Jowẹlị 3
3
Tamụnọ Sịẹ-sịẹ Ma Kọn Ḅa
1KỊNỊNYANAḄỌ ḅe mẹẹ,
“Anị sakị ḅụ à mịẹ tẹ Juda na Jeruselemu
na siin lọkọlọkọ ḅa.
2À sịẹ-sịẹ mamgba kobiri
tẹ ịn kẹ ‘KỊNỊNYANAḄỌ Ḅe Ḅẹrẹkọn-arị’ sịn tụndụ-suku mẹ ḅo ḅa.
Anị anga ḅụ àrị ịn kọn ḅa,
ịn kẹ ị̀ atomi mịẹ aị mamgba gotẹ.
Ini Izirẹlịapụ ma gala-galama tẹẹ,
kịnị tọrụ nimi-a asịẹ ḅụ
tẹ ị̀ amakiri, Izirẹlị mẹ kẹ pakịrị-pakịrị ḍiya tẹẹ.
3Ini okoḅa saramam, kẹ tọn-pẹlẹ ḅẹ ḅara
tụḅọ kun-soapụ ma ọkị ḅẹ ḅoto.
Ini owiapụ-awọmẹ na eremịna-awọmẹ na kẹ
omoni ḅara-ḅio dẹrịmam,
kẹ sẹfị-ereme na iru na saa gbẹẹ.
4 #
Ayị 23.1-18; Izi 26.1—28.26; Emọ 1.9,10; Zẹk 9.1-4; Mat 11.21,22; Luk 10.13,14 #
Ayị 14.29-31; Jer 47.1-7; Izi 25.15-17; Emọ 1.6-8; Zẹf 2.4-7; Zẹk 9.5-7 “Ó tiye kẹ ị̀ mịẹ ḅẹ ḍọkịarị, Taya na, Sayịdọnị na, Filisiteni iri mamgba na? Ọmịnị ị̀ ḅara gbẹẹfị ọkị ḅẹ ḍọkịarị ḅoto? Ọmịnị ọkọ mịẹarị ḅẹḅẹ, yẹrị tarị sarama ọmịna aḅara ḅii ḅa! 5Ọmịnị ị̀ seleḅa na golu na ọkị tẹ pịkị ì iḅi ngọ ma dogi-so mu ọmịna atamụnọ warị ma ḅio suu tẹ. 6Ọmịnị ị̀ atomi Juda ḅẹ apụ ma na Jeruselemu ḅe apụ ma na ọkị so ịna bebe amakiri ḅụ ḅele fa wararị anga ḅụ ịn kẹ Girisi apụ dẹrịm. 7Mịọkụ ọmịnị ịn kẹ mu dẹrị anga ḅụ àrị ịn ọkị-ḅo ḅẹ-yearị. Àrị ọ́ kẹ ịn mịẹ ye mẹ kẹ ọ́ mịẹ ḅa. 8À mịẹtẹ ini ọmịna owiapụ-awọmẹ na eremịna-awọmẹ na kẹ Juda ḅẹ apụ dẹrị ḅa, ini nwẹnị ịn kẹ Sabịya apụ tẹ iḅere-iḅerea anga ḅụ simearị apụ ma dẹrị ḅa. Yẹrị, KỊNỊNYANAḄỌ ḅe, ọkọ ḅẹẹm.
9“Miemẹ ḍuko wasamaa, sịẹ-sịẹ ma ogboku:
‘Ọ́ ḅụụ tẹlẹma ọmụ pịrịị!
Ọmụapụ sịn ḅoo!
Ị́ ọmụgbin-apụ kobiri tẹ ịn mẹnjị paka!
10 #
Ayị 2.4; May 4.3 Ọmịnị amana kẹ ọmịna kiri soku ọgụ ma ḅakụ pẹndẹmatẹ arị okologie sọ;
tẹ ọmịna ḍụọ kọrị kala-ogie ma kẹ sụḅa mịẹẹ.
Yee ịnyọ ḅụụ ḅụ ofori ḅọ ḅẹẹ, “Ị̀ ḅụụ ịnyọ emii!”
