Jabura 145
145
Ala la fonisireya a la daalenu mafanna
1Dauda la Ala matɔgɔ beete do le ka.
Ee n na Ala, n si i la ko mayɛlɛ le, ile Mansa!
N si i tɔgɛ lakoloya le lun go lun han kudai.
2N si i matɔgɔ le luŋɛ bɛ,
n mɛn si i tantu lun go lun han kudai.
3Alatala kolo, a mɛn dagɛren a ni tantue sɔtɔ koola,
mɔgɔ te a la koloya butɔ yen.
4Mɔgɛnu si i la walenu matɔgɔ le bɔɔla juruya han juruya,
anu mɛn ni i la mare sɛnbɛmanu la ko fɔ.
5I la nɔɔra mamirindeŋɛ nun i la biliya la ko si fɔ le.
N si to le n hakkile latagala i la kabanakoenu ma.
6Anu si i sɛnbɛ makilandeŋɛ la ko fɔ le.
N si i la koloya tafɔ le.
7Mɔgɛnu si anu mira le i la ɲinmaya banba la, anu te ban a tafɔla,
anu mɛn si ɲagalin sɔnkɛ layɛlɛ le i la teleŋɛ la ko la.
8Alatala hinnɛta, a mɛn kinikinita,
a te dumɛn teriya la, a la fonisireya kolo.
9Alatala be kaɲinyaren de a bɛ ye,
a be a la kinikinɛ latagaren a la daalenu bɛ ma.
10Alatala, i la daalenu bɛ si i tantu le,
i la lannanteya mɔgɛnu si i matɔgɔ le.
11Anu si i la mansaya biliyareŋɛ la ko fɔ le,
anu mɛn ni naa i sɛnbɛ la ko mataali,
12alako adamadeŋɛnu si nɔ i sɛnbɛ nun i la nɔɔra lɔnna ki min na,
anun i la mansaya mamirindeŋɛ.
13I la mansaya mu mansaya danbale le la.
I la mansaya nɔɛ si mɛ le bɔɔla bɔnsɛ ma han bɔnsɔ.
⸂Alatala be a la kuma bɛ lakamalila lannanteya le butɔ,
a be a la fonisireya yitala a la mare bɛ tɔ.⸃
14Alatala be mɔgɛnu bɛ kɔtɔ sɔren minnu be boe koe tɔ;
a mɛn be mɔgɔ kunkurundeŋɛnu bɛ lawulila le.
15Bɛ be a ɲa sɔren ile Alatala le la, anu be anu hakkile sɔren i ma,
ile le be dɔmɛ diila anu ma a wagate.
16I be i bole lakala,
i ni daalenu bɛ lafa koenu la anu be diren minnu ye.
17Alatala telenta a la koe bɛ tɔ,
a be a la fonisireya yitala a la mare bɛ tɔ.
18Alatala sutu a kelelá bɛ la,
minnu bɛ be a kelela anu juse beeyareŋɛ la.
19Minnu be kilanden a la, a be wonu sagoe mala le,
a be anu la mamade mɔɛla le, a ni anu lakisi.
20Alatala be mɔgɛnu kantala le, minnu bɛ be a kanuren,
kɔnɔ a si mɔgɔ koroŋɛnu kan bɛ sɔntɔ le.
21Alatala matɔgɔ beete ni to n da tɔ,
daale bɛ ni Alatala tɔgɔ saniyandeŋɛ matɔgɔ,
lun go lun han kudai.
Currently Selected:
Jabura 145: MOG
Tõsta esile
Jaga
Compare
Kopeeri
Want to have your highlights saved across all your devices? Sign up or sign in