2. Samuel 11

David un Batseba

1Een Farjoa, dee Tiet em Joa wan de Kjennichs emma äare Armee rut schekjten, schekjt David siene gaunze Armee un de aunjestalde unja Joab jäajen de Amonita. Un see besiejden de amonitische Armee un omrinjden de Hauptstaut, Raba. David bleef oba de gaunze Tiet en Jerusalem. #1Chr 20,1 2Een Dach, lot no Meddach, stunt David opp von siene Benkj, un jinkj doa opp daut Dak von sien Paulaust rom. Un aus hee doa soo romjinkj, sach hee eene Fru sikj boden. Dee Fru leet sea schmock. #Mat 5,28-29 3Un David schekjt een Deena, daut see nofruagen, wäa de Fru wia. Un dee säd: Daut es doch Batseba, Eliam siene Dochta, dee Uria däm Hetita siene Fru es. #2Sam 23,39 4(De Fru wosch sikj jrod, daut see rein wia no äare moonatliche Doag.) Un David leet schekjen, daut see no am kjeem, un hee lach met ar. Dan jinkj see wada no äare Städ. #2Mo 20,14; 3Mo 15,19; 20,10; 5Mo 22,22 5Nich väl lota, wist de Fru daut see schwanga wia. Un see leet däm Kjennich David weeten, daut see een Kjlienet haben sull.

6Dan schekjt David eene Norecht no Joab daut Uria de Hetita no am komen sull. Un Joab schekjt Uria no David. 7Aus Uria dan no David kjeem, fruach David am, woo Joab un de Armee daut jinkj, un woo de Kaumf jinkj. 8Dan säd David to Uria: Nu go no dien Hus, un wausch die tus de Feet. Un Uria jinkj utem Paulaust rut, un see druagen am een Jeschenkj vom Kjennich hinjaraun. 9Un Uria jinkj rut un bleef verem Paulaust met däm Kjennich siene aunjestalde to Nacht. Hee jinkj nich no Hus. 10Aus see David dan säden, daut Uria nich wia no sien Hus jegonen, säd David to Uria: Du best een stoot wajch jewast. Wuarom jinjst du nich no Hus? 11Un Uria säd toom Kjennich: De Kjist un Israel un Juda bliewen en een Zelt, un mien Kommandaunt Joab un siene Mana aula bliewen oppe opne Stap. Woo kaun ekj dan noch no mien Hus gonen un doa äten un drinkjen, un met miene Fru schlopen? Soo secha aus du läfst un diene Seel läft, woa ekj soont nich doonen. 12Un David säd to Uria: Bliew vondoag noch hia, un morjen kaust du trigj gonen. Soo bleef Uria dän Dach en Jerusalem. Dän näakjsten Dach 13kroagd David Uria met am to äten. Un David eet un drunk met am bat hee am bedrunken haud. Oba to Nacht jinkj Uria un schleep opp siene jewande Städ met de aunjestalde, un jinkj nich bat sien Hus.

David un Uria

14Dän näakjsten Morjen schreef David eenen Breef aun Joab, un schekj dän met en Uria siene Haunt. 15En dän Breef säd daut: Sat Uria gaunz väaren, wua de Kaumf aum heetsten es, un dan trakj diene aundre Soldoten trigj, soo daut hee dootschleit. #2Mo 20,13 16Un aus Joab rom de Staut wia, stald hee Uria opp eene Städ, wua de Fient stoakj wia. 17Un de Mana von de Staut kjeemen rut un kjamften jäajen Joab un siene Mana. Un eenje von David siene Mana worden dootjeschloagen. Un Uria de Hetita wort uk dootjeschloagen. 18Dan schekjt Joab eene Norecht no David woo aules en däm Kaumf jegonen wia. 19Joab säd to däm waut de Norecht brocht: Wan du däm Kjennich ieescht aules von däm Kaumf jesajcht hast, 20un wan de Kjennich dan veläajen es un to die sajcht: Wuarom jinkj jie soo dicht aun de Staut naun? Wist jie nich daut dee von de Mia scheeten wudden? 21Wäa schluach emol Abimelech, Jerubaal sien Sän, doot? Wia daut nich een Frumensch, waut eenen Molsteen von de Mia rauf schmeet un am bie Tebez doot schluach? Wuarom jinj jie soo dicht aun de Mia? dan saj to am: Dien Deena Uria de Hetita es uk doot. #Rech 9,53-54 22Dan jinkj dee, dee de Norecht brocht, un kjeem no David un säd am aules waut Joab aun am bestalt haud am to sajen. 23De Maun säd to David: De Mana wieren ons een stootje too stoakj un see kjeemen ut de Staut rut oppe opne Stap. Dan schmäad wie an wada trigj bat aun daut Stautspuat naun. 24Oba dan schooten see met äare Boages von opp de Mia un eenje von däm Kjennich siene Mana storwen. Un Uria de Hetita es uk doot. 25Un David säd to däm wäa de Norecht brocht: Wan du trigj jeist, dan saj Joab: “Lot die daut nich too schwoa sennen, wan daut Schwieet eemol hia un eemol doa eenen Maun nemt. Jriep noch stoakja aun un nemm de Staut en.” Spräakj am soo Moot too.

26Aus Uria siene Fru hieed, daut äa Maun jestorwen wia, truad see eene Tiet fa am. 27Un dan aus de Tiet fa daut truaren äwa wia, schekjt David wäm no ar un leet ar no sien Hus komen. Un see wort siene Fru, un see haud met de Tiet een kjlienet Junkje. Däm Harn, oba, jefoll daut nich, waut David jedonen haud.

Actualmente seleccionado:

2. Samuel 11: PB

Destacar

Copiar

Comparar