11Ọ́ fọnya ḅoo,
ọmịnị ikelema-koro wararị asịẹ mamgba,
tẹ tụndụ suku mẹ ḅụ kobirii.’ ”
Yei KỊNỊNYANAḄỌ, ị́ ọmụ-ogbo mẹ fịrịma iderima-ḅo owu kẹ ịn pakaa.
12Yee sịẹ-sịẹ ma ḅụụ tẹlẹma
tẹ ịn kẹ “KỊNỊNYANAḄỌ Ḅe Ḅẹrẹkọn-arị” sịn tụndụ-suku mẹ ḅo.
Anị anga yẹrị KỊNỊNYANAḄỌ ḅe lẹgị tẹ ikelema-koro wararị asịẹ mamgba kọn ḅa.
13 #
Mịẹ 14.14-16;
Mịẹ 14.19,20; 19.15 In si-sịḅịḅio-sụa ḅara ḅakam;
fịye soku sakị ḅụ mbịaka pẹlẹ ḅara
kẹ ịn pẹlẹ-gbiin;
ịn gbẹẹ kọsịma iru mịẹ yọ ḅụ,
in girepu-asịnmgbọlụ gbẹẹ kọsịma ḅara,
nwenii iru mẹ paka-ḅo waa sara.
14Kịẹnkịẹn-ọkụ-ofori atomi
ḅẹrẹkọn tụndụ suku mẹ ḅụ emi.
Anị anga mie ala-a sakị ḅụ
KỊNỊNYANAḄỌ ḅe ene mẹ ḅo ḅarịye.
15Ịrụa mẹ na akalụ mẹ na kanakana ḅa,
tẹ lolia ma ḅarị jen kẹ ḅịya ḅịa.
Tamụnọ Ori Atomi Boma Ḅa
16 #
Emọ 1.2
KỊNỊNYANAḄỌ ḅe ekirearị Zayọnị ḅụ;
ọ̀ pọkọọ so-alagba fie ḅara fie paka-ḅoarị Jeruselemu ḅụ,
Kiri na So-tọrụ na jikearị.
Kụma ori ori atomi ḍụa ḅa.
17“Anịtẹso, Izirẹlị, í nimi ḅa mịnẹ yẹrị
anie KỊNỊNYANAḄỌ ị́ Tamụnọ ḅee.
À Zayọnị ọgọnọ angarị, ị̀ fịafịa tụndụ mẹ.
Jeruselemu fịafịa opu ama sọ ḅa;
jen asịẹ ḅẹ apụ ḅarị gbala-gbala jen-maaịn kẹ anị nẹngịma ḅịa.
18Anị sakị ḅụ, girepu aḍụọ-ḍụọ-ḍụọ tụndụ ma gbaịn koro ḅa,
tẹ tụndụ goyegoye ọgọnọ tomi kokoarị nambulo nambulo sime ḅa;
tọnwa minji paka ḅa Juda ḅẹ kala-okolo mamgba ḅio.
Kala-okolo KỊNỊNYANAḄỌ ḅe Warị ḅụ puu-paka-ḅo ḅa,
tẹ anị nwẹnị minji kẹ Akasiya tụndụ suku mẹ pịrị ḅa.
19Ijiputi ịkpa sọ ḅa,
tẹ Idọmụ kịnị kẹ mịẹ-mịẹye-ofori yọ sọ tẹ kaan-koro sime ḅa,
ini owu kẹ Juda paka tẹ
anị ḅio mịẹye-ofori apụ ḅaam ẹrẹsị.
20Tomi Juda ḅụ anga mu ḅẹẹ-sakị ḅẹẹ-sakị la ḅa,
pịkị Jeruselemu ḅụ mu ḅụọ-fa-ḅụọ-paka mamgba la.
21Ịna ọmbie ḅẹrẹ-ḅarasii tẹ amụ à
wẹrịso-a ye mẹ, à wẹrịso ḅa.”
Yẹrị, KỊNỊNYANAḄỌ ḅe, Zayọnị ḅụ angarị.
(C) The Bible Society of Nigeria