Bl 2
2
Pơjing năr tơpơh pơm năr giĕng
1Thoi noh, plĕnh teh păng đĭ-đăng dôm tơmam pơjing keh đang boih. 2Năr mă tơpơh Kră Yang 'Bok Kei-Dei pơm keh boih dôm tơdrong jang Sư. 3Đang kơ noh, Sư ăn pŭn hiôk kơ năr tơpơh, pơm năr giĕng 'lơ̆ng rơgoh; yua kơ lăm năr noh, Sư pơdơh kơ tơdrong jang Sư păng pơjing keh đĭ boih.
Pơjing kon bơngai
4Noh boih tơm rơh kơ plĕnh hăm teh mă Sư pơjing boih.
Kơplah Kră Yang 'Bok Kei-Dei pơjing plĕnh hăm teh sơ̆. 5Kơplah noh tam mă đei 'long pơle chăt ôh tơ bri brah, kư̆m tam mă đei ôh minh tơnơm 'nhĕt 'nhot chăt lăm mir, chŭn, yua kơ Kră Yang 'Bok Kei-Dei tam mă ăn đak 'mi jur tơ teh păng kư̆m tam mă đei bu choh pơtăm mơ̆n. 6Mă-lei đak yuh đơ̆ng lăm teh hngôm hơiuh ruh jơ̆p kơ teh. 7Kră Yang 'Bok Kei-Dei iŏk 'mui teh man kon bơngai dơhlu kial arih lăm trôm muh; na kon bơngai jing đei bơhngol arih.
Lăm pơgar Êđen
8Đơ̆ng noh, Kră Yang 'Bok Kei-Dei pơjing minh hlak pơgar Êđen, tơ gah hơlĕch păng 'măn kon bơngai mă Sư 'nao pơjing oei tơ lăm noh, 9Kră Yang 'Bok Kei-Dei ăn kơ teh chăt lu 'long 'lơ̆ng lăp măt păng plei sư sa 'ngam; lăm tŏk-bŏk pơgar ei kư̆m đei chăt minh tơnơm 'long tơdrong arih, kư̆m đei minh tơnơm 'long băt kơ tơdrong kơnê̆ păng băt kơ tơdrong 'lơ̆ng.
10Đei minh pôm đak glung ro wă ruh hơiuh pơgar Êđen; đơ̆ng noh ro tơklah băl jing puăn chơnglah. 11Chơnglah mă mônh anăn Bison; chơnglah noh ro tăp dăr kơ dêh Hawila, anih mă đei maih. 12Maih anih âu 'lơ̆ng tơpă; tơ noh kư̆m đei 'long pơgang 'bâu phu păng kư̆m đei tơmo gĭt. 13Anăn chơnglah mă 'bar noh Gihôn, ro tăp dăr kơ char Kus. 14Anăn chơnglah glung mă pêng noh Hidêke, ro tơ gah hơlĕch tơring Asiri. Gah chơnglah glung mă puăn noh jơ̆ glung Ơphrat.
15Kră Yang 'Bok Kei-Dei ba kon bơngai mơ̆t oei lăm pơgar Êđen wă pơtăm păng wei-lăng pơgar. 16Đơ̆ng noh Kră Yang 'Bok Kei-Dei pơkă thoi âu: “Ih gơh sa mơ̆ng kơ wă dôm lu plei 'long lăm pơgar, 17Mă-lei gah tơnơm 'long băt tơdrong 'lơ̆ng păng tơdrong kơnê̆, ih 'nĕ kơ sa hŏ; dah ih sa sĭt ih gô lôch.”
Pơjing tơdrong pơkong
18Kră Yang 'Bok Kei-Dei khan thoi âu: “Kon bơngai oei minh 'nu minh drô̆ ưh kơ 'lơ̆ng ôh; Inh gô pơjing ăn minh 'nu dơ̆ng wă tơgŭm sư păng hơbŏ thoi sư.”
19Kră Yang 'Bok Kei-Dei iŏk 'mui teh man pơjing lu kon sem brem, lu sem păr, na năm ba 'bơ̆t anăp Ađam wă kơ sư chă anăn lu sư thoi yơ, wă kơ kon sem kiơ mă Ađam đei anăn ăn đei anăn ei hloi kiơ̆ kơ adrĕch sư. 20Ađam anăn ăn kơ lu kon sem dơrong, lu sem păr, kư̆m anăn ăn kơ lu sem bri brah.
Mă-lei gah Ađam, chă lăng ưh kơ đei bu tơgŭm sư hơbŏ thoi sư. 21Kră Yang 'Bok Kei-Dei ăn kơ Ađam tep blêk, na iŏk minh hlak kơting jơmir, na dui sĕch akar pơklep lê̆ dơ̆ng. 22Kră Yang 'Bok Kei-Dei yua kơting jơmir mă Sư 'nao iŏk đơ̆ng Ađam na man pơjing minh 'nu drŏ-kăn, na năm ba tơ Ađam.
23Ađam khan thoi âu:
“Bơngai âu kơting đơ̆ng kơting inh,
sĕch đơ̆ng sĕch inh.
Bơngai âu gô krao anăn sư bơngai drŏ-kăn,
yua kơ sư đei đơ̆ng bơngai drŏ-nglo.”
24Yua kơ thoi noh na bơngai drŏ-nglo gô tơklah đơ̆ng mĕ 'bă sư na oei hơdai hăm akăn sư, na 'bar 'nu bre sư jing minh sĕch minh akar.a
25Ađam păng akăn sư, bre sư oei akâu hoh, mă-lei huay kơ đei mơlâu ôh.
Tällä hetkellä valittuna:
Bl 2: bdq
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Bahnar Bible Association. All rights reserved.