1. Kjennichs 7

Salomo but sienen Paulaust

1Salomo bud 13 Joa aun sienen Paulaust bat aules foadich wia. #1Kjen 9,10 2Hee bud een Hus waut see dän Libanon Woolt nanden. Dit wia een groota Rum dee 50 Meeta lank, 25 Meeta breet un 15 Meeta huach wia. Doa wieren dree Rieej von Zeedapast, emma 15 Past en jieda Rieej, un Zeedabaulkjes bowen opp de Past. #Jes 22,8 3Dan wia doa een Bän von Zeedaholt äwa de Baulkjes opp de 45 Past. Doa wieren 15 Zeedapast en jieda Rieej. 4Doa wieren emma dree Fenstren toop, eent äwa daut aundre, un emma jäajenäwa von eenaunda. 5De Däaren un Däarenjerechta wieren aula veakauntich un to Winkjel, un de Fenstren wieren emma dree jäajenäwa von eenaunda.

6Hee bud uk daut Hus met de Past. Dit Hus wia 25 Meeta lank un 15 Meeta breet. Dit Hus haud eene Väastow, dee uk soone Past doabennen haud un een Dak. 7Un hee bud de Troonstow, dee see uk de Jerechtstow nanden, wiels hee doa daut Jerecht utspruak. Dee wia von de Flua bat aum Bän von Zeedaholt jemoakt. 8Sien ieejnet Hus, wua hee bennen woonen deed, wia wieda no hinjen un wia krakjt soo jebut. Dan wia doa uk noch daut Hus, waut hee fa de Dochta vom ägiptischen Kjennich bud, dee hee sikj jefriet haud. #1Kjen 3,1 9Dee wieren von sea feine Steena jemoakt, von de Flua bat aum Bän, un von buten bat oppem Hoff. Daut hauden see emma von beid Sieden un aules to Winkjel un to Mot jesoacht. 10De Gruntsteena wieren aula von krakjtet Steen jemoakt, emma vea ooda fief Meeta lank, 11un de Wenj wieren von feine Steena, aula to Winkjel jehakt, un von Zeeda. 12Un de Mia runtom däm Hoff haud emma dree Schicht Steen un eene Schicht von Zeeda, krakjt soo aus de benna Hoff von däm Harn sien Hus un de Engank toom Tempel. #1Kjen 6,36

De Sachen em Tempel woaren jemoakt

13De Kjennich Salomo schekjt un leet Hiram von Tierus no am komen. #2Chr 2,12-13 14Hiram sien Voda, dee von Tierus staumd, haud goot vestonen met Brons to oabeiden, un wia oba aul jestorwen. Hiram siene Mutta wia eene Wätfru, un see kjeem von däm Staum Naftali. Hiram vestunt schmocke Sachen von Brons to moaken. Hee wia sea fäich en dee Oabeit. Hee kjeem no Salomo un muak de bronsne Sachen fa am.

De bronsne Past

(2Chr 3,15-17)

15Hiram goot twee bronsne Past, dee jieda 9 Meeta huach wieren un sas Meeta runtom mauten. #2Kjen 25,17 16Hee muak uk een Koppstekj fa jieda von dise Past. Dise wieren jieda tweeunhaulf Meeta huach. 17Jieda Koppstekj haud een Nat von säwen Kjäden runtom. 18Aun de bowakaunt von daut Nat von Kjäden wieren twee Rieej bronsne Apel. 19Jieda Koppstekj opp de Past en de Väastow wia twee Meeta huach un haud een bloomjet Mosta. 20Beid Koppstekja hauden bowa daut Nat von Kjäden, daut rom daut dikje Poat wia, twee Rieej bronsne Apel runtom. Doa wieren aules toop 200 Apel opp jieda Koppstekj. 21Hee stald de Past, eenen aun jieda Sied vom Engank toom Tempel. Hee nand dän Post aun de siedne Sied, Jachin, un dän Post aun de nuadne Sied, Boas. 22Bowen aun jieda Koppstekj wia waut no Lelje leet. Dan wieren beid Past foadich.

De groote Komm

(2Chr 4,2-5)

23Hiram muak dan waut see daut Mäa nanden. Daut wia eene groote Komm, 5 Meeta em Derchmäta, un tweeunhaulf Meeta deep. Runtom maut daut 15 Meeta. 24Opp de Kaunt von daut Mäa, dee gaunze 15 Meeta, wieren twee Rieej von bronsne Raubelkjes, en eent jegoten met daut Mäa. 25Dise groote Komm stunt oppe Rigjes von twalw bronsne Rinda. De Rinda hauden aula dän Kopp no butakaunt un stunden soo daut doa dree nom Nuaden, dree nom Wasten, dree nom Sieden un dree nom Oosten jerecht wieren. 26De Komm, dee see daut Mäa nanden, wia soo dikj aus eene Hauntbreet, un wia bowen rutjekjrapt aus een Taus, ooda soo aus eene Lelje. Doa jinjen 60.000 Lieta Wota en de Komm nenn.

