यूहन्ना 19
19
येशूह क्रूसम टङ्गैना आज्ञा
मत्ती २७:१५-३१; मर्कूस १५:६-२०; लूका २३:१३-२५
1पिलातस येशूह लैजाक कोर्रा लगैना हुकुम देल। 2सिपाहीहुँक्र काँटक मुकुट बनाक उहाँक कपारिम लगादेल, ओ उहाँह राजक लगैनाअस बैजङ्ग्यार रङ्गक लुगा लगादेल। 3हुँक्र उहाँक लग्घ आक “यहूदीन्हक राजक जय ह्वाए!” कैक गिल्ला कर्टी उहाँह थाप्पर लगैल।
4पिलातस फेदोस्र बाहर निक्रल ओ भीडक मैनन कल, “हेरो, मै हिँकहीन टुन्हक सामुन्नेम आनटुँ, ओ टुँहन जानकारी कराइ चाहटुँ, कि मै हिँकाहारम कुछु दोष नैभेटैनु।” 5तब काँटक मुकुट ओ बैजङ्ग्यार रङ्गक लुगा लगाइल येशू बाहर अइल, त पिलातस हुँकन कल, “लेओ हेरो, यिह हो मनैया!”
6जब मुख्य पूजारीहुँक्र ओ द्वरपालेन उहाँह देख्ल, हुँक्र कर्रसे कहलग्ल, “ओहीह क्रूसम टङ्गाई, ओहीह क्रूसम टङ्गाई!” पिलातस हुँकन कल, “टुह्र अपन्हे यहीह लैजाक क्रूसम टाङ्गो, काकरकि मै हिँकाहारम कुछु दोष नैभेटैनु!”
7यहूदी अगुवाहुँक्र हुँकहीन कल, “हमार व्यवस्था अनुसार ओहीह मृत्युदण्ड देहहीपर्ठा, काकरकि ऊ मै परमेश्वरक छावा हुइटुँ कैक दाबी कैराखल।”
8यी बात सुन्क पिलातस झन् डरागैल। 9ऊ फेदोस्र येशूह दरबारभित्तर लैजाक पुछ्ल, “टुँ कहाँक हुइटो?” तर येशू हुँकहीन कुछु जवाफ नैदेल। 10पिलातस उहाँह कल, “काजे टुँ नैकहठुइटो? टुँहीन छोड्देना अधिकार म्वारठे बा, ओ टुँहीन क्रूसम टङ्गैना अधिकार फे म्वारठे बा कना टुँहीन थाहाँ नैहो?”
11येशू कल, “यदि परमेश्वर अप्नह अधिकार नैदेट कलसे, म्वारम अप्नक कुछु अधिकार नैहुइनेरह। उहओर्से महीह अप्नक हाँठम सुम्पना मनैया झन् बरा पापक दोषी बा।”
12यी सुन्क पिलातस येशूह छोड्देना कोसिस कर्ल। तर यहूदीहुँक्र कर्रसे कहलग्ल, “यदि अप्न यी मनैयह छोर्बी कलसे, अप्न रोमी महाराजक सङ्घारी नैहुइटी। अपन्हेह राजा हुइटुँ कना मनैया महाराजक दुश्मन हो।”
13यी बात सुन्क पिलातस येशूह दरबारमसे बाहर अन्ल। ऊ न्याय कर्ना ठाउँम बैठ्ल। उ ठाउँह “पत्थ्रक अङ्ना” कैजाए। ओहीह हिब्रू भाषम “गब्बथा” कैजैठा। 14उ ब्याला मुक्ति-दिवस टिहारक आघक दिन रह ओ दिनक लगभग बाह्र बजल रह। पिलातस यहूदीहुँकन कल, “हेरो, यिह हो टुन्हक राजा!”
