1. Kjennichs 8

De Bundeskjist woat nom Tempel jebrocht un de Tempel woat enjeweit

(2Chr 5,2—6,2)

1Dan leet de Kjennich Salomo aul de Leidasch von de Stam un Famieljes en Israel ver am en Jerusalem toopkomen. Dit wia toom dän Harn siene Bundeskjist von de Davidstaut, daut es Zion, nopp brinjen. 2Un aule Mana von Israel kjeemen no däm Kjennich Salomo to daut Fast, daut en de säwende Moonat, de Moonat Etanim, kjemt. 3Aus aul de Leidasch von Israel doa wieren, neemen de Priesta däm Harn siene Bundeskjist 4un druagen dee no däm Tempel. De Priesta un Leviten brochten uk daut Vesaumlungszelt un aul daut jeweide Toobehia, waut doabennen wia. 5Un de Kjennich Salomo un de gaunze Vesaumlunk von Israeliten, dee doa wieren, opfaden ver de Bundeskjist Schop un Bolles, soo väl daut dee nich to talen wieren. #2Sam 6,13 6Dan brochten de Priesta däm Harn siene Bundeskjist en de Bennastow, daut Aulaheilichste, en däm Tempel nenn un stalden daut unja de Flichten von de Cheruben. #2Sam 6,17; 1Kjen 6,27 7De Flichten von de Cheruben wieren äwa de Kjist utjespreet un bedakjten de Kjist un de Droagstangen. 8De Droagstangen wieren soo lank daut de Enja von en de Heilje Stow to seenen wieren. Dee wieren oba nich to seenen von buta de Stow. De Droagstangen sent doa bat aum vondoagschen Dach noch emma. 9Doa wia nuscht en de Kjist aus de twee Steentoflen, dee Moses doa bie däm Horeb Boajch nenn jelajcht haud. Daut wia don aus de Har dän Bunt met daut Volkj Israel muak aus see ut Ägipten kjeemen. #2Mo 25,21; 5Mo 10,5 10Un aus de Priesta ut de Heilje Stow rutkjeemen, feld eene Wolkj dän Tempel 11un wort soo harlich aus de Har es, soo daut de Priesta nich lenja en dän Tempel deenen kunnen. #2Mo 40,34-35

12Un Salomo säd: De Har haft de Sonn aum Himmel jesat, oba hee sajcht daut hee em diestren wonen wull. #2Mo 20,21 13Ekj hab die nu een schmocket Hus jebut, eene Städ wua du opp emma wonen kaust. #2Chr 6,3-21

14Un de Kjennich Salomo dreid sikj no de Vesaumlunk von Israeliten, dee doa ver am stunden, un spruak dän Säajen äwa an, 15un hee säd: Preist däm Harn, Israel äaren Gott, daut hee daut Vespräakjen, woont hee mienen Voda David jeef, haft en Erfellunk jebrocht. Hee säd to am: 16Von don aus ekj mien Volkj, de Israeliten ut Ägipten brocht, hab ekj kjeene Staut jewält en aule Stam en Israel, daut mie doa sull een Hus jebut woaren om mienen Nomen auntoroopen. Oba ekj hab die, David, jewält, om mien Volkj to rejieren. 17Oba mien Voda, David, plond doaraun, een Hus to buen wua de Har, Israel äa Gott, sull aunjebät woaren. #(17-19) 2Sam 7,1-16 18Oba de Har säd to mienen Voda David: Daut es goot daut du een Hus buen wust fa mienen Nomen. 19Du saust daut oba nich doonen. Dien Sän, dee dien Kjint es, saul daut Hus fa mienen Nomen buen. 20Nu haft de Har daut Vespräakjen Woarheit loten woaren. Ekj sie en mien Voda David siene Städ Kjennich jeworden un rejia äwa Israel, krakjt soo aus de Har vesproaken haud, un ekj hab daut Hus jebut fa däm Harn, Israel äaren Gott, sienen Nomen. 21Un ekj hab doa eene Städ fa de Bundeskjist jemoakt. De Bundeskjist es de Bewies fa dän Bunt dän de Har met onse Vodasch muak, aus hee an ut Ägipten rut brocht.

