YOBU 19
19
Kirouwo kya Yobu
1Naasa Yobu karouwa:
2Mmbo mushengeraa ishilisa ukiva fika indii;
Na ishifisha-fisha na marero?
3Matorito yaa moose ikumi mwanshisakyira.
Nta mmulollye sony ishitannya fikasha?
4Naakwa sherengye dede,
Irenga lyakwa nlyeshikoye yeny shimuni.
5Mmbo mukeshiinyala naambo mukurose;
Mukaashiutya uvingo kya inyiiswa lyakwa.
6Manyiny sheelyi Iruva anshitannya fikasha,
Na ishiwara na nreiyo wakwe.
7Lola shikekapa kyorongye “Mbaria!”
Indi shikee rouwa fo.
Shavaanga na unyanga waasha,
Indi nshikeewona usumanu lwakwa-fo.
8Shia yakwa annyiringitya na isimamba naambo shilaire,
Kavika shia takwa ireema.
9Kashaambwa utore lwakwa;
Kashuuta ureto lwakwa nrweny.
10Anshifisha taari shoose, shansya;
Ivika nsia lyakwa kalyiillwa sha nri.
11Kashaatya unyafi lwakwe uwe yakwa;
Kashaalwa sha nkiduva wakwe.
12Matorito akwe akashisheya ando amwi;
Akasongosya shia ya isha kwakwa,
Vakareya meema vakashiringitya.
13Iruva kavika vana va ma-kwaasha;
Mbuya vakwa vaniini vakashoovya deny.
14Va mmba yakwa na mbuya takwa mbakeekisheekya lyingyi-fo,
Valya vashiishi vakavikwa kwaasha.
15Veni kyeny kwakwa vanshirekkywa;
Mashinga akwa a kyika vakashilollya sha muny.
Yen shava kwawo sha nndu valamwiishi.
16Shavaanga kishinga kyakwa indi n nakee irika fo,
Kyikava n kuti shinlelembe deny na marero.
17Shammba kiraa kwa nka wakwa;
Kisuya kwa vana va ma vakwa shimuni.
18Naakwa ni vana vadu mmbo vakeeshiinyala,
Wo kyeeri shikesomukkya vakashiteenda.
19Mbuya takwa vaniini vakashisswa,
Valya shevakundye vakashikapa mungo.
20Mwiili wakwa wansaa-u iffwa na shonyi,
Shakiiya mbaa numa ya ireta fyoose.
21Shillyillyeny,
Shillyillyeny yeny mbuya takwa;
Mashika woko lwa Iruva lwanshivenya.
22Nkyikyi mukee ishisora sha Iruva?
Nyinda mulakee ifura na mwiili wakwa?
23Nkyeni marero akwa ereiywaa!
Nkyeni ereiywaa kyitabuny!
24Nkyeni ereywa na minya na mborro
Uwe ya iwe naambo akee-u llung'anu!
25Shiishi nanshushwa mwiikira wakwa eefo na muu,
Ufishyony we mmbo ashiniingaa usumanu lwakwa yaa kweni ulaniny.
26Numa ya shonyi yakwa ilyamarwa indi,
Shishelollyaa Iruva na miso akwa shimuni.
27Yeny shimuni shikwaanannyaa nawe;
Yeny shimuni nta nshi ungyi-fo shinlollya na miso akwa.
Nrima wakwa
28“Yeni mushiidimaa ikurerya:
Llunsoria ngata kyi?
Na mbony toose nkwakwe tikai.
29Ereya mashora a usu,
Mashika nyashi mmbo yeende ngapo ya usu,
Naambo kwiidimi imanya sheelyi kwiifo mwileta mwaandu.”
Actualmente seleccionado:
YOBU 19: MAS2
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Holy Bible in Kimashami © Bible Society of Tanzania, 2016.