15हुँक्र जोर-जोरले नारा लगाइलग्ल, “ओहीह मुवैहीपरी, मुवैहीपरी! ओहीह क्रूसम टङ्गैहीपरी, टङ्गैहीपरी!” पिलातस हुँकन पुछ्ल, “का मै टुन्हक राजह क्रूसम टङ्गादिउँ?”
मुख्य पूजारीहुँक्र जवाफ देल, “रोमी महाराजा बाहेक हमार और कौनो राजा नैहुइट।” 16तबदोस्र ऊ उहाँह क्रूसम टङ्गाइक लाग हुँकन्हक हाँठम सुम्पदेल। तब हुँक्र येशूह लैगिल।
येशू क्रूसम
मत्ती २७:३२-४४; मर्कूस १५:२१-३२; लूका २३:२६-४३
17येशू आपन क्रूस अपन्हे बोक्क खोप्रही कैजिना ठाउँम गैल। उ ठाउँह हिब्रू भाषम गलगथा कैजैठा। 18उ ठाउँम पुग्क हुँक्र उहाँह क्रूसम टङ्गैल, ओ उहाँक दाहिनओर ओ बाउँओर और दुइ जहन फे अल्ग-अल्ग क्रूसम टङ्गैल। येशूहजुन बीचम टङ्गैल।
19पिलातस एकठो दोष-पत्र फे लिख्ल ओ क्रूसम टङ्गैल। उहिँम “नासरतक येशू, यहूदीन्हक रज्वा” लिखल रह। 20धेर यहूदीहुँक्र उ दोष-पत्र पहर्ल, काकरकि येशू क्रूसम टङ्गागैल् ठाउँ सहरक लग्घ रह, ओ उ दोष-पत्र हिब्रू, ल्याटिन ओ ग्रीक भाषम लिखल रह। 21यहूदीन्हक मुख्य पूजारीहुँक्र पिलातसह कल, “‘यहूदीन्हक राजा’ कैक नाहीँ, तर ‘यी मै यहूदीन्हक राजा हुइटुँ कहल’ कैक लिखी।” 22पिलातस जवाफ देल, “मै ज्या लिख्नु, लिख्नु।”
23सिपाहीहुँक्र येशूह क्रूसम टङ्गाक सेक्ल त उहाँक लुगा लेल ओ हरेकजहन एक-एक भाग पर्ना हिसाबले चार भाग लगाक बँट्ल। उहाँक बाहिरी लुगा फे लेल, तर उ लुगा सिय नैपर्ना हिसाबले उप्परसे टरसम बिनल रह।
24उहओर्से हुँक्र अप्न-अप्न कल, “यहीह नैचिँठी, बेनसे यी क्याकर भागम पर्ठा कैक गोटी डारी।” यी घट्नाले धर्मशास्त्रम लिखल बात पूरा हुइल, उहिँम यी बात लिखल बा,
“हुँक्र म्वार लुगा अप्न-अप्न बँट्ल
ओ म्वार बाहिरी लुगह जुन गोटी डर्ल।”
तब सिपाहीहुँक्र उ काम कर्ल।#भज २२:१८
25येशूक क्रूसक लग्घ उहाँक डाई, उहाँक मौसी, क्लोपासक गोसिन्या मरियम ओ मगदाला सहरक मरियम ठह्र्याइल रलह। 26येशू आपन डाईह ओ अप्न प्रेम कर्ना चेलह लग्घ ठह्र्याइल देख्ल त, आपन डाईह कल, “डाई, हेरो, यी टुँहार छावा हुइट।” 27तबदोस्र येशू उ चेलह फे कल, “हेरो, उहाँ टुँहार डाई हुइटी।” उ दिनठेसे उ चेला येशूक डाईह आपन घरम लैगिल।
येशूक मृत्यु
मत्ती २७:४५-५६; मर्कूस १५:३३-४१; लूका २३:४४-४९
