YOBU 21
21
Kirouwo kya Yobu
1Llyo Yobu karouwa:
2Aranyiny na nshusshwa marero akwa;
Na kive nkyo kindo kya imuviirya muu.
3Shisisiryeny shirere,
Na shammaa irera engereny ishiinyala.
4Ndesa yeny nshikefuuya nndu va vandu?
Nkyekiny shiture usisiryo?
5Shiloleny mutingwa,
Sikkyeny kana na woko.
6Shakusara yekyo kileshikooya mmbo shikeesavaa
Mwiilyi ukeenda saafu kwa werei.
7A nkikiny varavi vakeengera ikaa na muu?
Niinda finya tawo tikeengereka fika ukuuny?
8Mmbo valollyaa vana vawo vevesywaa;
Na ngyeeri tawo vewonaa finya.
9Kwawo wo kindo kikee ufoony na kuleefo weresi;
Nta mbiiri ya Iruva nkyikee vakooya-fo.
10Yee, ng'umbe tawo toose tikeengereka,
Tikafyaa kulefo ukiva loose.
11Vana vawo vadu vakarrwa sha ironda;
Nawo vakee fina mbasa;
12Mbafinaa mbasa na maranda
Na ifurya unyanga lwa fivale.
13Mmbo vakaa na muu vevesywaa
Numa vakafwa na ufoo.
14Mmbo vaviyyaa Iruva kulalulyise ukiva-fo!
Llukundye imanya shia tafo-fo.
15Iruva muni finya nkyokyi kutani llunrundye?
Llukee wona mbusha kyi lukantereva?
16Ivesyo lyawo nshi llyikee maakony awo,
Ra neelyi vavikkye Iruva kwaasha na fyama fyawo?
17Nkeenga kulellollya sa ya nravi irumywa,
Vakakooya iwoywa n renga?
Ao Iruva alenkooya ivamamita na unyafi lwakwe?
18Naakwaa ni indo vawiwitwa sha mare moomu,
vave sha muulu wa ipowa ni kitita si!
19“Yeni mmbo mukeamba, Iruva mmbo areeye vana vawo
ngapo ya vandu yewo varawi.
Nkyikyi are alavataiya wo weni vakooye imanya!
20Valollye wo veni vemamikaa;
valollye wo veni unyafi lwa Iruva muni finya.
21Mashika vakamfwa vatinywa kyi vana vawo,
kyeeri mikonu yawo ifika ufishyony.”
22A nndu wa vandu ashiidimaa ilosha Iruva umanyo,
Iruva muutya vekaa uwe iruveu uvingo?
23Nndu nyafwee ufishyony lwa ivessyo lyakwe,
akee ifureny deny na ufoony;
24Eishywe masima shapu mwilyiny wakwe,
na mafua akwe eetiri finya.
25Ungyi mmbo afwee na tingwa nini ngoony,
kulaore alenshosha kindo kyoose kisha.
26Naakwa ni indo woose mmbo vafwee na irikwa,
woose mmbo vasikkywa n fusa.
27Aranyiny! Yeny shiishi makusaro any moose,
na miallye yaany ya ishiinyala,
28Vai mukee vesa, “Nkwi mmba ya n niini ikai?
Nkwi ikai mmba ekaa nndu nravi?”
29A mmbo kulaore mulemmbesa veira shya,
mukairikyana na yekyi valemuvia?
30Nravi mmbo aturunywaa nkonu wa renga
kakirwa nkonu wa unyafi!
31Mmbi asakiraa nndu nravi?
Ao antaa kya efyo fyoose atannyi?
32Kyeeri ashiipowaa kifuny,
kifu kyakwe n kivikywaa varingyi.
33Vandu veengyi mmbo valatyaa numa
na vengyi veengyi deny vakaira mbee yakwe.
Kyeeri akeerikwa, uteeri lukaolotwa waarya.
34Mmbo mushiidimaa indaany ishiviirya muu na marero a ruu?
Firouwo fyany fyoose mfitiri kindo kuuta wongo-fo.
Actualmente seleccionado:
YOBU 21: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
