SADEONG 102
102
Sambeangan doi susaan lalomo
1Mian mosakisaa nasambeangan modanoo doi pakadakan tuuno mongoluu doi Temeneno.
2Oh Temeneno, lengelekai daku sambeang,
bolisii daku uwangan napolong doi-Koo.
3Inai mototonggulungaku
kalu yaku daano doi susaan lalom.
Longolakukai kalu yaku uwang,
tukon timbiliyakumokai namosobit.
4Daku tuboan lapus buno tibolung;
kobuku-bukunggu moonas buno aung.
5Akiyono kobukunggu buno bulung momotuul,
tukon akimo kuyase kaan.
6Yaku nggeleamon babasal koalalonggu;
kobutonggu molisuko tuuno baino kulit komo bunguse kobukunggu.
7Yaku bunomo tomisi undan doi padang gurun,
buno tomisi kolu doi buta motaabak mokiis.
8Aki kumoola moolo,
buno tomisi mopoloon doi bonua atono.
9Posopokon kooloyo komusuh totulaiyaku;
doi mian monggimoliiyaku kosambunggu tinealikon kutuk
luwedoi mian monggimoliiyaku.
10Koabu yaku kaane pokakana koroti,
daku paisu ininum posambul komatanggu paisuno,
11sabab Ikoo binggatakumo tukon sakukanakumo
doi Munggimalan lalomo mokolot-kolot.
12Daku tuboan lapus pokakana kolangge mokouno doi kinobian;
yaku molooiyu pokakana kobulung.
13Bai Ikoo, oh Temeneno, Tomundo tuuk sidutu-posidutukon,
paisosoboli koturunan tataap ninonook.
14Ikoo naikon kokondong tukon seseange ko Sion,
laatemo kotempono sulano nadaano konda seang doiyana.
15Sabab Komu pele-peleleani kilakene yana,
maukai yana natealimo buta motabaak.
Yanila tataap seseangge doiyana,
maukai yana natealimo abu.
16Ko Temeneno nakuasa naikon kobangsa-bangsa matakutenemo;
tukon sasaibino kotabo-tabo maambanggene Kona babasalan,
17kalukai ko Temeneno bangunemo ko Sion koikoidan,
tukon lubat doi Nababasalan lalomo.
18Yana naikon lengele Kona mian motamballais nasambeang,
tukon aki naakiyenggene konapo kakabi.
19Potulisekai sasaibino ko Temeneno nakokubai
tuuk doi mian motubo doi salaando,
sulano kobangsa moakiyoon nasimung
moola nanggaale Yana.
20Maukai natatandaak Kona dungolan bai ko Temeneno moola mbalenge,
doi surgaa Yana totileyo kodunia
21sulano nalengele komian motinaan napongoluhan
tukon olupute komian mohinukum mate.
22Maka doi Sion naikon Kona binabilatakonan kosambuno,
tukon Yana naikon ngginaanggaal doi Yerusalem,
23doi tempo kobangsa-bangsa tukon kobatomundoan-batomundoan mopototongi
sulano napo salaakanggene kobutongo doi Temeneno.
24Salaata doi kutabokonan ko Temeneno komuyukemo daku bukuanan,
tukon paupaluse dakuumur.
25Maka kubantile, “Oh Mian Bisa inaikai moalayo daku asaangan
doi natatangakonan daku tuboan.”
Temeneno, Ikoo tubo sidutu-posidutukon,
26 #
Ibr. 1:10-12
looluk Ikoo tealikene kodunia;
kotimbukai lima-Mu komo limange.
27Sasaibino doiya naikon lapus, bai Ikoo tataap daano;
sasaibino doiya naikon mbules buno pakean.
Ikoo sakukene buno kalambi motua,
tukon sasaibino naikon manas kabus.
28Bai Ikoo tongo tataap biasa,
Komutuboan akiyo konapupusan
29Komai pau tumbu naikon tubo tukon sanaang,
tukon doi Musoopan lalomo yanila aman sidutu.
Actualmente seleccionado:
SADEONG 102: LAIBGZ
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
