2 Pwa 2
2
Baŋa Wɛ kwei Elija o ja o vo telaao
1Maŋa kam déem yi se Baŋa Wɛ tɔge vo-kekara baŋa o kwei Elija o ja o vo telaao. Elija de Elisa déem ma zege Giligal ne ba maa kɛa. 2Elija ma ta de Elisa o we, “Nam maŋe ywo-seeni, se Baŋa Wɛ toŋe-ne mo se a vo Bɛtel.” Elisa ma ve ye o we, “Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete ŋwea ŋwaane we, amo bá yage n yera.” O na tage konto to, ba maama ma tɔge daane ba vo Bɛtel.
3Ba na yi da to, Wɛ sampwori kɔgɔ kolo na zoore Bɛtel ne to ma vo Elisa tei ba bwei‑o ba we, “Nmo yei we Baŋa Wɛ zem lage o kwei nmo yuu tu wom mo o ja o viiri na?” Elisa ma leiri o we, “Ɛɛ, amo seene a yei ko ni ne. Nam yé pa-na se dé lare ko lara.”
4Elija laam ma ta de Elisa o we, “Nam maŋe ywo-seeni, se Baŋa Wɛ mo toŋe-ne se a vo Jeriko.” Elisa daa ta ma leiri o we, “Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete ŋwea ŋwaane we, amo bá yage n yera.” Ba maama ma tɔge daane ba vo ba yi Jeriko.
5Wɛ sampwori kɔgɔ kolo na zoore Jeriko ne to ma vo Elisa tei ba bwei‑o ba we, “Nmo yei we Baŋa Wɛ zem lage o kwei nmo yuu tu wom mo o ja o viiri na?” Elisa ma leiri o we, “Ɛɛ, amo seene a yei ko ni ne. Nam yé pa-na se dé lare ko lara.”
6Elija daa ta ma ta de Elisa o we, “Maŋe ywo-seeni, se Baŋa Wɛ mo toŋe-ne se a vo Jɔdan buga kam ni seeni.” Elisa de daa ma leiri o we, “Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete ŋwea ŋwaane we, amo bá yage n yera.” Ba maama ma tɔge daane ba maa kɛa.
7Banto balei na vei ba zege Jɔdan buga kam ni ne to, mo Wɛ sampwori kɔgɔ kom wo nɔɔna finnu ma tɔge ba vo ba zege dáa ne ye ba nia. 8Elija ma le o gɔrɔ o kukuli-ko o ma o mage Jɔdan buga na bam. Na bam ma pɔɔre ba peini jazem de jagwia pa se ba balei bam tɔge te-kora baŋa ne ba bɛ.
9Ba na bɛ buga kam konto to, mo Elija tage de Elisa o we, “Ta n bere-ne nmo na laga se a ke woŋo kolo a pa‑m to, se Baŋa Wɛ laam ba o ja-ne o viiri.” Elisa ma leiri o we, “Amo tu, a lage se a jwoŋi n dam delo n na jege n toŋe to kuni belei mo.”
10Elija ma leiri‑o o we, “Nmo na lwoori woŋo kolo to tiini ko dana ko gaale. Nmo nam ná nɛ-ne maŋa kalo Baŋa Wɛ na wó kwei-ne o ja o viiri to, n jeŋa wó zo n na beeri kolo to. Ko nam ná dae konto, n bá na-ko.”
11Elija de Elisa na tɔge daane ba via ye ba lara konto to, mo torokooro na jege min-vogo to de te sisein-nɔɔna de na jege mini to pɔpɔ te zaŋe ba baŋa ne kulululu te pwɛ-ba daane. Elija ma da de vo-kekara o kɛ Wɛ telaao. 12Elisa na nɛ konto to, mo o laare o we, “Amo kwo! Amo kwo! Isarele jar-keira torokooro tem de te sisein-dira bam laam wó ke tɛ mo?” O daa maa wo nɛ Elija yera.
