Misye 5
5
Bɛtilehɛmi wi lè syɔɔfɔ-fànʔafɔw kèseʔe
1 #
Mat 2:6; Zyan 7:42 A mɔ, Bɛtilehɛmi Efirata,
mɔ wee wi nyɛ lè wobili Zyuda nariyi nínge ni,
mɔ ni wi a yiri mii ma,
wee wi a ba pye Isirayɛli ye nyúngi na lè,
wi kéeli n téè séli yaà booma ni,
bàngwɔɔ cányi ni.
2Koro na wi a be wáa yaʔa fwɔɔ bi taa ba nan lǎli na,
lee ni céw yɛlɛ ba pìíw see lè,
wee wi yɛlɛ bi see lè,
wi senyɛnnǎnbèle wozanbèlē si lúru pan Isirayɛli pìíbèle ma.
3Wi a ba yére bàā be nàʔá Yawe fǎngi báriga ni,
ní Yawe wi Kolocɔlɔw mɛ́ʔɛ kpɔ́ɔmɔ ní,
pe a sámaga tɛ́ɛn fyáara fun,
níì cán kpɔʔɔrɔ n taʔa wi na n séli lǎli naa na
n sáà nan tári láʔagéle na.
4Woro wi a pye yɛɛ̀nyingi!
Lǎli ni Asirii ye wów ga baa jée wolo tári ni lè
ní baa jée wolo fànʔafɔ-gbaayi ni lǎli ni lè,
wolo a bànaʔabēle kɔrɔsiin yìrige wi kurugo
ní syɛ́ɛnbèle kùndigibèle pèle kɔrɔtaanri ní.
5 #
Sél 10:8-11
Pe a ra Asirii tári kàragí ní ŋɔséew ní,
ní Nimurɔdi tári ní,
di fungomaw kpàánweegéle ni.
Kánmi bee na lǎli ni Asirii ye wów ga pan n baa jée wolo tári ni lè,
wi a wolo syɔɔ wi ma.
Isirayɛli wogorobèle, syɛɛnfeleyi nínge ni
6Zyakɔbi wogorobèle a pye syɛɛnfele-nɛʔɛyɛ nínge ni
àmɛɛ kásaga nyɛ,
gee gi yìrigí Yawe ma ni maa lè,
ní àmɛɛ zěkpɔʔɔ tuun nyàā na lè,
ki o córo syɔɔn na í,
ki ga kiyɛɛ daʔa syɔɔn ye na í.
7Zyakɔbi wogorobèle a pye syɛɛnfeleyi nínge ni,
syɛɛnfele-nɛʔɛyɛ nínge ni
àmɛɛ càaraɔ nyɛ kɔ́ligi yaweere nínge ni lè,
ní àmɛɛ càarabɔ-yɛlɛɔ nyɛ yaweeyiligēle gboogéle ni lè,
lǎli ni wi ga ni sɔ̀lɔ́ lè,
wi n ni dee tánʔana, ní i dee sulugu,
syɔɔn a taa bi di syɔɔ í.
8Ki n yɛlɛ mɔ kɔ́gi í yìri mɔ kasiitun-nyɛ́nbèle ǹjoʔo ni,
mɔ nigoobèle myɛ í kwɔ́ɔ bi yiri yaà!
Yawe a tɛɛ̀telege-váanayi myɛ kwɔ́ɔ yirige yaà
9Yawe n jo:
«Cángi bee na mii a mɔ syɔ́ɔnyi kwɔ́ɔ bi yirige mɔ níngi ni,
si mɔ kapɛɛnkpumɔn-wòtorobèle kálagi.
10Mii a mɔ tári kèye kwɔ́ɔ bi yirige yaà,
bi mɔ keniriyi myɛ jabagi.
11Mii a dɛ̀ɛ́mi kèlē kwɔ́ɔ bi yirige mɔ kɔ́gi ni,
cɛ́lɛfɔlɔ a ní pye mɔ ma í.
12Mii a mɔ yasunyi,
ní mɔ ndedanyi kwɔ́ɔ yirige mɔ níngi ni,
mɔ a ní da tuun bàā cíbele mɔ kɔ́yi fáli yɛ́ʔɛ ma í.
13Mii a mɔ Asyera tiikóriyi kíle kɔ́nɔgi bi yirige mɔ níngi ni,
si mɔ keyi kálagi.
14Mii a mii gɔ̀lɔ́w wòlo ní fundanʔara,
ní fundanʔagbɔɔrɔ ní,
syɛɛnfeleyi na yi lè yi ga fɔ̀lɔ n lóʔo í.»
Tällä hetkellä valittuna:
Misye 5: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.