28सब काम ओराइल कैक येशू थाहाँ पैल त, धर्मशास्त्रम लिखल एक-एक बात पूरा ह्वाए कना उद्देश्यले कल, “महीह प्यास लागल।”#भज ६९:२१; २२:१५ 29ओठे आमिल मदले भरल एकठो भाँडा रह। हुँक्र एकठो कपास उहिँम बिल्बोर्ल ओ हिसपक लट्ठीम अँट्काक उहाँक मुहम लगादेल। 30येशू आमिल मद चिख्ल, ओ कल, “आब ओराइल।” तबदोस्र उहाँ टर मुन्टा लगाक आपन प्राण छोर्ल।
31उ दिन बिसैना दिनिक लाग तयारी कर्ना दिन रह, ओ द्वासर दिन जुन मुक्ति-दिवस टिहार पर्लक कारण विशेष महत्वक दिन रह। यहूदीहुँक्र बिसैना दिन लाश क्रूसम पलरहल नैचाहँट्। उहओर्से हुँक्र पिलातसकठे जाक असिक बिन्ती कर्ल, “क्रूसम टङ्गावापाइल मनैन्हक ग्वारा टुर लगाइपरल ताकि हुँक्र हाली मुहीँ ओ हुँकन क्रूसमसे उटार लगाइपरल।” 32तब सिपाहीहुँक्र अइल ओ येशूकसँग क्रूसम टङ्गागैल् दुइजन्हक ग्वारा टुरदेल। 33तर हुँक्र येशूक फे ग्वारा टुर अइल त, उहाँ पैल्हहेँ मुरलह। उहओर्से हुँक्र उहाँक ग्वारा नैटुर्ल। 34तर एकठो सिपाही उहाँक क्वाखम भालले गोभ्ल त, रगत ओ पानी आइल। 35टुह्र विश्वास कर सेको कैक यी घटना द्याखल मनैया यी बात लिख्राखल। वाकर लिखल यी बात सत्य बा। ऊ आपन लिखल बात सत्य बा कैक जन्ठा। 36धर्मशास्त्रम लिखल “उहाँक एकठो फे हड्डी नैटुरजाइ” कना बात पूरा ह्वाए कैक यी सब हुइलक हो।#प्रस १२:४६; गन्ती ९:१२; भज ३४:२० 37ओ धर्मशास्त्रम और ठाउँम असिक फे लिखल बा, “मनै आपन ग्वाभल मनैयह हेरहीँ।”#जक १२:१०; प्रका १:७
येशूक लाश गर्यम
मत्ती २७:५७-६१; मर्कूस १५:४२-४७; लूका २३:५०-५६
38अरिमाथिया सहरक योसेफ यहूदीन्हक डरक कारण कुई फे थाहाँ नैपैना गरी येशूक चेला होरलह। ऊ येशूक लाश लैजाइ पाऊँ कैक पिलातसह बिन्ती कर्ल। पिलातस अनुमति देल। तब ऊ अइल ओ उहाँक लाश लैगिल। 39येशूह रात्क भ्याँट कर गैलक निकोदेमस फे सँग रलह। ऊ मूर्र ओ एलवा विरुवासे बनागैल मग्मग्-मग्मग् वास अइना लगभग तेत्तीस किलो अत्तर अन्ल।#यूह ३:१-२ 40हुँक्र यहूदीन्हक चलन अनुसार येशूक लाशम उ अत्तर लगैल ओ सूती लुगले लपेट्क लाशह गर्यम ढरक लाग तयार पर्ल। 41उहाँ क्रूसम टङ्गागैल् ठाउँम एकठो फुलर्या रह। उ फुलर्यम एकठो लौव गर्या रह, जौन गर्यम कबु फे लाश ढैगिल् नैरह। 42उ दिन यहूदीन्हक बिसैना दिनिक लाग तयारी कर्ना दिन रलकओर्से, ओ गर्या फे लग्घ रलकओर्से, हुँक्र येशूक लाश उह गर्यम ढर्ल।
Tällä hetkellä valittuna:
यूहन्ना 19: thl
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2020, Wycliffe Bible Translators, Inc. All rights reserved.
