Suosittuja jakeita Raamatun kirjasta 2 Kōrinto 6

Jaa

E te taina, ko ꞌite ꞌana e tātou taꞌatoꞌa e ko tano mo here ꞌi ruŋa i tū iuko ꞌā e tahi hoi ꞌe e tahi ꞌuei. Pē ira ꞌā e ko tano mo ⌊hāipo-ipo⌋ ꞌo mo haꞌaꞌau i te aŋa e tahi mo aŋa te kope haka moe i te manaꞌu ꞌi ruŋa i a Ietū ararua ko te kope ꞌina he haka moe i te manaꞌu ꞌi ruŋa i a Ietū. ¿Pē hē, paꞌi, ana tano te meꞌe riva-riva ki te meꞌe rake-rake? ꞌE ¿pē hē te māꞌeha ana hokorua i te pōꞌuri?

ꞌE te ꞌītoro, ¿e tano mau rō ꞌi te kona haꞌamuri ꞌAtua? E kī atu ena a au i te meꞌe nei ꞌo te ai a tātou pa he kona haꞌamuri ꞌAtua. ꞌI ruŋa i te Pāpaꞌi Moꞌa e kī ena, paꞌi, e te ꞌAtua: «Ka noho nei a au ꞌi roto i a rāua, a au mo ꞌAtua o rāua, ꞌe a rāua mo taŋata ꞌāꞌaku».

ꞌE ꞌi te rua kona o te Pāpaꞌi Moꞌa e kī takoꞌa ena: «E eꞌa kōrua mai roto i te nuꞌu aŋa i te meꞌe taꞌe tano ꞌe ꞌina ko noho haka ꞌou ꞌi muri; ꞌina kōrua ko aŋa i te meꞌe taꞌe tano pē rāua. Pē ira he toꞌo a au i a kōrua māꞌaku, ꞌe he riro au he Matuꞌa mo kōrua, ꞌe a kōrua mo ŋā poki ꞌāꞌaku. Pē ira te ꞌAtua, i a ia te pūai taꞌatoꞌa, i kī ai».

¿Hoki e haꞌaꞌau mau rō te ⌊Kiritō⌋ ararua ko Rukifero? ¿Hoki e haꞌaꞌau mau rō te nuꞌu haka moe i te manaꞌu ꞌi ruŋa i a Ietū ꞌe te nuꞌu taꞌe haka moe i te manaꞌu ꞌi ruŋa i a ia?