Abidyasi 1
1
1 #
Eza 34:5-17; 63:1-6; Zyer 49:7-22; Ezek 25:12-14; 35:1-15; Am 1:11-12; Mal 1:2-5 Abidyasi yanyaagi.
Kàfɔw Yawe wi syɛ́ɛnri naa joo Edɔmi kéeli na.
Yawe i Edɔmi kálagili kéele nyuu
Wolo n syɛɛnrɛ lóʔo, dee di yìri Yawe ma lè.
Tunduɔn n tórigo syɛɛnfeleyi nínge ni, wi n jo:
«Ye yìri!
Ye boo yìri Edɔmi kánmi na
wo kapɛɛnni kpúmɔn ní wi ní!»
2«Wéle, mii a mɔ cɛ́rɛ syɛɛnfeleyi nínge ni.
Mɔ a pye yafaʔala bi sɔ̀lɔ.
3Mɔ fúngi kpɔ́ɔmɔ n mɔ pùuni,
mɔ wee wi nyɛ lè wodɛ́ɛɔn ní fálaweeyi fúngo ni,
mɔ tɛɛkòrogi si i nyɛ yaà píri ǹjoʔo ma,
á mɔ si i gi nyuu miyɛɛ fúngi ni níì jo:
‹Wìí wi a gbǎn mii tìrige fwɔɔ bi sa nan tári na?›
4Alí mɔ ga lúgu yaà ǹjoʔo ma píri àmɛɛ nyɔɔ̀ nyɛ lè,
àlí mɔ ga sáà mɔ zyaari tɛ́ʔɛ yaà ŋɔripiigèle nínge ni,
mii a mɔ ŋɔrigɔ láʔa yaà bi cáan,»
Yawe wi jo nya.
5«Kàyuubēle ga pan mɔ ma,
wàlá yébiligi yafuguru-mí-láabéle ga pan mɔ ma,
ee! Pe a tɔ̀nɔ́ mɔ nɔ́nʔɔ!
Gee ki ga yɛlɛ be ma lè pe a gi yùu ì?
Ɛrɛzɛncɛnɛbéle ga nan mɔ na,
ɛrɛzɛn kɔ́ri yagana ban pe a yaʔa ì?
6Ee! Pe n tɔ̀nɔ n Ezau fuguri!
Wi tɛɛlaragèle n cariga n nyaa!
7Mɔ sogumɔ wóbèle myɛ n mɔ ŋɔrigɔ n lúrugo fwɔɔ n sáà nan
láʔagologi na.
Mɔ taanyɛnbèle n mɔ jànváa,
pe n fànʔa taa mɔ na,
pe n lìi mɔ búruw na, a koro pye mɔ na karinyanga.
‹Sícilimɛ ní o wi ni í,› (koro be nyuu).
8Cángi bee na ban mii a sícilibèle kwɔ́ɔ Edɔmi ni ì,
bi cánni kwɔ́ɔ yaà Ezau nyanbelegi na ì?»
Yawe wi jo nya.
9«Ee Teman, fyáakpɔɔrɔ a mɔ sanbalibèle cò,
koro ga pye nǎnbèle myɛ í kwɔ́ɔ láʔa yaà Ezau nyanbelegi na
kpóoli báriga ni!
Edɔmi ye n kàa taa n pye Isirayɛli ye wɔʔɔli báriga ni
10«Fɛ̀ɛrɛ a mɔ tɔ́n péemi kéele na
mɔ kpéʔele mɔ senyɛnw Zyakɔbi na lè,
mɔ a kwɔ́ɔ yirige yaà gi kòro nya làla o làla.
11Cángee na mɔ da canʔana wi na n yére lè,
cángee na syɛɛnfeleyaa nikwɔɔ baa wi
kapɛɛnkpumɔnbèle cò n kári lè pulobèlē,
gee ni nibɔɔnnɔ da ba ni jǐn wi kpàánweegèle ni lè,
ní i gɔ̌nw wáa Zyerusalɛmi lɔ́ri kéele na lè,
mɔ maa wɔ́ɔ̀ pye mɔ a jo poro wàa wii.
12Mɔ a kɔ́ ra mɔ senyɛnw canʔa wéle í,
ki lè fɔ̀rɔgi canʔa,
mɔ a kɔ́ ra fundaanra kpéʔele
Zyuda pìíbèle kéele na pe kálagili canʔa na í,
mɔ a kɔ́ ra kpɔɔmɔ jóomɔ nyuu pe wɔʔɔgi canʔa na í!
13Mɔ a kɔ́ jée mii syɛ́ɛnbèle kèye ni pe kálagili canʔa na í!
Mɔ wɔ́ɔgēle, mɔ a kɔ́ ra be wɔʔɔgi wéle be kálagili canʔa na í,
mɔ a kɔ́ kɔlɔ̀ taʔa pe lɔ́ri na pe kálagili canʔa na í!
14Mɔ a kɔ́ ra yèré kobariyi na bàā be fànvɔbèle kúu da láari yaà í,
pe wóbèle be kòro lè,
mɔ a kɔ́ be le kɔlɔ̀ ni wɔʔɔgi canʔa na í!
15Níì cán Yawe cángi n nùuni syɛɛnfeleyi myɛ kéele na.
Gee mɔ kpéʔele lè, koro ki a wɔ́ɔ ba kpéʔele mɔ na,
mɔ kapyegèle sàra a lúru kòro mɔ nyúngi ni.
Isirayɛli ye a gɔ̀lɔ́w wòlo Edɔmi ye na
16«Ki si i lè nya,
àmɛɛ yele gbaa mii nyanbejǎngi na lè,
kánmi bee na syɛɛnfeleyi myɛ a ra gbo sìnlaʔa ni,
yi a ra gbo fwɔɔ bàā tíngi,
yi a pye mɔ a jo yi da kɔ́ɔ̀ pye beè í.
17Kàjáa wogorobèle a pye Siyɔn nyanbelegi na,
Pe a pye wojanbéle ní,
Zyakɔbi kpáagi wòolo a ní be tálɛɛgèle taa.
18Zyakɔbi kpáagi a pye naà,
Zyozɛfu kpáagi a pye naanyìnge,
Ezau kpáagi si pye nyàásigi,
yi a cò gi na bi gi sórigo kwɔ́ɔ mɛnɛ mɛnɛ.
Ezau kpáagi wówaa nibin a kòro sìi na í,»
níì cán Yawe wi joo.
Tátɛɛyi yi nùuni lè yi fáligi a syɔɔ taa
19Wòrogulo kàbangi wòolo a ba Ezau nyanbelegi fáliga syɔɔ taa,
Tìgimi-tára woolo si ba Filisitini ye tári fáliga syɔɔ taa,
pe a ba Efirayimi tásaligi ní Samarii tásaligi fáliga syɔɔ taa.
Bɛnzyamɛ a Galaadi fáligi syɔɔ taa.
20Isirayɛli sùlasiibèle bee be cò n kári lè,
poro a ba Kanaan ye tári fáliga syɔɔ taa
bi kári fwɔɔ sa nan Sarɛpita na,
Zyerusalɛmi wóbèle si be cò n kári lè,
poro bele be nyɛ lè Sefaradi ni,
poro a wòrogulo kàbangi kèye fáliga syɔɔ taa.
21Syɔɔfɔɔlɔ a lúgu Siyɔn nyanbelegi na
bi Ezau nyanbelegi kútii joo,
fǎngi si pye Yawe wóʔo.
Tällä hetkellä valittuna:
Abidyasi 1: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.