1. Kjennichs 5

See moaken reed toom dän Tempel buen

1Salomo rejieed de gaunze Jäajent vom Eufrat Riefa bat de Filista äa Launt un bat aun de Jrens von Ägipten. Dise Lenda brochten emma äaren Taks no Salomo soo lang aus hee läwd. #1Mo 15,18 2Fa een Dach brukt Salomo met aul siene Menschen vea Tonn fienet Mäl un sasunhaulf Tonn growet Mäl, 3tieen jemaste Ossen, 20 Stekj Vee vonne Weid, un 100 Schop; doatoo worden dan noch veschiedne Sorten Ree un veschiedne Sorten Heena un Väajel jebrocht. 4Salomo rejieed äwa de gaunze Jäajent wasten vom Eufrat Riefa, von Tifsach bat Gaza; äwa aul de Kjennichs wasten vom Eufrat. Hee haud Fräd aun aule Sieden runtom am. 5Derch Salomo siene gaunze Tiet läwden de Lied en Juda un Israel onen irjent eene Jefoa von aundre Velkja, von Dan bat Beerscheba. Een jiedra haud siene Wienrank un sienen Fiejenboom. #3Mo 25,18 6Salomo haud 4.000 Riem met Pieed fa siene Kjrichswoages, un 12.000 Maun toom de Pieed besorjen un aunhaunt haben. #2Chr 9,25 7De twalw Mana fa dän Väarot sorjden fa daut, waut Kjennich Salomo aule Dach brukt, un fa dee, dee aun däm Kjennich sienen Desch eeten. Jieda eena wia veauntwuatlich fa eene Moonat. Dee sagen doano, daut doa von aules jenuach wia. 8Jieda eena von de Mana fa dän Väarot sagen uk doano, wan see aun de Rieej stunden, daut doa Joascht un Stroo oppe rajchte Städ wia fa de veschiedne Pieed.

9Gott jeef Salomo butajeweenlich väl Weisheit un Vestentnis. Salomo wist om sooväl om, daut et soo schwoa auftoschazen wia aus daut Saunt aum Mäa. 10Salomo siene Weisheit wia jrata aus de Weisheit von de Mana em Oosten ooda aus aule Weisheit en Ägipten. 11Hee haud mea Weisheit aus irjent sestwäa, mea aus Etan de Esrachita un mea aus Heman, Kalkol un Darda, Mahol siene Säns. Hee wia en aule Lenda runtom bekaunt fa siene Weisheit. 12Salomo haft 3.000 Spricha jedicht, un 1.005 Leeda. #Liera 12,9 13Hee wist om de veschiedenste Beem, von de Zeeda en Libanon krakjt soo goot aus von daut Iessoppstruck, daut opp de Waunt waust. Hee räd von wille Tieren un Väajel, un von Kruptieren un Fesch.

14Doa kjeemen Mana von aule Lenda om Salomo siene Weisheit too to horchen. Dee kjeemen von aule Kjennichs oppe Ieed, dee von siene Weisheit jehieet hauden.

Kontrakt met Kjennich Hiram

(2Chr 2,2-15)

15Hiram, de Kjennich en Tierus, schekjt Mana no Salomo, aus hee hieed daut hee en sien Voda siene Städ Kjennich jeworden wia. Hiram hilt emma sea väl von David. #2Sam 5,11 16Un Salomo schekjt Norecht trigj no Hiram un säd: 17Du weetst, daut wäajen David mien Voda sooväl met de Lenda runtom kjriejen must, kunn hee nich een Hus fa däm Harn sienen Gott buen, bat de Har am aul siene Fiend en siene Macht jejäft haud. 18Oba nu haft de Har mien Gott mie Fräd jejäft aun aule Sieden. Doa es kjeen Fient un kjeene Jefoa. 19Doawäajen plon ekj nu een Hus to buen fa däm Harn mienen Gott. De Har säd to David, mienen Voda, daut sien Sän, dän hee opp sienen Troon en siene Städ saten wudd, dee sull fa däm Harn een Hus buen. #2Sam 7,13 20Un nu es daut bat doa. Bestal aun diene Mana daut see sellen Zeedabeem en Libanon aufmoaken fa mie. Ekj woa uk von miene Oabeida hanschekjen, un woa diene Oabeida soo betolen aus du sajchst. Du weetst goot, daut miene Oabeida vestonen sikj nich met Beem aufmoaken, soo aus diene Mana von Sidon daut vestonen. 21Aus Hiram dise Norecht von Salomo kjrieech, freid hee sikj sea, un hee säd: Ekj preis däm Harn vondoag, dee David eenen weisen Sän jejäft haft toom äwa sien grootet Volkj to rejieren. #1Kjen 10,9 22Un Hiram schekjt eene Norecht no Salomo un säd: Ekj hab diene Norecht jekjräajen met daut no waut du frajchst. Ekj sie reed die daut Zeedaholt un Taunenholt soo to stalen aus du daut west. 23Miene Oabeida woaren daut Holt no daut Mäa brinjen un de Kjneppels toopbinjen un opp daut Mäa doahan brinjen, wua du sajchst. Doa woaren miene Oabeida junt daut Holt äwajäwen. Aules waut ekj von die velang es daut du Äten stalst fa miene Menschen. 24Un soo wia daut, daut Hiram aul daut Zeeda un uk aundret Holt stalen kunn, waut Salomo brucken kunn. 25Un Salomo jeef Hiram jieda Joa 3.000 Tonn Weit un 6.000 Lieta Olieweneelj. #1Kjen 5,2 26Un krakjt soo aus de Har daut vesproaken haud, jeef hee Salomo Weisheit. Doa wia Fräd tweschen Hiram un Salomo, un see vespruaken sikj daut unja eenaunda en eenen Vetrach.

Salomo siene Oabeida

(2Chr 2,1-17)

27Kjennich Salomo velangd 30.000 Oabeida von aulawäajen en Israel, daut dee fa am schauften. 28Adoniram wia de Äwasechta äwa dise Oabeida. De Oabeida wieren en dree Gruppen jedeelt. Jieda Grupp haud 10.000 Mana. Dee musten emma eene Moonat en Libanon schaufen, un twee Moonat tus. #1Kjen 4,6 29Salomo haud 80.000 Oabeida en de Boaj toom Steena behaken, un 70.000 toom Steena droagen. 30Hee stald 3.300 Oppsechta äwa de Oabeida, om daut gaunze to leiden. 31Salomo leet groote diere Steena uthaken, daut see dee aus Gruntsteena unja daut Hus saten kunnen. 32Soo schauften Salomo siene Oabeida un Hiram siene Oabeida un uk Mana von Gebal aun de Steena un daut Holt un muaken daut reed fa dän Tempel. #Jos 13,5; Hes 27,9

Actualmente seleccionado:

1. Kjennichs 5: PB

Destacar

Copiar

Comparar