Ba-Loma 14
14
1Bosangelaka boto onoyali bolu’olu en’imeedyo, ohonde efa lacin’eho boatane ntango. 2Boto’omoi aimedya ate akolana lila toma tohatotu; ko okina onoyali bolu’olu ala nko ndunda kei. 3Ende onola atasekake ende onofale, ko ende onofale ataakolake ende onola, lacin’oka Yakomba amolotamba. 4E onokoedya bosali bon’oto’okina baoyi oyali nai? Kang’aemala, kang’aokwa, nko likambo lina nyangetuke enandamene. Koko angemala, lacin’oka Yakomba sinya oyemadya. 5Boto’omoi akanela ate bina bomoi boleki bin’okina, boto’okina akanela ate bina behetu beyali nko kocu. Boto l’oto aongyake linonganya lokanyi lonandamene ena yoi liho. 6Onokanela bina botutuma, akanela boho lacin’ena Nkolo; ko ende onola toma ayale eneyali Nkolo, lacin’ende akanga Yakomba lokango; ko ende onofale, afale nk’eneyali Nkolo, ko akanga Yakomba lokango. 7Efan’oto’oniso onoyaike eneyal’endamene, ko efan’oto onowa eneyal’endamene. 8Yombo tika, tika eneyali Nkolo; ko yombo towa, towa eneyali Nkolo; lacin’eho, kanga tika, kanya towa, toyali nko bana Nkolo. 9Masiya awaki nko la ncin’ene, ko aikaki lakina, lacin’eho ayalame Nkolo eniy’anawaki ko l’eniy’anayaike. 10Koko e okodya baoyi ban’efili ene lacina na? ko lakina, e oehya efili ene lacina nai? lacin’oka isatu tongemala en’oso bon’ieko inatenda Yakomba bakambo. 11Lacina yoi limotengama,
Yawe aila, ate, Emi njaike, ko baongo l’aongo bangonjunamel’emi,
Ko ndemi la ndemi ingokumya Yakomba.
12Yok’oho boto l’oto’oniso angolokola boloko bonandamene bona bikambwa binande eneyali Yakomba.
13Lacin’eho, tedyake likoedyana baoyi; ohonde bokodyaka yoi line, noka, boto atilake ekumbelo l’ekoi yelo eneyali yoka lofoka lon’ilonga ena mboka en’efili enande. 14Emi leya, ko botem’onami bofana ntango eneyali Nkolo Yesu, emite, efan’iyema iniyali nselo nk’ihoamene, yengoko eneyal’ende onotang’iho nselo, iyali nsefo eneyal’ende. 15Koko yombo efili ene aoka lokeseli lacin’ena toma tona ndaka, e ofakende lakina ena nganji ena ndanga. Tehyake boto onoki Masiya owelaka la toma tone tona ndaka. 16Botimedyake’oka bolotsi’onino botangame lotango lon’owe; 17lacin’oka lifoka lina Yakomba lilayali ndaka la mmela; liyali nko mbongi la mwi l’ekiko ena Bolimo bon’olotsi. 18Lacin’ende onokambela Masiya bikambwa la baoyi’ane aokya Yakomba ekiko, ko aimedyam’olotsi l’ato. 19Lacin’eho, akoli eneyal’iso titane l’aoyi bana mwi, ko l’aoyi banang’is’okikyana l’aho. 20Tehyake ekambwa ena Yakomba lacin’ena toma tona ndaka. Toma tohatotu toyali soto solosolo, ohonde bowe lacina boto ayalame ekumbelo eneyali bato’amoi enal’ende toma. 21Bolotsi lacina ofale nyama, ko ofamele vina, ko ofile yoi lin’etaketaka linalingi efili ene okumba. 22Imeedyo inayat’e, ongya liata ibo eneyal’eamene en’oso bona Yakomba. Ekiko eneyali boto’oho onofayokoiy’endamene likambo la yoi linimedy’ende bolotsi. 23Koko ende onola kuma ayakandakanda amokoiyama likambo, lacin’oka afale l’imeedyo; yoi lin’etaketaka linifayali lin’imeedyo liyali nko bowe.
Actualmente seleccionado:
Ba-Loma 14: BBY62
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bokanda Bona Yakomba Bon’ototo © Alliance Biblique de la R. D. Congo, 1962
