YOBU 20
20
Nrerye wa Karaaru wa Sofari
1Llyo Sofari Mnaamathi karouwa:
2Makusaro akwa akeshaalwa shikurouwe,
Nta nshishiidimaa ikusiika se fo.
3Shiitye mavavaso shilaidimaa isisirya,
Indi urango lwakwa llukeeshikuna shikurouwe.
4Yewe kyikee sheelyi mmbo kwanrekkywa mbony yei:
Sheelyi ukya kasha Iruva mmbo eumba nndu ulaniny,
5Nravi mmbo akushele kya uvisho lwake kyeeri kyaangu-da.
Yeto nalashiinndya Iruva ifura lyakwe llya kyeeri kyaangu-da!
6Naakwa alollya wiidimi lwakwe lwang'ana fika ng'iniu,
Na nrwe wakwe ukandefika mafishiny.
7Indi mmbo asheerwaa kwaasha sha kirishe.
Valya vemwiishi vakuwese “Nkwi akai?”
8Ammaya sha yoorya, are nalalollywa lyingyi,
Avivike sha moorya a nkyo.
9Yeto alelollya nnakaa alollye lyingyi fo.
Nta alya ekaa nkukyimanyikaa se fo.
10We muni kuti naviire masaa akwe moose,
Vana vakwe vaterevaa ilyilywa ni ngwera.
11Ra neelyi ekwiitye iishwa finya ta ukoo,
Indi shoose tilakaa nawe kiluulyi.
12Kaniny kakwe uravi llurolaa sha sukari,
Mmbo alusurummyi si ya ulumi lwakwe.
13N nakundye ilulotora ttwa fo,
Indi kalutirya kaniny kyakwe.
14Indi kyeeri lufikaa ndewuny lukava kivawo,
Kivavaa ngota uroi lwa shoka.
15Nravi n nyamiraa masaa a ulembi na iraaka;
Iruva mmbo autaa efo ndewuny yakwe.
16Kindo vanndu va ravi vamiraa mmbo kyikee sha urowi;
Mmbo kivarumataa uviny sheelyi vamaarwa nshoka shinnyaasi.
17Nnyakaa na Muu nallye iviiri lyisokaa-fo,
Nta mifongo ya iwonisywa umasi fo.
18Ndunda ta nrikye wakwe ashelotoraa,
Nnyashiidimaa iva na wiidimi lwa ishosha-fo,
Nnyaonaa mbusha ya nrike wakwe-fo,
19kimaruma alemamita ngwera na ivara,
Karaakkwa mmba kulaore alentana.
20Kimmba waafu lwakwe lulatiri umando,
Nnyashiidimaa ikira nta kyimwi kitiri mbusha kwakwe-fo.
21Numa ya ilya nnalera nta kiraambu-fo,
Kwa yekyo iviiri lyakwe n lyikaa fo.
22Ufishyony lwa ivesyo ukiva llumuwoyaa,
Renga ntimuwoyaa na finya shoose.
23Eetaulyaa iwurisa ndeu,
Iruva amweengyee unyafi lwakwe,
Mmbwa impusukkye sha shoonga yakwe.
24Kungyi ashiidimaa ikkya upanga lwa minya,
Lyo ashevawaa wa arera.
25Mfye ushomowaa uuka nyaminy takwe;
Nrwe wa vayo ushomowaa mungony vakwe wimikaa,
Weresi lwa ufu lumuwoyaa.
26Mbeshe takwe ntilyamarwaa,
Muro wa wende ummamitaa;
Yekyo kiseeri kyeny kwakwe kimamitwa.
27Ngina mmbo ishesukkwaa uravi lwakwe,
Ulana lushensakiraa.
28Masaa akwe mmbo asokwaa
Mikonuny ya unyafi lwa Iruva.
29Yekyo nkyo aniingwaa nndu nravi kyuuka kwa Iruva,
Nkyo nndu nravi akee mvaalye ni Iruva.
Actualmente seleccionado:
YOBU 20: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
