Sal 9
9
Bix roma ri Dios pa ruchojmilal nuq'et-tzij*f7*
1Jehová, kan ninya' aq'ij rik'in ronojel wánima.
Kan xtintzijoj k'a ronojel ri meyel taq abanobal.
2Kan xkikikot y xkinimaq'ijun awik'in rat.
Kan xtinbixaj ri abi', rat ri atk'o pa ruwi' ronojel.
3Ri e etzelanel wichin kan ye'animej k'a chawech rat.
Toq nak'ut-awi' chikiwech, rije' xa yetzaq y yek'is.
4Rat kan pa ruchojmilal k'a xaq'et-tzij pa nuwi';
kan k'a chiri' k'a pan atz'uyubal richin q'atbel-tzij xach'on pa nuwi'.
5Xaben k'a chike ri winaqi' richin ri ruwach'ulew chi xkixibij-ki';
xe'ak'is k'a ri e banoy taq etzelal;
xaben chi ri kibi' man jun bey chik xnatex chuwech re ruwach'ulew.
6Ri e etzelanel kan xek'is k'a richin jantape';
kan xetzaq k'a ri nima'q taq kitinamit ri xe'atzeq rat.
Kan man jun k'a natabel kichin xk'oje' kan.
7Jak'a ri Jehová kan xtik'oje' tibe-q'ij tibe-seq.
Xtik'oje' k'a chupan ri rajawaren richin nuq'et-tzij.
8Rija' xtiq'aton-tzij pa ruwi' ri ruwach'ulew rik'in ruchojmilal;
kan xtuya' k'a pa kiwi' ri tinamit ri ruk'amon.
9Rija' kan xkeruto' k'a ri yetz'ilox,
rik'in k'a rija' xtikito-wi-ki' ri ek'o pa q'axo'n.
10Jehová kan awik'in k'a rat xtikikuquba-wi kik'u'x ri ketaman awech,
roma rat, man jun bey ye'amalij kan ri yekanon awichin.
11Tibixaj rubi' ri Jehová, ri k'o chiri' pa Sión.
Titaluj k'a rutzijol ri pa taq tinamit ri nima'q taq rubanobal.
12Ri Dios kan ye'oqaqa chuk'u'x ri ek'o pa tijoj-poqonal y nrak'axaj ri kich'owen;
y kan nuya' k'a rutojbalil chike ri kamisanela'.
13Tabana' utzil Jehová tajoyowaj nuwech yin;
tatzu' re q'axo'n re nink'owisaj koma ri ye'etzelan wichin,
kan kinakolo' k'a chuwech ri kamik,
14keri' yin xkitikir xtinq'alajirisaj chuchi' ri Jerusalem, chi xaxe rat ruk'amon niya'ox aq'ij,
chiri' k'a xkikikot-wi yin, roma kan in akolon.
15Ri winaqi' richin ch'aqa' chik ruwach'ulew xekibanala' jul,
xekiyala' pikbel y xa ja rije' ri xeqaqa chupan.
16Ri Jehová kan xuk'ut k'a ri' chi rija' pa ruchojmilal niq'aton-wi-tzij;
jak'a ri e banoy taq etzelal xa xetzaq chupan ri pikbel ri kibanon rije'.
17Ri e banoy taq etzelal xa xke'apon chupan ri jul richin muqbel,
ri maneq Dios chikiwech xa chupan k'a ri tojbel-mak xkebe-wi.
18Ri Dios kan man yerumestaj ta ri k'o nik'atzin chike,
ri oyobenri'il kichin ri ek'o pa meba'il, kan man xtik'is ta qa.
19¡Jehová, kayakatej k'a!
man taya' q'ij chi ri winaqi' nikinimirisaj-ki' chawech rat.
Taq'ata-tzij pa kiwi' ri man yatkitzeqelibej ta.
20Taya' xibinri'il kik'in rije'.
Tiketamaj k'a ri ch'aqa' chik ruwach'ulew chi rije' xa e winaqi'.
Actualmente seleccionado:
Sal 9: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