27Hiram muak tieen bronsne Wauschbenkjen, dee jieda twee Meeta lank un breet wieren, un aundathaulw Meeta huach. 28Jieda Wauschbenkj wia een Jestal en woont Toflen nenn jesat worden. 29Opp de Toflen wieren Leiws, Rinda un Cheruben. Aun daut Jestal, daut bowa un unja de Leiws un Rinda wieren, wia een Kraunz aum aundren nenn jehomat. 30Jieda Wauschbenkj haud vea bronsne Räda un bronsne Aussen. Opp jieda Akj wia een bronsnet Jestal, wua de Wauschkomm bowen stunt. Jieda Akjjestal wia met krauselje Mostasch straum jemoakt, 31un dee hilden eenen Bäajel, uk runtom straum jemoakt, dreevieedel Meeta huach. Oba de Toflen wieren veakauntich un nich runt. 32De Aussen wieren en eent met de Toflen jegoten. De vea Räda, dee jieda dreevieedel Meeta huach wieren, wieren unja de Toflen. 33De Räda wieren soo jemoakt aus de Räda von Kjrichswoages. De Aussen, de Meddelstekja, de Spieekjen, un de Rinj wieren aula jegoten. 34Opp jieda Akj vom Jestal wia een Stenda, en eent met daut Jestal. 35Aun bowakaunt von de Wauschbenkj wia een bronsna Baunt, een vieedel Meeta breet, runtom daut Jestal. De Baunt hilt sikj aun Hoakes waut en eent met daut Jestal wieren. 36Aun de Kaunt von däm Baunt un aun de Toflen brocht hee Bilda von Cheruben, Leiws, un Paulmbeem, un een Kraunz aum aundren, doano aus doa Rum wia. 37Soo muak hee aule tieen Wauschbenkjen. Jieda Wauschbenkj wia äwareen jegoten un haud de selwje Mot un daut selwje Jeschekj.

38Hee muak tieen bronsne Wauschkommen. Jieda Komm wia twee Meeta em Derchmäta, un hilt 1.200 Lieta. 39Fief von de Wauschbenkjen worden aun de siedne Sied vom Tempel jesat, un fief aun de nuadne Sied. Daut Mäa wort en de siedoostne Akj vom Tempel jestalt. #2Chr 4,11—5,1

40Hiram muak uk de Gropes, de Scheflen un de Kommen.

Dit sent dan aul de Sachen dee Hiram fa Kjennich Salomo fa däm Harn sien Hus muak: 41Hee muak de twee Past, un de twee Koppstekja, dee bowen opp de Past nopp kjeemen; de twee Nats von säwen Kjäden toom äwa de twee Koppstekja; 42de 400 Apel, dee emma 100 en eene Rieej, twee Rieej opp jieda eent von de Koppstekja, waut opp de Past nopp kjeemen; 43de tieen Wauschbenkjen, un de tieen Wauschkommen toom opp de Benkjen; 44daut eene Mäa, daut opp de twalw Rinda stunt; 45un de Gropes, Scheflen un Kommen. Aul dise Sachen, dee Hiram fa dän Kjennich Salomo fa däm Harn sien Hus bud, wieren von Brons jemoakt. 46De Kjennich leet daut aula en de Schmäd, dee tweschen Sukkot un Zaretan en daut Jordan Tol licht, moaken. 47Salomo leet de Sachen nich wäajen, wiels doa wieren soo väl, daut see dee nich wäajen kunnen.

48Un Salomo leet uk aul de goldne Sachen fa däm Harn sien Hus moaken: dän goldnen Aultoa, dän goldnen Desch fa de jeweide Brood, 49de tieen Laumpenhoolasch, fief fa de siedne un fief fa de nuadne Sied ver daut Aulaheilichste, aula von Golt; de Bloomen, de Laumpen un de Gauflen, aula von Golt; 50de Kuffels, de Scheeren toom de Dochten besorjen, de Schatels fa de Scheeren, de Schatels fa dän Weiruak, de Glootpaunen aula von Golt; de Däarejräpen fa daut Aulaheilichste, un de Däaren toom Engank toom Tempel, aula von Golt.

51Un Salomo verecht aul de Oabeit fa däm Harn sien Hus. Un Salomo brocht aul de Sachen von Golt un Selwa, dee sien Voda David aul jeweit haud, un oppbewoad dee en de Stowen en däm Harn sien Hus.

Actualmente seleccionado:

1. Kjennichs 7: PB

Destacar

Copiar

Comparar