Hosea 9
9
De Strof fa Israel
1Israel, frei die nich soo aus aundre Lenda.
Du hast dienen Gott veloten derch dien romschwienen;
du hast die opp jieda Draschplauz bekjeepen loten. #Hos 1,2
2Doawäajen woat de Draschplauz un de Wienkjala,
nu nich jenuach jäwen toom läwen;
de niea Wien woat utbliewen.
3Jie woaren nich en däm Harn sien Launt bliewen,
oba Efraim woat wada no Ägipten motten,
un en Assierien woa jie äten motten,
waut ver däm Harn nich rein talt. #Hos 8,13
4Doa woa jie däm Harn kjeen Wien fa een Drinkjopfa jäwen,
un kjeen Brauntopfa woat am jefaulen.
En daut Launt, woont nich junt es, woa jie Truabrood äten,
wuaderch een jiedra, wäa daut at, orrein woat.
Äa Broot woat bloos fa dän Hunga sennen,
un woat nich em Tempel jedroacht woaren.
5Waut woa jie dan aum Heljedach doonen,
ooda met de Fasta, dee fa däm Harn sent.
6See motten aula wajch no dän Kjrich;
Ägipten woat an oppsaumlen,
un Memfis woat an begrowen.
Doa wua selwane Sachen stunden,
waust nu Krut waut Schlemsen jeft;
spekjajet Krut waust wua äare Hiesa wieren. #Hos 10,8
7De Tiet es jekomen,
daut du fa diene groote Schult bestroft woascht woaren;
ditmol woat Israel daut to feelen kjrieen.
Jie sajen, de Profeet es domm un de Maun met dän Jeist es dwautsch,
oba daut saj jie wiels jie soo vesindicht un jäajenaun sent.
8De Profeet es een Wajchta en Efraim,
Gott sien Volkj;
doch haben see eene Schlenj opp sienen Stich jelajcht,
un see veachten am en Gott sien Hus.
9Äare Wäaj sent nu soo schlajcht,
aus dan aus see en Gibea wieren;
doawäajen woat hee aun äare Schult denkjen,
un hee woat äare Sinden bestrofen. #Rech 19,22-30; 20,13; Hos 10,9
10Aus ekj Israel funk, freid ekj mie,
aus wan eena Wiendruwen oppe wille Stap finjt.
Aus ekj june Vodasch funk, wia ekj soo jlekjlich,
aus wan eena de ieeschte Fiejen aum Fiejenboom sitt.
Oba dan jinjen see no Baal Peor,
un doa dreiden see sikj no schaundhaufte Sachen;
see worden mie soo äakjlich,
aus daut, waut see aunbäden. #4Mo 25,3; 5Mo 32,10
11Doawäajen woat daut, waut Efraim harlich muak,
wajchflieejen aus een Voagel,
soo daut see nich woaren Kjinja haben
un nich emol schwanga woaren.
12Un uk wan see Kjinja haben woaren,
woa ekj an äwa jieda eent von dee truaren loten.
Woo woat daut doch sennen,
wan ekj von an wajch jegonen sie?
13Efraim wia soo enjewartelt un stoakj aus Tierus,
oba nu motten see äare Kjinja rutbrinjen un ombrinjen loten. #Hes 27,3
14Gott jeff an –. Waut woascht an jäwen?
Moak daut, daut see kjeene Kjinja haben woaren,
un daut äare Brosten oppdrieejen.
15Aul äare Sind passieet en Gilgal;
dort sie ekj an Fient jeworden.
Wäajen daut schlajchte waut see deeden,
woa ekj an ut mien Hus rut joagen.
Ekj woa an uk nich mea goot sennen,
wiels äare Leidasch soo jäajenaun sent.
16Efraim haft eene schlajchte Wund,
äare Wartel es vedrieecht.
Dee woat kjeene Frucht mea droagen,
un wan waut aunsaten sull,
wudd ekj daut doot moaken.
17Mien Gott woat an wajchschmieten,
wiels see nich jehorchen wellen.
See woaren mank de Velkja rombeislen.
Praegu valitud:
Hosea 9: PB
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Plautdietsch Bible © 2003 Kindred Productions and United Bible Societies Association, Inc.