Jabura 144
144
Mansa la Ala mataraŋɛ
1Dauda tɛŋɛ.
Mamatɔgɛ be Alatala ye, n na fata,
min be n bolenu madegenna kɛlɛ ma koe la,
n bolo soliŋɛnu ni sɔnɔya kɛlɛ tɔ.
2N dɛmanná le mu a la lannanteya butɔ, n si nɔ n dogonna min bata.
N nafulenná le mu a la,
a be n makantala iko nɛgɛ lefa tini be kɛlɛ malá bolo kɛlɛ tɔ.
N be tangare ɲinila ale le kɛnna,
ale le be n na jama tola n na yamɔre kɔtɔ.
3Ee Alatala, bɔ fen de mu mɔgɛ la min be a maren i be i mirala a ma kɛ mɔɔle la?
Fen de mu Adama la deŋɛ la i to be i hakkili toren a ma?
4Adamadeŋɛ be toren de iko fɔɲɛ,
a la simaya be toren iko niiniŋɛ min be tanbila.
5Alatala, i ni saŋɛ laɲɛngɛn, i ni jigi,
i ni kɔnkɛnu lamaga, han kɔnkɛnu siise ni to yɛlɛla.
6I ni sangi malaŋɛ labula, i ni n jaguenu mafatan.
Ndakanu fili, anu la mamadɛŋɛ ni ɲatadon.
7I bole lafonti kabɔɔ kantɔ,
i ni n nakisi, i ni n nayɛlɛ ji banbanu tɔ,
ka n bɔɔ nabaganu la nɔɛ kɔtɔ,
8foniya kumanu be bɔɔla minnu da tɔ,
minnu be anu sɛnbɛ lawalila mamafue butɔ.
9Ee Ala, n be beeti nama bɔɔla ile le ye,
n be beete bɔɔla kɔndiŋɛ julu tan nɛŋɛ tɔ i la biliya le butɔ,
10ile min be kise diila mansa ma,
i be i la jondeŋɛ Dauda lakisila faŋɛ la ɲagankata ma.
11N nakisi, i ni n nafulen,
ka n bɔɔ nabaganu la nɔɛ kɔtɔ,
foniya kumanu be bɔɔla minnu da tɔ,
minnu be anu sɛnbɛ lawalila mamafue butɔ.
12Wo butɔ, mɔ la den kayireŋɛnu si to le iko kifeŋɛnu,
minnu koloyata a ɲinma la anu la kamarenya tɔ.
Mɔ la den musereŋɛnu tugun si majabu le
iko basera maɲɛgɛndeŋɛnu minnu be mansa boŋɛ kɔtɔ sɔren.
13Wo si a taran de, mɔ la bontoŋɛnu be lafaren suge mɔɔle bɛ la;
mɔ la wɔɔrɛnu be siyala a wulu wulu le la,
daakanu tugun tɔ, wo ɲɔgɔn wulu tan de be.
14Mɔ la ningenu be koto siyama le yadɛla,
mɔ la tattanu bele wɛɲɛnkinden.
Jaguenu te na mɔ kɛlɛdula, anu te mɔ doni jonya la,
sɔnkɔ yo tugun te mɔɛ mɔ dula.
15Hɛra be jama ye, Ala be kɛ koenu mala minnu ye.
Hɛra be jama ye, Alatala mu minnu la Ala la.
Currently Selected:
Jabura 144: MOG
Tõsta esile
Jaga
Compare
Kopeeri
Want to have your highlights saved across all your devices? Sign up or sign in