2 Pwa 3
3
Tigura chugi Isarele de Moaba laŋa ne
1Judah teo pɛ Jehosafate paare dim bena fuga-nana bene dem wone mo Ahab bu Joram déem di Isarele teo paare Samaria ne. O ma jeini Samaria ne o di paare dem bena fuga-yalei. 2Joram déem toŋe lwarem mo o chɔge Baŋa Wɛ yiga. O lwarem kikia yam nam wo yi o kwo de nu ya na ke yalo to. O wane o chɔge kandwɛ delo o kwo déem na chwi Baal zula ŋwaane to. 3De konto de, o paale o ke wɛleera dwi delo Nebat bu Jeroboam déem na ke pa se Isarele tiina de da ba ke to mo. O wo sɛ se o yage.
4Moaba teo pɛ Mesa déem kɔne pei mo. O ma yeini o jege se o ja pipeili morro bi (100,000) o woli de pi-bɛ morro bi (100,000) korro mo o vo o pa Isarele teo pɛ bene maama wone.#2 Samuwel 8:2 5Isarele teo pɛ Ahab nam na tege to mo Moaba teo pɛ ve se o to o pa Isarele teo pɛ wom. 6Pɛ Joram ma zaŋe Samaria ne o la Isarele jar-keira bam maama o ke daane se ba nwoŋi ba ke jara. 7O ma toŋe ni o pa Judah teo pɛ Jehosafate ye o we, “Moaba pɛ wom ve se o to o pa-ne. Nmo nam wó sɛ se n da de amo se dé vo dé ke jara de Moaba tiina bam na?” Jehosafate ma leiri o we, “A wó sɛ se a woli‑m. Dé ye chorro mo daane. Ta‑n nii debam jar-keira de dé sisein-nɔɔna bam we ba ye nmo tete nyem mo.” 8Jehosafate ta ma bwei o we, “Dé nam wó tɔge chwoŋa kɔ mo dé vo dé bobo jara yam?” Joram ma leiri o we, “Dé wó tɔge Edom kagoa chwoŋa kam mo dé vo dé yi-ba.”
9Isarele pɛ Joram, de Judah pɛ wom, ko woli de Edom pɛ wom ma zaŋe ba kɛ de ba nɔɔna bam. Ba maama ma kwei da yarepɛ ba kaare kagoa kam wone pa se na daa tera se ba de ba vara bam nyɔ.
10Pɛ Joram ma laare o we, “Lɛɛro yi debam! Baŋa Wɛ lage o kwei debam pwa batɔ banto mo o ke Moaba tiina bam jeŋa ne se ba di debam!” 11Pɛ Jehosafate ma bwei o we, “Baŋa Wɛ sampwora wora ywo-seeni se dé bwei‑o dé lɔre Baŋa Wɛ boboŋa na?”#1 Pwa 22:7 Pɛ Joram tontoŋeno wodwoŋi ma leiri o we, “Safate bu Elisa mo wora. Wonto déem mo yeini o bwola de Elija ye o woli‑o.” 12Pɛ Jehosafate ma ta o we, “Ko ná ye konto, Baŋa Wɛ kwora yeini ka yi wonto mo chekke”. Pwa batɔ bam maama ma zaŋe ba vo Elisa tei.
13Elisa ma ta de Isarele pɛ Joram o we, “Debam jege bɛ mo se dé ke daane? Véi n bwei n kwo de n nu sampwori sem se ba woli‑m.” Joram ma leiri o we, “Aawo! Ko ye Baŋa Wɛ mo kwei debam pwa batɔ banto o ke daane se o daare o kwei debam o ke Moaba tiina bam jeŋa ne.” 14Elisa ma leiri o we, “Paŋwa Tu Baŋa Wɛ na seene o ŋwe ye a ye o tontoŋeno to, amo dugi o yere ŋwaane we, ko ná dae a na nege Judah Pɛ Jehosafate, amo ya ba lage a nii n seeni kɔtaa. 15Nam bwoŋi-na wolo na yei kɔnɔ tam to á pa-ne.” Kokuri to, nɔɔno déem ná yeini o ta kɔnɔ mo Baŋa Wɛ dam dem wó ba Elisa baŋa ne. 16Elisa ma ta o we, “Baŋa Wɛ na tage kolo to mo tento: ‘Ko-na gwonnu á tiŋi nabare-kora kanto ne. 17Kokuri to, amo na wó ke tei to, abam bá na doa, ye vio de bá dole. Ko daare na wó ba ba su bwolo konto se abam de á nɔɔna bam maama de á vara bam taa nyɔa.’ 18Keim dento ye mɔle mo Baŋa Wɛ tei ne. O daa ta wó kwei Moaba tiina bam o ke abam jeŋa ne. 19Abam wó vo á wane ba dam jei sem maama de ba te-fwaaro tem. Á ta wó gwoni ba tei-ŋonno tem á de tega ne ye á daare á se ba buli-yia yam de. Á ta maa wó lwo kandwa á chɔge ba tega kalo maama na lana to.”
20Tega na poore se ko maŋe de zezeŋa kaanem dem to mo na seene ba zege Edom laŋa kam seeni ba ba ba tagele tega kam maama.
21Moaba tiina bam na nigi we pwa batɔ bam mo ke ba jar-keira daane ba ba se ba kwaare jara de-ba to, ba ma bwoŋi balo maama na yei jara keim to, nɔn-donno de nɔn-kweero de, pa se ba vo ba laŋa kam siseini ba zege da. 22Tega na poore tetete ye Moaba tiina bam zaŋe to, ba ma tole ba na na bam na tigi bwolo kom ne tei to. Wea maa nyeene na bam baŋa ne pa se ko nye de jana mo to. 23Ba ma laare ba we, “Jana mo tento! Ko wó taa ye pwa bam de ba jar-keira bam mo jaŋe ba go daane. Nam pa-na se dé laam vo dé vere ba wonnu maama dé taa tei.”
24Moaba tiina bam na yɔɔre ba yi Isarele jar-keira bam na tigisi daane mɛ to, mo Isarele jar-keira bam nwoŋi ba kwaare jara de-ba. Ba ma zeili-ba pa se ba duri ba jwoori ba teo. Ba ma pare-ba taa ye ba go Moaba tiina dedɛ. 25Ba déem chɔge ba teene dem mo. Isarele nɔɔna bam dedoa dedoa ma dole kandwa ba faare Moaba te-ywoŋa kam maama ba chɔge. Ba ma se ba buli-yia yam maama ba daare ba gwoni ba tei-ŋonno tem maama ba de tega ne. Kiri-Heresi teo kom yerane ya mo daare ko zege puna. Isarele jar-keira laam ma vo ba gilimi-ko ye ba daare ba ma napane ba dole kandwa ba ma ba chɔge-ko.
26Moaba teo pɛ na maane we o lage o to jara yam wone to, o ma ja balo na yei se-zɔɔ jara keim to nɔɔna bia yarepɛ o vo se ba wane ba mage ba dona bam ba kɛ ba yi Edom#3:26 Edom naa Aram (Siria) pɛ wom na wo mɛ to ye ba ga. 27O laam ma ja o bu-kwea kalo ya na wó leiri o yuu ne o ji pɛ to o ma o ke zwɛɛm kaanem teo kom kabira kam baŋa ne.#Mika 6:7 Keim dento déem ma tiini de daane Isarele tiina bam pa se ba pipiri ba jwoori ba tete teo ba daare Moaba teo pɛ de o nɔɔna bam.
Actualmente seleccionado:
2 Pwa 3: KBG
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2020, Ghana Institute of Linguistics, Literacy and Bible Translation (GILLBT)