Elija na kɛ konto to, Elisa wo ma chɔge ye o ja o tete gɔrɔ o kaare belei. 13O ma kwei Elija gɔrɔ kolo ya na lwei to o jwoori o vo o zege Jɔdan buga kam ni ne. 14O ma kwei Elija gɔrɔ kom o mage na bam baŋa ye o we, “Baŋa Wɛ wom na ye Elija Wɛ to nam bɛ?” O na mage na bam konto to, ba ma pɔɔre belei ba daare te-kora. O laam ma tɔge da o bɛ Jɔdan buga kam.
15Wɛ sampwori kɔgɔ kolo déem na nwoŋi Jeriko to ma tole ba na Elisa na ke kolo to, ye ba we, “Elisa mo leiri Elija yuu ne o jege o dam dem.” Ba ma fɔɔre ba yi o tei ye ba tiiri o yiga ne ba zuli‑o. 16Ba maa we, “Nii mo. Dé jege babɛ finnu mo dé tei ne. Debam tu, nam pa se dé toŋe-ba se ba vo ba beeri nmo yuu tu wom jei. Dɛ delo Baŋa Wɛ Jworo ga jaane‑o o vo o yage peo kodwoŋi yuu ne mo, naa bwolo kodwoŋi kuri ne.” Elisa ma leiri-ba o we, “Yé toŋe-na-ba.”
17Ba ma tiini ba kwoori‑o pa se Elisa ga ba ŋwa. O ma ta-ba o we, “Nam toŋe-na-ba se ba vo.” Ba ma seene ba toŋe nɔɔna finnu ye ba vo ba kwei da yatɔ ba beeri jei maama ye ba wo nɛ Elija. 18Elisa déem maŋe Jeriko teo wone mo. Ba na jwoori ba ba o tei to, o ma ta-ba o we, “A ya maŋe a wo tage a bere abam we, á yé vei na?”
Elisa na ke wo-kenkagela yalo to
19Jeriko teo nɔn-bia badwonna déem ma vo Elisa tei ba ta ded‑o ba we, “Debam tu, nii dé teo kom zega na tiini ko lana tei. Ko nam na ye tei to, na bam mo ba lana. Tega kam de maa ba ke wodiiru lanyerane.”
20Elisa ma ta o we, “Kwei-na yɛ á ke zon-doŋa wone á ja á ba á pa-ne.” Ba na ke konto to, 21o ma kwei yɛ dem o vo o lwo teo kom buli-yi dem ne ye o we, “Baŋa Wɛ na tage kolo to mo tento: Amo kwɛ na banto pa ba ji na-ŋona. Wolo ná nyɔge-ba, kotu bá te. Tega kam de nam bá ji kafɛ.” 22Konto na ke to, na bam ma lɛɛre ba ji na-ŋona se ko ba ko yi zem, nenɛɛne Elisa na tage tei to.
23Elisa déem ma zege Jeriko ne o maa vei Bɛtel. O na wo chwoŋa ne konto to, mo bu-donno tedwonna nwoŋi teo kom wone ba ba ba jege‑o ba mɔna ye ba bage‑o ba we, “Yu-kapworo tu, ta‑n kɛa! Lage jei!” 24Elisa ma pipiri o nii ba seeni ye o daare o sɔɔle lwarem o yage ba yuu ne Baŋa Wɛ yere ŋwaane. O na yɔɔre o ta konto to, mo kago-vara#2:24 kago-vara = bears balei nwoŋi gaao kom wone ba ja bu-donno tem finna-balei ba tore yera-yera. 25Elisa ma zege jeiga kam konto ne o vo Kamele peo kom seeni. Ko kwaga ne o ma jwoori Samaria.
Actualmente seleccionado:
2 Pwa 2: KBG
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Ghana Institute of Linguistics, Literacy and Bible Translation (GILLBT)
