Amɔsi 1
1
1 #
2Fàn 14:23-29; 15:1-7; 2Cán 26:1-23 Amɔsi wi pye lè Tekowa yaweegboowaa woro syɛ́ɛnri, ní yanyaagi wi nyaa lè Isirayɛli kéeli na, Zyuda fànʔafɔw Ozyasi lǎli ni, ní Isirayɛli fànʔafɔw Zyerobowami lǎli ni wi pye lè Zyowasi jáaw. Koro n pye a gi yɛ̀ʔɛlɛ siin kwɔ́ɔ sáni tári í cɛ̀lɛ lè.
2 #
Zyow 4:16
Wi n jo: «Yawe i kaana Siyɔn ni, Wi i yákpoli wáa Zyerusalɛmi ni, bànaʔabèle yaweenaʔa-tɛ́ɛyɛ i nyɛ kùu káyaʔa na, Karimɛli nyanbelegi ǹjoʔo ma si i waari.»
Yawe n fúlo Isirayɛli ní wi taana wóbèle na
Sirii ye kéeli
3 #
Eza 17:1-3; Zyer 49:23-27; Zak 9:1 Yawe wi gee naa joo níì jo: «Damasi ye kapeeyi taanri kéele na, àlí yi caa i nyɛ sicɛrɛ, gee mii joo n ceri lè mii a gi sàa í. Níì cán pe n Galaadi ye sàn ní tunmɔrɔ yaliisàn-yáriya ní.
4Mii a naà tórigo Hazayɛli kpáagi kánma na, ki a sa Bɛn-Hadadi kpaakpoloyi sórigo mɛnɛ mɛnɛ. 5Mii a Damasi gbóʔoroyi kabagi, mii a Bikati-Avɛn ye kálagi kwɔ́ɔ péw n fàra wee na, woro wee má fǎngi kàgbeele nyɛ lè wojolo ní Bɛti-Edɛn ni, Sirii syɛ́ɛnbèle si cò bi kári Kiiri ma,» Yawe wi jo nya.
Filisitini ye kéeli
6 #
Eza 14:29-31; Zyer 47:1-7; Ezek 25:15-17; Zyow 4:4-8; Sof 2:4-7; Zak 9:5-7 Yawe wi gee naa joo níì jo: «Gaza ye kapeeyi taanri kéele na, àlí yi caa i nyɛ sicɛrɛ, gee mii joo n ceri lè mii a gi sàa í. Níì cán pe n syɛɛnnɛʔɛmɛ cò n kári n sáà le Edɔmi ye kɔ́yi ni. 7Mii a naà tórigo Gaza tǒw kánma na, ki a sa kpaakpoloyi sórigo mɛnɛ mɛnɛ yi nyɛ lè gi ni. 8Bele myɛ be nyɛ Asidɔdi ni lè, mii a be kwɔ́ɔ yirige yaà, ní wee má fǎngi kàgbeele nyɛ lè wojolo ní Asikalɔn ni. Mii a mii kɔ́gi fíige Ekurɔn kánmi na. Filisitini ye wozanbèle myɛ a kùu,» Kàfɔw Yawe wi jo nya.
Tiiri ye kéeli
9 #
Eza 23:1-18; Ezek 26:1—28:19; Zyow 4:4-8; Sof 3:1-4; Mat 11:21-22; Luk 10:13-14 Yawe wi gee naa joo níì jo: «Tiiri ye kapeeyi taanri kéele na, àlí yi caa i nyɛ sicɛrɛ, gee mii joo n ceri lè mii a gi sàa í. Níì cán pe n syɛɛnnɛʔɛmɛ le Edɔmi ye kɔ́yi ni, bee be cò n kári lè: Pe ga sɔ̀ngi n taa senyɛnnɛgi joogaanna na í. 10Mii a naà tórigo Tiiri tǒw kánma na, ki a sa kpaakpoloyi sórigo mɛnɛ mɛnɛ yi nyɛ lè gi ni.»
Edɔmi ye kéeli
11 #
Eza 34:5-17; 63:1-6; Zyer 49:7-22; Ezek 25:12-14; 35:1-15; Abi 1-14; Mal 1:2-5 Yawe wi gee naa joo níì jo: «Edɔmi ye kapeeyi taanri kéele na, àlí yi caa i nyɛ sicɛrɛ, gee mii joo n ceri lè mii a gi sàa í. Níì cán wi n taʔa wi senyɛnw na ni nɛnɛ ní ŋɔséew ní, níì nyinimi myɛ yaʔa, ní àmɛɛ fundanʔari kòro ni suluguli kpéʔele ni syée lè sìnlaʔa ni, ní wɔ́ɔ̀ wi fundanʔagbɔɔri kɔn n yaʔa.
12Mii a naà tórigo Teman kánmi na,
ki a sa Bosira kpaakpoloyi sórigo mɛnɛ mɛnɛ.»
Amɔn ye kéeli
13 #
Zyer 49:1-6; Ezek 21:33-37; 25:1-7; Sof 2:8-11 Yawe wi gee naa joo níì jo: «Amɔn ye kapeeyi taanri kéele na, àlí yi caa i nyɛ sicɛrɛ, gee mii joo n ceri lè mii a gi sàa í. Níì cán pe n Galaadi fícarigèle fɔ̀ɔlɔ purugu koro ga pye bi poro tári kpɔ́ʔɔ. 14Mii a naà le Araba tǒw na ki a kpaakpoloyi sórigo mɛnɛ mɛnɛ yi nyɛ lè gi ni kapɛɛnnɛ sùpiiwáara nínge ni, kapɛɛnnɛ cângbumɔnʔɔ na, zěkpɔʔɔ nínge ni, káfalakpɔʔɔ canʔa na. 15Pe fànʔafɔw si kári púlori na, woro ní wi kùndigibèle ní,» Yawe wi jo nya.
Tällä hetkellä valittuna:
Amɔsi 1: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.