Matye 16
16
Farisibèle ní Sadusebèle i kakpɔɔgaa caa
(Mar 8:11-13; Luk 12:54-56)
1 #
Mat 12:38; Luk 11:16 A Farisibèle ní Sadusebèle nùuni Zyezu na n sáà wi pye n wéle níì jo wi nyɛ̀ʔɛni kakpɔɔgaa tɛ̀ɛn poro na. 2A wi be yari: «[Cángi ga jée kavɔn, yele n jo zěgi a too í, níì cán nyɛ̀ʔɛni n nyɛ́nɛgɛ. 3Nyǐngi si ga tali, yele n jo zěgi ní káfalakpɔʔɔ a pan, níì cán nyɛ̀ʔɛni n nyɛ́nɛgɛ, á fàfaanyi li tɔ́n. Amɛɛ si yele nyɛ̀ʔɛni kèlē cán n láʔala keyɛɛ na lè, yele a wɔ́ɔ gbǎn tɔ́ɔliw naa wòʔolo cán bi láʔa keyɛɛ na ì?] 4#Mat 12:39; Luk 11:29 Lǎli naa syɛ̀ɛnnɛ be lè syɛɛnpeebèle ní kanɔnʔɔbyebèle, pe i kakpɔɔgaa caa, kàjáa kakpɔɔgaa faala a kpéʔele be nyɛnɛ na í kapye Zyonasi wógi félege ban í.» Níì núngo be taana n kári.
Farisibèle ní Sadusebèle levé kéele
(Mar 8:14-21)
5A pìitamabèle ga ni jeligi jeligi na, a be fɛ̀ʔɛ pe ga búru láa í. 6#Luk 12:1 A Zyezu be pye: «Ki n yɛlɛ yaa yeyɛɛ kɔ̀rɔsíi Farisibèle ní Sadusebèle levé na.» 7A be i gi nyuu peyɛɛ ma níì jo: «Amɛɛ gi nyɛ lè wolo ga búru láa í, koro na wi toro jo.» 8A Zyezu gi cán. A wi be pye: «Nyàʔá na yele gi nyuu yeyɛɛ ma níì jo yele ga búru láa í. Yele tágali n cɛ́rɛ. 9#Mat 14:17-21 Yele ga sèʔé kɔ́ɔ̀ yarigaa cán wii ì? Búrubèle kagunɔ syɛ́ɛnbèle selebingéle siin ní saala kagunɔ da lìi lè, yele ga sɔ̀ngi n taa kéeli bee na ì? Sɛ̀ʔɛnyɛ̀nnɛ jòorí yele da koli? 10#Mat 15:34-38 Ba búrubèle kɔrɔsiin syɛ́ɛnbèle selebingèle siin da lìi lè, sɛ̀ʔɛnyɛ̀nnɛ jòorí yele da koli? 11Mɛ̀ɛ́ gi nyɛ yele si ga gi cán ncan búru kéele na ban mii nyuu yele ma í? Kàjáa ki n yɛlɛ yaa yeyɛɛ kɔ̀rɔsíi Farisibèle ní Sadusebèle levé na.»
12Lǎli bee ni a be fala n gi cán ncan wi ga jo poro í da peyɛɛ kɔ̀rɔsíi búruw levé na í, fwɔɔ Farisibèle ní Sadusebèle tamana na.
Pyɛri n jo Zyezu wi nyɛ Kirisi
(Mar 8:27-30; Luk 9:18-21)
13A Zyezu ga nan Sezarikaʔa tɛ́nɛmi na, pi lè Filipi tári ni, a wi wi pìitamabèle yíbe níì jo: «Syɛ́ɛnbèle n jo Syɔɔn-pya i nyɛ wìí?» 14#Mat 14:1-2; Mar 6:14-15; Luk 9:7-8 A be wi pye: «Pèle n jo, Zyan Batisiti wii. A pèle jo, Elii wii. A pèle níì jo, Zyeremii wii, koro ga jáa kanyaajoowaa wii.» 15A wi be yari: «A yele doò, wìí si yele jo mii i nyɛ?» 16#Zyan 6:68-69 A Siimɔn Pyɛri wi pye: «Mɔ wi nyɛ Kirisi, Kolocɔlɔɔ woweew Jáa.»
