Tes Haujlwm 4
4
Cov Nomtswv Taug Petus Thiab Yauhas Zaj
1Thaum Petus thiab Yauhas tseem tabtom qhia cov neeg ntawd, cov povthawj hlob#4:1: cov povthawj hlob; tej phau ntawv qub uas xuas tes sau, muaj cov thawj povthawj hlob. qeeleej, tus thawj tubrog uas saib lub Tuamtsev, thiab ib cov Xadukais txawm tuaj nrhiav nkawd. 2Lawv ntxhovsiab heev, rauqhov ob tug timthawj no pheej qhia rau sawvdaws hais tias Yexus twb sawv hauv qhovtuag rovqab los lawm; qhov ntawd qhia tau hais tias, cov uas tuag lawm yuav sawv hauv qhovtuag rov los tau txojsia. 3Yogli ntawd, lawv thiaj ntes nkawd thiab coj nkawd mus kaw ib hmos, vim thaum ntawd twb tsausntuj lawm. 4Tiamsis muaj coob leej uas tau hnov nkawd tej lus qhia ntawd, lawv ciali ntseeg Yexus; suav cov txivneej xwb muaj kwvlam li 5,000 leej.
5Thaum kajntug lawm, cov Yudais tej thawjcoj, cov txwjlaug, thiab cov xibhwb uas qhia Kevcai tau tuaj uake sablaj hauv lub nroog Yeluxalees. 6Anas uas yog tus Tuam Povthawj Hlob, Kaiyafas, Yauhas, Alexadaws thiab lwmtus uas yog tus Tuam Povthawj Hlob tsev neeg kuj tuaj nrog lawv sablaj thiab. 7Lawv coj Petus thiab Yauhas los sawv tabmeeg lawv thiab nug nkawd hais tias, “Neb siv lub hwjchim twg lossis neb siv leejtwg lub npe ua tej no?”
8Lub sijhawm ntawd, Petus puvnpo Vaj Ntsujplig tus Dawbhuv, thiaj teb tias, “Cov nomtswv uas kav pejxeem thiab cov txwjlaug, 9hnubno yog nej nug txog yam zoo uas wb tau ua rau tus txivneej tuag ceg no thiab txog qhov uas nws ob txhais ceg zoo lawm, 10ces tsimnyog nej thiab tagnrho cov neeg Yixalayees sawvdaws yuavtsum paub tias tus txivneej uas sawv tabmeeg ntawm nej no zoo lawm, twb yog Yexus Khetos tus uas yog neeg Naxalev lub npe uas muaj hwjchim ua rau nws zoo. Nws yog tus uas nej muab ntsia rau saum tus ntoo khaublig thiab yog tus uas Vajtswv tau tsa sawv hauv qhovtuag rovqab los. #Nnkauj 118:22 11Yexus yog tus uas Vajtswv Txojlus qhia tseg hais tias,
“ ‘Lub Pobzeb uas cov neeg ua tsev muab xyeeb tseg lawm,
nimno tau dhau los ua lub uas tseemceeb#4:11: lub uas tseemceeb; lossis lub thawj rau ntawm kaumtsev. tshaj txhua lub lawm.’
12Kev cawmdim yeej tsis muaj nyob rau hauv lwmtus hlo li, rauqhov yeej tsis muaj lwm lub npe uas Vajtswv muab rau noobneej es yuav cawm tau kom peb dim.”
13Thaum cov thawjcoj hauv Koomhaum qibsiab pom tias Petus thiab Yauhas muaj siab tawv teb li ntawd, lawv xav tsis thoob li, rauqhov lawv paub tias nkawd yeej tsis tau kawm ntawv, nkawd tsuas zooli luag tej thiab xwb. Thaum ntawd lawv nco tau tias nkawd txeev nrog Yexus uake los lawm. 14Tiamsis lawv hais tsis tau licas, rauqhov lawv pom tus txivneej tuag ceg uas zoo lawm nrog nkawd sawv uake ntawd. 15Yogli ntawd, lawv thiaj hais kom nkawd tawm hauv lub chaw sablaj mus. Lawv sawvdaws thiaj sablaj hais tias, 16“Peb yuav ua licas rau ob tug neeg no? Txhua tus neeg uas nyob hauv lub nroog Yeluxalees no puavleej paub tias zaj txujci tseemceeb no yog nkawd ua, peb yuav tsis lees paub tsis tau. 17Peb yuavtsum txwv tunrho tsis pub nkawd hais Yexus lub npe rau leejtwg li, zaj no thiaj yuav tsis nrov-ncha mus rau sawvdaws hnov ntxiv.”
