خروج ۳۹
۳۹
کأهینأنٚ رختَ آمأدَه کودن
1 بأزون کأهینأنٚ رِه او آبی، ارغوأنی و سورخٚ نخأنٚ جَا رختأن بٚبأفتٚد. او زمأت کی قدس میأن خیدمت کودیدی اَ رختأنَ دوکودیدی. هارونٚ کأهینٚ موقدسٚ رختٚم هوطؤ کی خوداوند موسایَ دستور بٚدأ بو، آمأدَه بوسته.
ایفودَ آمأدَه کودن
2 ریز بأفٚ کتأن و آبی، ارغوأنی و سورخٚ نخأنٚ جَا و او رشتهیأن کی طلأ جَا بو کأهینٚ ایفود چأکوده بوسته. 3 اوشأن طلأ ورقأنَ چوکوش بٚزِده کی نأزٚکَ بوسته، بأزون اوشأنَ وأوِده، رشتهیأنٚ مأنستَن چأکودٚد و آبی، ارغوأنی و سورخٚ نخأن و ریز بأفٚ کتأنٚ اَمرأ ایفودٚ چأکودنٚ رِه ایستفأده بوکودٚد و دیقّتٚ اَمرأ ایفودٚ رو گولدوجی بوکودٚد. 4 ایفود دوتأ قیسمتٚ جَا، پوشت و جولو چأکوده بوبوسته و دوتأ بند اَمرأ شأنهیأنٚ سٚر کسکسَ دوچوکستٚده. 5 هوطؤ کی خوداوند موسایَ دستور بٚدأ بو، ایفودٚ قئیشٚ بند، اونَ دوچوکسته و جٚه ایفودٚ جینس بو، ینی جٚه طلأ رشتهیأن و ریز بأفٚ کتأن و آبی، ارغوأنی و سورخٚ نخأن. 6 طلأ قأبأنٚ میأن دوتأ جزعٚ سنگ بٚنأده و بنیایسرأییلٚ طأیفه نأمأنَ ایتأ مخصوصٚ مهأرتٚ اَمرأ او دوتأ سنگٚ رو بٚکندده. 7 بأزون اوشأنَ، ایفودٚ شأنهیأنٚ بندأن رو دوچوکأنِئده کی نیشأن بٚدد کی کأهین بنیایسرأییلٚ نومأینده ایسٚه. تومأمٚ اَ کأرأن هوطؤ انجأم بوبوسته، کی خوداوند موسایَ دستور بٚدأ بو.
سینه پوشَ آمأدَه کودن
8 ریز بأفٚ کتأن و آبی، ارغوأنی و سورخٚ نخأن جَا و او رشتهیأن کی طلأ جَا بو سینه پوشَ ایفودٚ مأنستَن آمأدَه کودٚد، دیقّتٚ اَمرأ اونٚ رویَ گولدوجی بوکودٚد. 9 اونَ دولأ، ایتأ چأرگوشٚ جؤألٚ مأنستَن کی اونٚ هرتأ بٚر ای وجب بو بودؤختٚد. 10 چأرتأ رج سنگ کی اَرزٚستی اونٚ رو دوچوکأنِئده. اوّلی رجٚ میأن سورخٚ عقیق و زردٚ یأقوت و آتشی یأقوت بو. 11 دویُمی رجٚ میأن، زمرد و کبودٚ یأقوت و المأس بو. 12 سیومی رجٚ میأن، فیروزه و یمأنی عقیق و بنفشٚ یأقوت بو. 13 و چأرومی رجٚ میأن، زبرجد، جزع و یشم دوچوکأنِئده. طلأ جَا قأبأنٚ میأن تومأمٚ اَ سنگأن کی اَرزٚستییَ جأ بٚدأده. 14 هرتأ جٚه اَ سنگأن ایتأ جٚه بنیایسرأییلٚ دوأزده طأیفه نیشأن بو و او سنگٚ رو او طأیفه نأم بٚکنده بوبوسته. 15 خألیصٚ طلأ جَا دوتأ بٚبأفته زینجیل چأکودٚد کی سینه پوشَ دوچوکأنٚد ایفودٚ سٚر. 16 هطؤیم طلأ جَا دوتأ قأب و دوتأ حلقه چأکودٚد و حلقهیأن 17 و سینه پوشٚ بوجؤرٚ قیسمتأنَ دوتأ طلأ زینجیلٚ رشته اَمرأ دٚوٚستٚد ایفودَ. 18 او طلأ جَا حلقهیأن کی سینهپوشٚ کنأرهیأنٚ میأن جیگأ بٚدأ بوبوسته بو، زینجیلأنٚ دو سٚر دٚوٚسته بوبوستٚد و زینجیلأنٚ اویتأ دو سٚرَ جٚه جولو دوچوکأنِئده او طلأ جَا قأبأنَ کی شأنهیأنٚ رو نٚهأ بو. 19 طلأ جَا دوتأ دِه حلقه چأکودٚد و اوشأنَ دٚوٚستٚد او بیجیرٚ لأیه رو کی سینه پوشٚ دوتأ کنأره رو نٚهأ بو. 20 طلأ جَا دوتأ دِه حلقه چأکودٚد و اوشأنَ دوچوکأنِئده ایفودٚ جولو کی ایپچه قئیشٚ جَا بوجؤرتر نٚهأ بو. 21 اونٚ پٚسی، هوطؤ کی خوداوند موسایَ بٚفرمأسته بو، اونٚ وأسی کی سینه پوش ایفودٚ جَا سیوأ نٚبه، آبی رنگٚ بندأنٚ اَمرأ سینه پوشَ دٚوٚستٚد ایفودٚ حلقهیأنَ کی قئیش جَا بوجؤرتر نٚهأ بو.
