Ba-Loma 15
15
1Akoli eneyal’iso banayali la locili totole tongitongi toniyo banafana locili, ko totilake baoyi banalang’isoamene. 2Boto l’oto’oniso ailelake boto onoli l’ende baoyi banalanga boto’oho lacin’eho aatel’ende bolotsi bonongokiky’ende locili. 3Lacin’oka Masiya mene atakamba baoyi banaki’ndamene olangaka, ohonde yok’onoki yoi otengamaka, ate, Ntango inik’iy’okotangak’e imonkwel’emi. 4Lacin’oka baoyi l’aoyi banatengamaki’ale batengamaki lacin’eho iso tolakame, lacin’eho toate lolendedyo lacin’ena locinji ko lacin’ena ncicimodya enatocicimodya bekanda bena Yakomba. 5Isanga ekoli lacina Yakomba ena locinji l’ena ekikedyo akof’ino lokanyi lacina boyalame la lokanyi lomoko eneyal’inoamene bosamb’onoyali Masiya Yesu; 6lucin’eho bokumya Yakomba la Bafango’ona Nkolo eniso Yesu Masiya la lokanyi lomoko ko la bonyua bomoko. 7Lacin’eho, botambanak’inoamene, yoka bosamb’onoki Masiya okotambak’ino, lacina Yakomba akumyame. 8Lacin’emi lakosumol’ino, Masiya amilama ona lifoka lina bosali eneyali iy’anakesama yonge lacin’ena solosolo ena Yakomba, lacin’eho akikya bisemba binisembyamaki eneyali bankya, 9ko lacin’eho Befenda bakumya Yakomba lacin’en’isei inande, yok’onoki yoi otengamaka;
Lacin’eho nongokokumy’e ena ntoto ena Befenda,
Ko nongembela lina line.
10Koko aila lakina, ate,
Ino Befenda bonyangela l’ato’anande.
11Ko lakina,
Ino Befenda behetu bokumyaka Yawe;
Ino bato bahatu bokumya nk’ende.
12Ko lakina Yesaya aila, ate,
Boluo bona Yisai bongenya,
Ko onongemala ena lifoka lina nkumu ena Befenda;
Befenda bangolengedya nk’eneyal’ende.
13Yakomba ena lolengedyo akolodyake to l’ekiko ehatu ko la mwi en’imeedyo inimedy’ino, lacin’eho boate lolengedyo la mpula, nk’ena locili lona Bolimo bon’olotsi.
14Bifili binami, emamene l’ey’oka ino bolola la bongompolu, ko bomolodyama la nnonganya, ko bokolana liyolak’inoamene lilako. 15Ohonde emi lakusa likotengel’ino imbu lacin’eho nkootody’ino, lacin’en’isei iniki Yakomba ompaka, 16lacin’eho njalame bosali bona Masiya Yesu eneyali Befenda, lacina nkambe ekambwa en’osimo bon’olotsi bona Yakomba, lacina elekedyo ena Befenda eyalame mbeka enetangam’olotsi, enekyama en’oeka la Bolimo bon’olotsi. 17Lacin’eho, njali l’ekumedyo enami eneyali Masiya Yesu ena baoyi banayali eneka Yakomba. 18Lacin’emi mpakolana litenda lacin’ena bikambwa bimoi, umola nko biho biniki Masiya okambaka l’emi, lacin’ena efikelo ena Befenda, la yoi ko l’ekambwa, 19ena locili lona ndembi ko l’ikambwa bina mpefa, ena locili lona Bolimo bon’olotsi. Yok’oho mosidya lisekodya Bosimo bon’olotsi bona Masiya ena Yelusalema ko l’en’ekala benesambany’eho, yengoko eneki’m’osimbaka ena Iluliko; 20o, ndangaki la mposa mene lacin’eho nsumole bato bosimo’oho bon’olotsi en’ili beneteyana Masiya lina, lacina mpafake en’eango eneki boto’okina oangaka, 21yoka bosamb’onoki yoi otengamaka,
Iyo bangena, nko bato banatasumolama bosi-mo’onande,
Ko iy’anatok’osimo’oho bangononganya.
22Lacin’eho, emi ntaya eneyal’ino, nko lacina eneki’m’ofekyamaka befekya bike 23koko isanga enefan’emi lakina etelo en’ekala bene, ko eneki’ni’ookaka mposa mbul’ine bike lacina nje eneyal’ino: 24enengi’m’ocoa Sepania nongoya eneyal’ino (lacin’emi lalengedy’oka nongoken’ino en’okit’onami, ko eneng’is’osidya likisase imbu, emi l’ino, nkwaho boncindela ena mbok’eho). 25Koko isanga locoa Yelusalema okambya ban’oeka. 26Lacina baise Makedonia la baise. Akaya baimedyaki’olotsi lacina basusanya nganji lacin’ena bato biinda banayali eneyali ban’oeka ena Yelusalema. 27O, baimedyaki bolotsi’koko bayali l’esilo l’iyo nkoho. Yombo Befenda bambana l’iyo ena toma toniyo ton’olimo, ekoli lacina Befenda bakamby’iyo la toma tona yonge. 28Lacin’eho, enengi’m’okadya ekambwa ene, ko njaambedya bemamo bone, nongoya la mboka enino enaco’emi ena Sepania. 29Ko emi ley’oka enengi’m’oya eneyal’ino, nongoya l’efulelo en’osako bona nsakama bona Masiya.
30Koko, bifili, lakoond’ino la Nkolo eniso Yesu Masiya ko la nganji ena Bolimo, ino bambanaka l’emi la mposa mene ena beondo benambondel’ino Yakomba; 31lacin’eho ntungwa eneyal’iyo bana Yudea banafimedya, ko lacina bosala bonaco’emi ena Yelusalema bimedyame bolotsi la ban’oeka; 32lacin’eho nje eneyal’ino l’ekiko en’eango ena Yakomba, ko emi l’ino toate lifomya. 33Yakomba ena mwi ayalamake eneyal’inatu. Ndoho.
Actualmente seleccionado:
Ba-Loma 15: BBY62
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Bokanda Bona Yakomba Bon’ototo © Alliance Biblique de la R. D. Congo, 1962