22Dan stald Salomo sikj ver däm Harn sien Aultoa, doa ver de Vesaumlunk von Israeliten. Un hee hoof siene Henj opp no däm Himmel 23un säd: Har, Israel äa Gott, doa es en däm Himmel äwa ons un opp de Ieed hia unjen kjeen Gott soo aus du. Du helst dienen Bunt un diene truhoatje Leew met dee, dee die deenen un em vollen Jehuarsom ver die läwen. 24Du hast vondoag daut Vespräakjen, daut du to dienen Deena, mienen Voda David, rädsd, derch diene Krauft jehoolen. 25Un nu, Har, Israel äa Gott, hool uk daut Vespräakjen daut du dienen Deena, mienen Voda David, jeefst, aus du sätst: Daut woat nich väakomen, daut nich eena von diene Nokomen woat Kjennich äwa Israel sennen, wan diene Säns doano woaren seenen, daut see en soon Jehuarsom läwen aus du deist. 26Un nu, Israel äa Gott, lot diene Wieed soo utkomen, aus du dee to mienen Voda David sätst, dee die deend. 27Oba woat Gott werkjlich opp de Ieed wonen? Wie weeten, daut nich emol de Himmel un de jratsta Himmel fa die rum haben, wooväl weinja dan dit Hus, daut ekj jebut hab! #Jes 66,1; Apost 17,24 28Doch, Har mien Gott, horch no waut dien Deena sajcht, un jeff daut, no waut hee die vondoag bät. 29Lot daut diene Uagen Dach un Nacht no dit Hus kjikjen, no dee Städ von woone du jesajcht hast: Mien Nomen saul doa sennen. Muchst du no daut Jebäd horchen woont ekj bie disen Tempel bäd. #2Mo 20,24; Sach 12,4 30Un horch uk no daut, waut dien Deena un dien Volkj Israel sajcht, wan wie hia komen toom aunbäden. Muchst du, wan du daut en diene Woninj en däm Himmel hieescht, doano horchen un vejäwen.

Em Tempel bäden

(2Chr 6,22-40)

31Wan een Mensch jäajen sienen näakjsten sindicht, un dan no dien Aultoa en dien Hus jebrocht woat, un hia opp eenen Eit sien Wuat jeft, daut hee oschuldich es, 32dan horch du em Himmel, un doo waut du aus rajcht sitst. Lot eene Strof opp däm komen, dee schuldich es, un beloon däm, dee em rajchten es.

33Wan dien Volkj Israel von äare Fiend jeschloagen woaren, wiels wie jäajen die jesindicht haben, un wie ons dan wada no die kjieren, un en dit Hus dienen Nomen de rajchte Aunerkjanunk jäwen, un die aunbäden un die wäajen ons froagen, 34dan horch du em Himmel un vejeff dien Volkj Israel äare Sind, un brinj an wada en daut Launt, woont du äare Vodasch jeefst.

35Wan de Himmel veschloten woat, un doa kjeen Räajen felt, wiels see jäajen die jesindicht haben, wan see sikj dan, wan du an bestrofen deist, no dienen Tempel rechten un dienen Nomen ieren un von äare Sind wajchdreien, #1Kjen 17,1 36dan horch no an en däm Himmel. Vejeff diene Deena, dien Volkj Israel, äare Sind, un unjarecht an waut de gooda Wajch es, dän see gonen sellen, un schenkj Räajen opp daut Launt, woont du dien Volkj aus een Oafgoot jejäft hast.

37Wan doa eene Hungaschnoot opp daut Launt kjemt, wan Krankheiten utbräakjen, wan de Flekja befaulen ooda vestocken, ooda Graushoppa ooda Rupen komen, wan de Fient an en irjent eene Staut äwafelt, ooda wan irjent eene Ploag ooda Krankheit kjemt, 38dan auntwuat äa Jebäd. Wan aule Menschen ooda uk wan een Mensch daut leet woat, waut doa orrajcht es, un sikj met sien gaunzet Hoat no dit Hus recht un bät, 39dan horch em Himmel, wua du wonst no an. Vejeff an un jeff an doano aus see em Hoat vedeent haben. Du, un du auleen weetst waut en daut Hoat vom Mensch es. #Psa 139,1-2 40Muchten see die emma jehuarsom sennen en daut Launt woont du äare Vodasch jeefst.

41Doa woaren framde, dee nich von dien Volkj sent, häa komen wäajen dienen Nomen. #4Mo 15,14-16 42Aundre Lied woaren von dienen grooten Nomen un diene groote Macht un daut waut du jedonen hast hieren. Wan soona no dien Hus kjemt om to bäden, 43dan auntwuat du am von en däm Himmel wua diene Woninj es. Jeff am aul daut, no waut de framda die aunbät, soo daut aule Velkja oppe Ieed dienen Nomen kjanen lieren un die ferchten, soo aus dien Volkj Israel. Soo woaren de Velkja daut weeten kjennen, daut en dit Hus, woont ekj jebut hab, dienen Nomen auntoroopen es.

44Wan dien Volkj en eenen Kjrich jäajen däm Fient jeit, doa wua du an schekjst, un see sikj no dise Staut, dee du jewält hast, un no disen Tempel, dän ekj jebut hab, rechten, un däm Harn aunbäden, 45dan beauntwuat du an äa Jebäd un horch von em Himmel no waut see froagen, un doo daut rajchte.