کأهینٚ البأقی رختأنَ آمأدَه کودن
22 تومأمٚ او ردأ کی ایفودٚ جیر دوکوده بوستی آبی پأرچه اَمرأ آمأدَه بوسته. 23 سٚرٚ رِه ایتأ درز اونٚ میأن وأزَ کودٚد و او درزٚ حأشیهیَ دٚسٚ اَمرأ بٚبأفتٚد کی پأرَه نٚبه. 24 انأرٚ مأنستَن چنتأ منگوله، آبی، ارغوأنی و سورخٚ نخأن و ریز بأفٚ کتأنٚ اَمرأ چأکودٚد و اوشأنَ وأرگأنِئده ردأ دأمنٚ لبه دؤرتأدؤر. 25 خألیصٚ طلأ جَا چنتأ زنگوله چأکودٚد و انأرأنٚ میأن ردأ دأمنٚ دور دٚوٚستٚد. 26 انأرأن و زنگولهیأن ایتأ درمیأن او ردأ دأمنٚ دؤرتأدؤر نٚهأ بو کی خیدمت کودنٚ زمأت دوکودیدی؛ هوطؤ کی خوداوند موسایَ بٚفرمأسته بو. 27 اوشأن ریز بأفٚ کتأنٚ جَا، چنتأ پیرهن، هارون و اونی پٚسرأنٚ رِه بودؤختٚد. 28 ریز بأفٚ کتأنٚ جَا عمأمه و کولأ آمأدَه کودٚد و اوشأنٚ زیرپیرأنم ریز بأفٚ کتأنٚ جَا دٚتأوأنِه بوبوسته بو. 29 هوطؤ کی خوداوند موسایَ بٚفرمأسته بو ریز بأفٚ کتأنٚ جَا او کمر دٚوٚد شألَ آمأدَه کوده، اونَ آبی، ارغوأنی و سورخٚ نخأنٚ اَمرأ گولدوجی بوکودٚد. 30 خألیصٚ طلأ جَا او نیصفه تأجَ چأکودٚد و اَ کلمهیأنَ اونٚ رو نقش بوکودٚد: «موقدس خوداوندٚ رِه.» 31 هوطؤ کی خوداوند موسایَ بوگفته بو، ایتأ آبی رنگٚ نوأرٚ اَمرأ نیصفه تأجَ دٚوٚستٚد او عمأمه جولویَ.
مولأقأت خیمه تومأنَ بوستن
32 آخرپٚسی هوطؤ کی خوداوند موسایَ بٚفرمأسته بو بنیایسرأییلٚ اَمرأ تومأم مولأقأت خیمه دمٚدزگأ و قیسمتأن آمأدَه بوسته. 33 بأزون اَشأن او خیمه قیسمتأن کی چأکوده بوبوسته و تومأمٚ اونٚ دمٚدزگأیَ بأوٚردٚد موسا ورجأ: پولیکأن، خیمه چو دٚوٚد، کولونأن، سوتونأن، پأیهیأن؛ 34 قوچٚ سورخ بوبوسته پوست لأ دٚئنٚ رِه و خزٚ پوست لأ دٚئنٚ رِه، او پرده قدس و قدسالاقدأسٚ سیوأ کودنٚ رِه؛ 35 عهدٚ صوندوق و خودا ده فرمأن کی اونٚ میأن دوبو و او چوبأن اونٚ اَرأ اورأ بردنٚ رِه، رحمتٚ تخت؛ 36 میز و تومأم اونٚ دمٚدزگأ، حوضورٚ نأن؛ 37 خألیصٚ طلأ جَا چرأغدأنٚ چرأغأنٚ اَمرأ، روغن و تومأمٚ اونٚ دمٚدزگأ؛ 38 طلأیی مذبح، تدهینٚ رِه روغن و خوشبو بوخور؛ خیمه شؤئؤن اَمؤن جأجیگأ پرده؛ 39 مٚفرغی مذبح منقلٚ مٚفرغی کی سولأخسولأخ بو و او چوبأن اونٚ اَرأ اورأ بردنٚ رِه و البأقی اونٚ وسأیل؛ چأچه و اونی پأیه؛ 40 صأرأ دؤرتأدؤرٚ پردهیأن اونی سوتونأن و اوشأنٚ پأیهیأنٚ اَمرأ، صأرأ شؤئؤن اَمؤنٚ جأجیگأ پرده؛ مولأقأتٚ خیمه مِخأن و لأفندأن، و تومأمٚ اسبأب اَثأثیه کی خیمه چأکودنٚ رِه ایستفأدَه بوستی. 41 اوشأن هطؤیم، قدس میأن خیدمت کودنٚ رِه او بٚبأفته رختأنَ، ینی هارونٚ کأهین و اونی پٚسرأنَ موقدسٚ رختأنَ موسا چومٚ جولو دٚوأرأنِئده. 42 اَطؤیی بنیایسرأییل تومأمٚ او دستورأنَ کی خوداوند خیمه چأکودنٚ رِه فأدأ بو موسایَ، انجأم بٚدأده.
43 موسا تومأمٚ او کأرأنَ کی انجأم بوبوسته بو فأندرسته و اونٚ وأسی مردومَ برکت بٚدأ، چونکی همٚتأ چی خوداوندٚ دستورٚ موطأبق چأکوده بوبوسته بو.
Actualmente seleccionado:
خروج ۳۹: GCB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Gilaki Contemporary Bible is a Product of Transform Iran © 2024. All rights reserved. www.kelisayejame.org