1. Kjennichs 6

Salomo but Gott sienen Tempel

(2Chr 3,1-4)

1En daut 480. Joa, no däm daut de Israeliten ut Ägipten rutkjeemen, un en Salomo sien vieedet Joa aus Kjennich, en de Moonat Siw, daut es de tweede Moonat, fungen see aun daut Hus fa däm Harn to buen. #Mat 1,17 2De Tempel wia 30 Meeta lank, 10 Meeta breet un 15 Meeta huach. 3De Engank ver däm Tempel wia 10 Meeta breet, soo breet aus de Tempel selfst, un 5 Meeta rut. #1Kjen 7,15-21 4Hee muak Fenstren en de Wenj, met Stangen doaräwa. 5Aun jiedat Sied un opp daut Enj bud hee dreestockich aun, soo daut doa väl Stowen wieren. 6Daut unjaschte Stock wia tweeunhaulf Meeta breet, daut tweede, dree Meeta breet, un daut dredde, dreeunhaulf Meeta breet. De Tempelwaunt wia met jieda Stock een haulwet Meeta denna, soo daut de Dräaja opp de Kaunt aun de Waunt ligjen kunnen un nich en de Waunt nenn jebrocht worden. 7De Steena fa daut Hus wieren aula aul en de Boaj trajcht jehakt, soo daut biem buen kjeen Homa, Akjs, ooda aundret iesanet Jereetschoft to hieren wieren. 8De Engank to daut unjaschte Stock wia aun de siedne Kaunt vom Tempel. Dan wieren doa Trapen no daut tweede Stock un von daut tweede no daut dredde Stock. 9Daut es woo Salomo dän Tempel bud un foadich muak. Hee muak daut Dak von zeedane Dräaja un Bräda. 10De Stowen runtom däm Tempel wieren aula tweeunhaulf Meeta huach, un wieren met Zeedabaulkjes aum Tempel faustjemoakt.

11Dan säd de Har to Salomo: 12Wan du aul miene Jebooten un Jesazen hoolen woascht un de Väaschreften jehorchen woascht un doano läwen, dan woa ekj daut loten soo romkomen aus ekj to dienen Voda David säd. #2Sam 7,13 13Ekj woa mank de Israeliten wonen un woa mien Volkj nich veloten. #2Mo 29,45

De Tempel von bennen

(2Chr 3,5-14)

14Salomo bud dän Tempel un muak dän foadich. #Apost 7,47 15Von bennen wieren de Wenj met Zeedaholt jemoakt, von de Flua bat aum Bän. De Flua wia met Taunenholt jedakjt. 16Bennen muaken see eene Dwäawaunt, tieen Meeta vom Enj. Dee wia von Zeedaholt jemoakt un rieekjt von de Flua bat aum Bän. Hinja de Waunt wia de Woninj fa däm Harn, daut Aulaheilichste. 17De Stow waut ver daut Aulaheilichste wia, wia 20 Meeta lank. 18De Bennawaunt wia gaunz met Zeedaholt jemoakt; doa wia kjeen Steen to seenen. Daut Zeeda bennen en daut Hus wia utjeschnizt met een Mosta von Bloomen un Knoppes. 19De hinjaschte Stow leet Salomo foadich moaken fa daut Aulaheilichste. Doa sull däm Harn siene Bundeskjist stonen. 20Daut Aulaheilichste wia tieen Meeta lank, tieen Meeta breet un tieen Meeta huach. De Stow wia von bennen gaunz met Golt belajcht. De Aultoa wort von Zeeda jemoakt un met Golt belajcht. #1Kjen 7,48 21Un Salomo beläd dän Tempel von bennen met reinet Golt, un hee muak goldne Kjäden ver daut Aulaheilichste un betrock daut met Golt. 22De Tempel wia von bennen gaunz met Golt belajcht, krakjt soo aus de Aultoa en daut Aulaheilichste. 23En daut Aulaheilichste muak hee twee Cheruben von Oliewenholt. Dee wieren jieda 5 Meeta huach, #2Mo 37,7-9 24un jieda Flicht wia tweeunhaulf Meeta lank, soo daut et 5 Meeta von eene Spetz Flicht bat de aundre Spetz wia. 25De Cheruben wieren äwareen un jlikje groot. 26Dee wieren jieda 5 Meeta huach. 27Hee sad de Cheruben en daut Aulaheilichste. Dee stunden eena biesied dän aundren, soo daut äare Flichten enne Medd toopschieeden, un met de aundre Flichten schieeden see de Wenj aun. 28De Cheruben wieren met Golt beschloagen. 29De Wenj en de groote Stow un uk en de benna Stow hauden jeschnizte Figuaren von Cheruben, Paulmbeem, un Bloomen en daut Holt. 30De Flua en beid Stowen wia met Golt belajcht. 31De Engank to daut Aulaheilichste haud dobbelde Däaren, von Oliewenholt jemoakt. Daut Däarejerecht wia von fief kauntje Stendasch jemoakt. 32Daut Oliewenholt en de Däaren wia jeschnizt met Figuaren von Cheruben, Paulmbeem un Bloomen. De Däaren, de Cheruben, un de Paulmbeem wieren met Golt belajcht. 33Daut Däarejerecht fa dän Engank en de groote Stow nenn wia von Oliewen Holt un haud veakauntje Stendasch. 34De Däaren en däm Engank wieren von Taunenholt, un jieda Däa wia en twee halften, waut sikj aunenaunda toopläden. 35Dise Däaren hauden Cheruben un Paulmbeem un Bloomen doa nenjeschnizt, un wieren no dee Mostasch dan met Golt belajcht. 36Rom däm Tempel bud hee dän Bennahoff. De Mia wia von dree Schicht Steen un eene Schicht Zeedaholt.

37Hee läd dän Grunt fa dän Tempel en de 2. Moonat, de Moonat Siw, en daut 4. Joa daut Salomo Kjennich wia. #1Kjen 6,1 38Un en daut 11. Joa, en de 8. Moonat, de Moonat Bul, wia aules aun daut Hus foadich, krakjt soo aus hee daut jeplont haud. Daut haud säwen Joa jedieet daut to buen.

Actualmente seleccionado:

1. Kjennichs 6: PB

Destacar

Copiar

Comparar