैरी मजत कांनेरै तेईनी तेन्हैरै बिच मौजूद भूंता।”
निर्दायि सेवकैरा उदाहरण
21तां पतरसै नीड़ अईछी करि, यीशु सिंउ बौलु, “हे प्रभु! अगर मिंडा विश्वासी साथी पाप काता रिहा, ता आंउ केथरी बारी तेसनी माफ करूं, क्या सै सत्त बारी बि पाप करिया तां बि?” 22यीशु तेसनी बौलु, सत्त बारीऐ ना पण आंउ ताउनि शुणाता कि तु हर बारी तेसनी माफ करि दै। 23आंउ तुहांनि ऐ बोलता आ कि स्वर्गेरै राज्यरी तुलना तैस राजै सिंउ करि सकतै जेनि अपड़ै दासा किना हिसाब-किताब चुकता कांनेरी सोचोरी थी। 24जेख्णी तेनी हिसाब लींणा शुरू केया ता तेसेरै सांमणै अक ऐतिया मैहणु अंणा जैस पन बड़ा जादा कर्जा थ्या। 25जैस सै कदि कटा ना सकींथ्या तां तेसेरै मालकै बौलु, कि ऐ जां ऐसेरी लाड़ी जां बाल-बच्चै जां जै किछ ऐस किनि आ सारू बैचि करि ऐसेरा कर्जा कटा दिया। 26फिरी तेसैरा दास तेसेरै पैयिड़ा पन पैयि करि रूंणा लगा जां बौलु, हे मालिक! थोड़ी तेयि तस्सली रख, आंउ तिंडा अक-अक पेईंसा भरी दैला। 27ऐत पन तैस मालका तैस दासा पन दया चलि यैई, तेनी तेसैरा कर्जा माफ करि-करि सै छडि दित्ता।
28फिरी जेख्णी सै दास भेईर निकोत्था, ता तेसनी अक तेसैरा साथी दास मैआ जैस तेसेरै कुछ पेईंसै दींणै थ्यै तेनी सै गआ किना पकड़ा जां तेसैरू गअ दबा करि बौलु, मिंडा कर्जा मूंनी वापस कर। 29ऐत पन तेसैरा साउगी दास तेसेरै पैयिड़ा पन पैई करि तैस सिंउ विनती कांना लगा कि, तस्सली रख, आंउ तिंडा अक-अक पेईंसा भरी दैला। 30तेनी ना मनि, पण गहि करि सै जैल्ही मझ सुटि दिता। कि ज्यो-तेईनी सै कर्ज चुका ना दींता सै तैठिऐ रिय्हा। 31तेसेरै साउगी दास ऐ तका करि बड़ै उदास भुवै, जां गहि करि तैन्हैं अपड़ै मालकानि सारा हाल शुणां दिता। 32तां तेसेरै मालकै तैस शदा करि तैस सिंउ बौलु, हे दुष्ट दास! तीं जै मूं सिंउ विनती की, ता मीं ता तिंडा सारा कर्जा माफ करि दित्ता। 33ऐठणीरै तेईनी जिहीं मीं तांउ पन दया केईथी, क्या तिहियें ताउ बि अपड़ै सउगि दासा पन दया ना कांनी चेहिंथी थी? 34जां तेसेरै मालकै गुस्सै मझ अईछी करि, सैक्या दण्ड दींणै बाऐ केरै हवालै करि दिता, कि ज्यो तेईनी सारा कर्जा भरी ना दिया, त्यो-तेईनी ऐस छडतै मेईं। 35“ऐहियें-चारै अगर तुहां मझियां कोई बि अपड़ै साथी विश्वासी भाईनी माफ ना करैला, ता मिंडा पिता जै स्वर्गा मझ आ, तैस बि तुहांनि माफ ना कांनु।”
Tällä hetkellä valittuna:
मत्ती 18: CDJNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
