2. Samuel 12
12
David sitt siene Schult en, un bekjant
1Un de Har schekjt Natan no David, un hee jinkj un säd to am: Lot mie die emol waut vetalen. Doa wieren twee Mana en eene Staut. De eena wia rikj un de aundra oam. #(1-6) 2Mo 20,17 2De rikja haud een deel Schop un Vee, 3un de oama haud nuscht aus een Laum, daut hee sikj jekoft haud. Hee foodad daut, daut et fein met siene Kjinja toop opp woss. Daut Laum eet ut soon Äten aus hee deed un drunk ut sien Kuffel. Daut lach bie am oppe Schoot un wia meist soo aus eene Dochta fa am. 4Nu kjeem doa een Dach een Reisenda no däm rikjen Maun. Un däm wia daut too schod, eent von siene ieejne Schop ooda Vee to nämen fa däm Reisenden, dee doa jekomen wia. Hee neem daut Laum von däm oamen Maun, un reed daut aun fa däm, dee no am jekomen wia. 5Dan wort David sea doll äwa dän Maun, un hee säd to Natan: Soo secha aus de Har läft, haft dee Maun dän Doot vedeent. 6Dee saul daut Laum veamol auftolen fa waut hee jedonen haft, un daut hee nich een Jaumahoat äwa däm haud. #2Mo 21,37
7Un Natan säd to David: Du best jan Maun. Un nu horch no waut de Har, Israel äa Gott, to die to sajen haft. Hee sajcht: Ekj hab die toom Kjennich äwa Israel jesat, un ekj hab die ut Saul siene Macht jerat. #1Kjen 20,40 8Un ekj jeef die sien Rikj un uk siene Frues. Ekj jeef die Israel un Juda, un wan daut noch nich toorieekjt, haud ekj die tweemol soo väl jejäft. 9Wuarom hast du nich no däm Harn jehorcht, un hast waut beeset jedonen? Du hast Uria, däm Hetita, met daut Schwieet omjebrocht un hast däm siene Fru aus diene jenomen. Du hast Uria loten met de Amonita äa Schwieet ombrinjen. #2Sam 11,1-27; 1Kjen 15,5 10Doawäajen saj ekj nu, daut du un diene Nokomen woaren nienich onen daut Schwieet läwen. Daut es wiels du mie nich jeacht hast un hast Uria, däm Hetita siene Fru jenomen fa die selfst. #2Sam 13,28-29; 18,14; 1Kjen 2,24-25; 2Kjen 25,7 11Un de Har sajcht uk noch wieda: Ekj woa eenen grooten Schoden loten opp die komen von eenem ut diene Famielje. Un du woascht seenen, woo ekj diene Frues von ver die woa wajchnämen un dienen Noba dee jäwen woa. Dee woat gaunz openboa met diene Frues ligjen. #2Sam 16,22; 20,3; Hiob 31,9-10 12Du deetst daut em Jeheemen, oba ekj woa daut gaunz em opnen doonen, soo daut gaunz Israel daut seenen woat.
13Dan säd David to Natan: Ekj hab jäajen däm Harn jesindicht. Un Natan säd: De Har haft diene Sind vejäft. Du woascht nich doafäa stoawen. #2Sam 24,10; Psa 51,3; Hes 18,21-23 14Oba daut Kjint woat stoawen, wiels du däm Harn veacht hast. #2Sam 11,27 15Dan jinkj Natan no sien Hus.
Un de Har brocht eene Krankheit opp daut Kjint, woont dee, dee Uria siene Fru jewast wia, David jebuaren haud. 16Un David bäd Gott aun fa daut Kjint. Hee deed fausten un jinkj un lach de gaunze Nacht oppe Ieed. 17Dee, dee äwa de Deena en sien Hus aunjestalt wieren, stunden biesied am un wullen am aunrechten, oba hee leet daut nich. Hee eet uk nuscht. 18Dan aum säwenden Dach storf daut Kjint. David siene Deena scheen daut schwierich, David daut to sajen. See dochten daut aus daut Kjint noch läwd, wia hee soo trigjetrocken aus wie to am räden, waut woat hee dan noch doonen wan daut Kjint jestorwen es. Hee woat sikj met eemol noch eenen schlemmen Schoden aundoonen. 19Aus David sach, daut see unja eenaunda fuschelden, vestunt hee met eemol, daut daut Kjint jestorwen wia. Un David säd to siene Deena: Es daut Kjint jestorwen? Un see säden: Jo, daut es jestorwen. 20Dan stunt David opp un wosch sikj, un schmäad sikj en, un trock sikj reine Kjleeda aun. Un hee jinkj no däm Harn sien Hus, un bäd Gott aun. Dan jinkj hee no sien ieejnet Hus un foddad waut to äten. Aus see am daut brochten eet hee. 21Un siene Deena fruagen am: Waut bediet dit? Soo lang aus daut Kjint läwd, deetst du fausten un hielen. Oba aus daut storf, dan stunst du opp un eetst. 22Un hee säd: Aus daut Kjint noch läwd, deed ekj fausten un bäden, wiels ekj docht: Wäa weet, auf de Har mie woat jenstich sennen un daut aum Läwen hoolen. 23Oba nu es dee jestorwen. Wuarom saul ekj nu fausten? Kaun ekj däm noch trigjbrinjen. Ekj woa noch emol no am gonen, oba hee woat nich no mie trigjkomen. 24Un David treest Batseba, siene Fru. Un hee jinkj un lach met ar. Un see brocht am eenen Sän, un hee nand däm Salomo. Un de Har wia däm goot, 25un schekjt eene Norecht derch Natan dän Profeet, daut hee sull Jedidja jenant woaren, wiels de Har am goot wia. #1Chr 20,1-3
26Aus Joab jäajen Raba, de Hauptstaut von de Amonita, kjamfen deed, neem hee de Kjennichstaut en. #2Sam 11,1; Jer 49,2 27Un hee schekjt wäm no David met de Norecht: Ekj hab met Raba jekjamft, un ekj hab äa Wota aul en miene Macht. 28Brinj de äwaje Soldoten un leid dän Kaumf toom de Staut ennämen. Wan du daut nich west, dan woa ekj dee ennämen un dee bie mienen Nomen nanen. 29Dan saumeld David de Mana toop un jinkj no Raba. Un hee kjamft jäajen dee un neem dee en. 30Un David neem de Kroon vom Kjennich sienen Kopp rauf un leet dee opp sienen Kopp saten. De Kroon wuach 35 Kilo un haud eenen sea kostboaren Steen. Un David leet de Staut beplindren un brocht sea väl wieetvolle Sachen ut de Staut rut. 31Oba de Menschen brocht hee läwendich rut un muak dee schwoare Oabeit met Soagen un Koofoots un iesane Akjsen doonen. Dee musten uk bie de Tieejel Owes schaufen. Un hee deed daut uk soo met aul de aundre Städa en Amon. Dan jinkj David un de gaunze Armee trigj no Jerusalem.
Actualmente seleccionado:
2. Samuel 12: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
