Sal 10
10
Ch'owen rik'in ri Dios richin yek'is ri banoy taq etzelal
1Jehová, ¿achike k'a roma k'a nej atk'o-wi,
y nawewaj-awi' toq k'o ruk'ayewal?
2Ri banoy etzelal rik'in nimirisanen rutzeqeliben ri k'o pa meba'il.
Ri pikbel ri rubanon xa ja rija' ri xtitzaq chupan.
3Kan nikikot k'a rik'in ri rurayibel ri ránima,
nikikot chuqa' kik'in ri yebanon etzelal y kan yaretzelaj rat.
4Roma nim nuna-ri', kan man yarukanoj ta rat,
kan man yarunataj ta k'a chupan ronojel ri nuch'ob.
5Man rik'in ri', ronojel ri nuben, utz nel chuwech.
Chuwech rija' ri aq'atbel-tzij rat Jehová kan nej k'o-wi.
Rija' kan nitze'en k'a chikij ri ye'etzelan richin.
6Kan nubij k'a qa pa ránima: Yin man jun xtitzaqon wichin;
stape' xtibe-q'ij xtibe-seq, man jun ruk'ayewal xtinwil, nicha-qa.
7Ri pa ruchi' kan xaxe etzelanik, yoq'onik y q'oloj k'o;
ri ruch'abel kan ruyon tz'ukun-tzij y ya'ol q'axo'n.
8Niq'eleben k'a chikinaqaj ri ko'ol taq tinamit;
pan ewel k'a yerukamisaj ri maneq kimak;
Kan rutzuliben k'a ri man nitikir ta nuto-ri'.
9Niq'eleben achi'el nuben jun koj toq k'o pa rusok;
chiri' k'a nichajin-pe, royoben chi napon ri wineq pa ruq'a';
y toq k'o chik pa ruq'a', nuk'uaj chupan ri pikbel ri rubanon kan.
10Ruwononen-ri' y rewan-ri',
y kan e k'iy k'a yeqaqa pa ruq'a'.
11K'ari' nubij chik qa pa ránima: Ri Dios xa numestaj ronojel;
rija' man nitzu'un ta pe, man jun bey xtutz'et re', nicha-qa.
12¡Wakami, kayakatej k'a nimalej Jehová Dios!
Tayaka' ri aq'a' y man ke'amestaj ri ek'o pa meba'il.
13¿Achi'el toq nakoch' chi yatkixowaj ri e banoy etzelal,
y nikibij-qa pa kánima chi rat xa man naq'et ta tzij pa kiwi'?
14Rat kan atzuliben ri tijoj-poqonal ri nikik'owisaj ri winaqi',
kan ach'obon chik richin xke'ato'.
Ri man jun nito'on kichin, kan awik'in rat kikuquban-wi kik'u'x;
rat kan at to'onel kichin ri meba'i'.
15Jehová, tawelesaj kuchuq'a' ri e banoy etzelal;
kan taya' k'a ri rutojbalil ri kimak,
kan man jun mak tik'oje' kan ri maneq ta rutojbalil.
16¡Jehová, ja rat at qa-rey richin q'asen!
ri man yatkitzeqelibej ta, xa xkek'is jumul.
17Ri kirayibel ri kiqasan-ki' chawech, kan jantape' nawak'axaj;
kan naya' ruchuq'a' ri kánima y ye'ato'.
18Taq'ata-tzij pa kiwi' ri meba'i' y ri yetz'ilox,
richin chi ri banoy etzelal man ta chik xtuben etzelal chike.
Actualmente seleccionado:
Sal 10: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