18Lawv thiajli hu nkawd rovqab los, thiab txwv tunrho tsis pub nkawd hais lossis qhia Yexus zaj ib zaug ntxiv li lawm. 19Tiamsis Petus thiab Yauhas teb lawv hais tias, “Nej sim xav seb, qhovtwg haum Vajtswv siab dua: wb mloog nej lus zoo dua los wb mloog Vajtswv lus zoo dua? 20Yuav kom wb tsis txhob hais rawsli tej uas wb hnov thiab wb pom lawm, yeej tsis tau li.” 21Thaum ntawd cov nomtswv tseem hajyam txwv nkawd tawv dua qub ntxiv, ces lawv txawm tso nkawd mus. Lawv tsis paub xyov yuav rautxim licas rau nkawd, rauqhov tej neeg sawvdaws tabtom qhuas Vajtswv txog zaj txujci tseemceeb uas tau tshwmsim ntawd. 22Tus txivneej uas Vajtswv kho nws zoo ntawd hnubnyoog muaj plaubcaug tawm xyoo lawm.
Cov Ntseeg Thov Vajtswv Kom Lawv Muaj Siab Tawv
23Thaum lawv muab Petus thiab Yauhas tso lawm, nkawd txawm rov mus rau ntawm cov ntseeg thiab qhia tej uas cov thawj povthawj hlob thiab cov txwjlaug tau txwv nkawd rau lawv mloog. 24Thaum cov ntseeg hnov li ntawd, lawv sawvdaws koom ib lub siab thov Vajtswv hais tias: “Tus Tswv uas muaj hwjchim, Koj yog tus uas Tsim lub ntuj thiab lub ntiajteb, tsim dej hiavtxwv thiab tsim txhua yam uas nyob rau ntawm tej chaw ntawd huv tibsi! #Khiav 20:11; Teev 9:6; Nnkauj 146:6 25Koj kom Vaj Ntsujplig tus Dawbhuv qhia rau peb yawgkoob Daviv uas yog Koj tus tubtxib, hais tias:
“ ‘Vim licas Lwm Haivneeg chim heev;
thiab vim licas tej neeg tuavhauv ua phem yam tsis muaj qabhau? #Nnkauj 2:1-2 (LXX)
26Tej vajntxwv uas kav lub ntiajteb no sawv nresnroos tos
thiab tej nomtswv tuaj uake
tawmtsam tus Tswv thiab Nws tus Mexiyas.’
27Yeej muaj li ntawd tiag, rauqhov Helauj thiab Pootius Philaj nkawd nrog Lwm Haivneeg thiab cov Yixalayees tau tuaj uake rau hauv lub nroog no tawmtsam Yexus, uas yog Koj tus Tubtxib dawbhuv uas Koj tau tsa ua tus Mexiyas lawm. #Lukas 23:7-11; Math 27:1-2; Malak 15:1; Lukas 23:1; Yauh 18:28-29 28Tej uas lawv ua no twb yog muaj rawsli Koj lub hwjchim thiab Koj tus dejsiab uas Koj tau npaj tseg los lawm. 29Tus Tswv, nimno thov Koj tsa qhovmuag saib tej uas lawv uanruj uatsiv rau peb. Thiab thov Koj pab peb cov uas yog Koj cov tubtxib kom muaj lub siab tawv qhia Koj txojlus. 30Thov koj cev tes kho tej neeg uas muaj mob, thiab thov Koj pub kom tej txujci tseemceeb uas peb ua yog los ntawm Yexus uas yog Koj tus Tubtxib dawbhuv lub npe.”
31Thaum lawv thov tag, qhov chaw uas lawv nyob ntawd txawm uazog koog. Lawv sawvdaws ciali puvnpo Vaj Ntsujplig uas Dawbhuv thiab muaj lub siab tawv qhia Vajtswv Txojlus.
Cov Ntseeg Nqa Tej Khoom Uas Lawv Muaj Tuaj Tso Uake
32Cov ntseeg txhua tus puavleej koom ua ib lub siab. Tsis muaj ib tug yuav hais tias tej uas nws muaj yog nws li, tiamsis txhua yam uas lawv muaj, lawv nqa tuaj tso uake ua sawvdaws tug. #Teshl 2:44-45 33Cov timthawj tau ua timkhawv muajceem heev hais txog zaj uas Tswv Yexus tau sawv hauv qhovtuag rovqab los, thiab Vajtswv tau nchuav koobhmoov ntau heev rau lawv txhua tus. 34Lawv cov ntawd tsis muaj ib tug txomnyem li. Cov uas muaj liaj muaj teb ntau daim, muaj vaj muaj tsev ntau lub, los lawv muab muag, thiab coj cov nyiaj uas muag tau ntawd tuaj 35rau cov timthawj; thiab cov timthawj muab cov nyiaj ntawd faib rau sawvdaws rawsli nyias txoj kev cheemtsum.
36Yauxej kuj ua li ntawd thiab; Yauxej yog xeem Levis, nws yug tim lub povtxwv Xaipas. Cov timthawj tis dua ib lub npe rau nws hu ua Npananpas (lub npe ntawd txhais hais tias “Tus uas Txhawbzog.”) 37Nws muab nws ib daim teb muag, thiab coj cov nyiaj tuaj rau cov timthawj.
Tällä hetkellä valittuna:
Tes Haujlwm 4: MWW2022
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022 United Bible Societies. All rights reserved.
