Hosea 10
10
Daut beese woat bestroft
1Israel wia soo aus eene jesunde Wienrank,
dee väl Frucht druach.
Doano aus see bäta auf worden,
doano buden de Lied mea Aultoaren;
doano aus see rikja worden,
rechten see emma schmokre Steenmols opp. #3Mo 26,1; Jer 2,21
2Em Hoat sent see hinjarigjsch,
un nu motten see doafäa lieden.
De Har woat äare Aultoaren dolbräakjen,
un aul äare Steenmols vestieren.
3Nu motten see toostonen,
see haben kjeenen rechtjen Kjennich,
wiels see kjeene Forcht fa däm Harn hauden;
waut kaun een Kjennich noch fa an doonen?
4Waut see vespräakjen, helt nuscht en;
dän Bunt dän see muaken, hoolen see nich.
Daut Jerecht blieecht aus jeftjet Onkrut,
waut en jieda Ran oppe Stapen waust.
5De Lied en Samaria sent beduat
om daut Kaulf en Bet Awen.
De Menschen woaren doaräwa truaren,
un de Priestasch fa de Jetta hielen.
Daut waut an ieescht Iea jeef,
woat aula wajchjenomen woaren. #Hos 4,15
6Jo, daut Kaulf woat no Assierien jenomen,
aus een Jeschenkj fa däm grooten Kjennich.
Efraim woat Schaund lieden,
wäajen dän Rot dän see neemen. #Hos 5,13
7De Troon en Samaria woat veschwinjen,
aus de Schum oppem Wota.
8De huage Opfastäden en Awen,
wua Israel sikj vesindjen deed,
woaren to nuscht jemoakt woaren.
Distlen un Spekjakrut woaren opp de Aultoaren waussen.
See woaren to de Boaj roopen: Veschett ons,
un to de Humpels: Fault opp ons. #Hos 9,6; Luk 23,30; Opb 6,16
9Von dan aus jie en Gibea sindijden,
bat dän vondoagschen Dach,
hab jie nich oppjehieet met sindjen.
Brochten äare Sinden en Gibea
an nich eenen Kjrich, dee an dolschluach? #Hos 9,9
10Wan mie daut ieescht jenuach es,
dan woa ekj de Lenda jäajen an vesaumlen,
wiels see sikj dobbelt vesindicht haben.
11Efraim haud jelieet em Jespaun trakjen,
oba an jefoll daut draschen bäta;
dan schoond ekj sien schmocket Jenekj vom Joch.
Oba nu woat hee motten een Jespaun dulden;
Juda woat plieejen un Jakob woat äajden.
12Seit jerajcht sennen,
un arnt, waut de truhoatje Leew drajcht.
Plieecht de Broak noch eemol un sieekjt däm Harn,
daut hee kjemt un junt halpt jerajcht sennen,
soo aus een erfreschenda Räajen. #Jes 55,6; Jer 4,3
13Oba jie haben Schult enne Ieed jeplaunt,
un woaren beeset arnten,
un woaren de Frucht von Läajes äten.
Wiels du die opp diene Macht veleetst,
un opp eene groote stoakje Armee, #Hiob 4,8
14woat nu Kjrichsjeschrech mank june Menschen komen,
un june sechre Städen woaren vestieet woaren.
Daut woat krakjt soo sennen aus dan,
aus Kjennich Schalman de Staut Bet Arbeel em Kjrich neem,
un de Mitta un Kjinja grausom aufschauft.
15Nu woat junt daut soo en Betel gonen
wäajen june growe Sinden.
Wan dee Dach väabrakjt,
woat de Kjennich en Israel sikj nich wäaren kjennen.
Praegu valitud:
Hosea 10: PB
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Plautdietsch Bible © 2003 Kindred Productions and United Bible Societies Association, Inc.