17A Zyezu wi yari: «Mɔ i nyɛ dùba pyà, Siimɔn, mɔ wi lè Zyonasi jáaw, níì cán syɔɔn ban wi gee naa tɛ̀ɛn mɔ na í, fwɔɔ mii Tóow wi lè nyɛ̀ʔɛni na. 18Mii si a gi joo mɔ ma si jo mɔ i nyɛ Pyɛri, mii a mii Egiliziw faan fálagi naa ǹjoʔo ni, tɛɛwɔʔɔgi a gbǎn fànʔa taa wi na í. 19#Mat 18:18; Zyan 20:23 Mii a nyɛ̀ʔɛni fànʔa làkilebéle kaan mɔ ma. Mɔ ga yárigee faala pwɔɔ lè tári na, ki n wɔ́ɔ̀ pwɔɔ nyɛ̀ʔɛni na. Mɔ si ga wɔ́ɔ̀ yárigee faala sánʔa lè tári na, ki n wɔ́ɔ̀ sánʔa nyɛ̀ʔɛni na.» 20Lǎli bee ni a wi náà gi joo n gbàn pìitamabèle ma, níì jo pe a kɔ́ gi joo syɔɔn faala ma si jo woro wi nyɛ Kirisi í.
Zyezu n wi kùúw ni wi nyán yirili kéele joo
(Mar 8:31—9:1; Luk 9:22-27)
21Nlaa lǎli bee ni a Zyezu Kirisi fala n séli ni gi nyuu wi pìitamabèle ma níì jo fwɔɔ woro í kári Zyerusalɛmi ma sa wɔʔɔ gbanʔama wolɛɛbèle, ní sáriga-wòlobèle kàfɔɔlɔ, ní làlwaw sɛ́bɛwelebéle kɔ́yɔ ni, pe woro kpóo, kàjáa candaanri wógi na woro a nyán. 22A Pyɛri fala n wi cò n kàri kɔlɔ̀ na n sáà gi joo n gbàn wi ma níì jo: «Kolocɔlɔɔ í mɔ syɔɔ gee bee ma, Kàfɔw. Ki ga yɛlɛ koro í kpéʔele mɔ na nyáana í.» 23A wi fíige n Pyɛri pye: «Núngo mii taana Sutana. Mɔ i nyɛ tɛɛpùunugo mii ma. Níì cán mɔ o sɔ̀ngí Kolocɔlɔɔ kérigèle na í, fwɔɔ syɛ́ɛnbèle wòʔolo na.»
24 #
Mat 10:38; Luk 14:27 Lǎli bee ni a Zyezu gi joo wi pìitamabèle ma níì jo: «Syɔ́ɔnwee faala wi ga ni caa bi taʔa mii na lè, ki n yɛlɛ wi wi nyɛnɛ kérigèle yaʔa wi wi tiiparigi láa waa maa mii kurugo. 25#Mat 10:39; Luk 17:33; Zyan 12:25 Níì cán wee wi ga ni caa bi wi sìíw syɔɔ lè, wee bee fɔ́lɔ a bɔ̀nɔ wi ni. Wee si wi bɔ̀nɔ wi sìi ni mii kéeli na lè, wee bee a ba wi woò taa. 26Syɔɔn ga dulunyanw yárira myɛ taa, á wi sìíw baa pùuni, nyàʔá gee bee a nyɔɔ wi na? A yarigaa i yaà lé gee syɔɔn a sa kaan lè sìíw lɔ́rɔ, sìíw si taa? 27#Mat 25:31; Ŋún 62:13; Wɔr 2:6 Níì cán Syɔɔn-pya a kɔ́ pan wi Tóow nìjangbɔɔrɔ ni ní wi tundunbèle ní. Lǎli bee ni wi a ba syɔɔn o syɔɔn sàra bi yɛlɛ ní wi kapyegèle ní. 28Mii a gi joo yele ma kányɛʔɛ ni, pèle i naa nɛɛ woyérebéle ní yele ni, pe a kùu í bi taa be Syɔɔn-pya nyaa waa maa wi fǎngi ni.»
Tällä hetkellä valittuna:
Matye 16: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.