46Daut kunn woaren, daut see jäajen die sindjen, wiels doa es kjeen Mensch onen Sind, un daut du jäajen an schaufst un an dän Fient äwajefst, soo daut see en dän Fient sien Launt veschlapt woaren, eendoont auf wiet auf ooda nich. #Psa 14,3-4; Reema 3,23 47Dan kunnen see doa en daut Launt, wua du an hanjefieet hast, sikj daut to eene iernste Sach moaken, un bekjanen, un die en daut framde Launt aunbäden un sajen: Wie haben jesindicht; wie sent schlajcht un jäajenaun jewast. #Neh 9,33; Dan 9,5 48Wan see dan en daut Launt, wua see veschlapt sent, met äa gaunzet Hoat un met aul äare Jedanken omkjieren, un no die en dit Launt, daut du äare Vodasch jeefst, un no dise Staut, dee du jewält hast un dit Hus woont ekj fa dienen Nomen jebut hab, bäden, #Dan 6,11 49dan auntwuat an. Von diene Woninj em Himmel, horch no äa Jebäd un no waut see froagen, un doo waut rajcht es. 50Vejeff dien Volkj aul de Dinja wua see jäajen die jesindicht haben un sikj jäajen die vegonen haben. Un jeff an Metleet von dee, dee an faustjenomen haben, daut see dee jenstich sent. 51Doo daut wiels see dien Volkj sent un gaunz die jehieren, wiels du an ut Ägipten, ut dän iesanen Owen jebrocht hast.

52Muchten diene Uagen op sennen un daut Jebäd von dienen Kjnajcht un dien Volkj Israel hieren. Auntwuat an jiedatsmol, wan see die aunroopen. 53Du hast an von aule Velkja opp de Ieed rutjeläst, daut see gaunz dient sennen sellen, soo aus du derch Moses, dienen Deena, sätst, aus du, Har ons Gott, onse Vodasch ut Ägipten brochst. #2Mo 19,5-6

54Aus Salomo derch wia met dit Jebäd un waut hee to froagen haud ver däm Harn, stunt hee opp von ver däm Harn sien Aultoa, wua hee met siene Oarms no däm Himmel jestrakjt jekjneet haud. 55Hee stunt opp un spruak dän Säajen äwa de gaunze Vesaumlunk von Israeliten. Met eene lude Stemm säd hee: 56Preist däm Harn dee sien Volkj Israel Fräd jejäft haft, krakjt soo aus hee vesproaken haud. Doa es nuscht utjebläwen von aul siene goode Vespräakjen, dee hee sienen Deena Moses jeef. #Jos 21,45 57Mucht de Har ons Gott met ons sennen soo aus hee met onse Vodasch wia. Mucht hee ons nich veloten ooda em Stäakj loten. 58Mucht hee onse Hoaten no sikj trakjen, soo daut wie opp sienen Wajch gonen un siene Jebooten, Jesazen un Väaschreften hoolen, dee hee onse Vodasch oppjeef. 59Muchten dise miene Wieed, met dee ekj däm Harn aunjeroopt hab, däm Harn emma noaun sennen, un mucht hee daut rajchte doonen fa sien Volkj Israel soo aus jieda Dach daut velangt. 60Muchten aule Velkja opp de Ieed daut weeten, daut de Har Gott es. Doa es kjeen aundra. 61Mucht jie emma tru to däm Harn, onsen Gott, sennen un siene Jesazen un Jebooten jehuarsom sennen, soo aus vondoag.

Daut ieeschte Fast em Tempel

62Dan brochten de Kjennich un aul de Israeliten met am Opfa ver däm Harn. 63Salomo opfad 22.000 Rinda un 120.000 Schop fa daut Dankopfa fa däm Harn. Soo weiden de Kjennich un daut gaunze Volkj däm Harn sien Hus en. 64De Kjennich weid uk dän Meddelhoff en, dee ver däm Harn sien Hus es. Daut es wua hee daut Brauntopfa, daut Ätesopfa un daut Fat fa de Dankopfa brocht, wiels de bronsna Aultoa, waut ver däm Harn steit, too kjlien wia fa aul de Opfa. 65Soo muak Salomo en dee Tiet een Fast fa däm Harn, äaren Gott, un daut gaunze Israel wia met am. Daut wia eene sea groote Vesaumlunk von Menschen von Hamat bat aum Ägiptischen Riefa. Daut Fast hilt säwen Doag aun, un dan noch emol säwen Doag; vieetieen Doag aules toop. 66Dan aum achten Dach, leet hee daut Volkj trigj no Hus gonen. See wieren sea mootich äwa aul daut goode waut de Har fa sienen Deena David un sien Volkj Israel jedonen haud.

Actualmente seleccionado:

1. Kjennichs 8: PB

Destacar

Copiar

Comparar