Génesis 2
2
1Ictzun tten e baj bant cya'j ex tx'otx' tuc'ix tcyakilju at cywitz. 2Tujtzun twukin k'ij ojlan Dios, tbantlenxi tcyakil tak'un. 3Cub tcy'iwla'n Dios twukin k'ij, ex el tpa'n tu'n tajben o'cx te, tu'nju atzun k'ij ojlan, tbantlenxi tcyakil tak'un.
Tocxsa'n xjal t-xol txkan awal tuj Edén
4Ictzun tten tx'olbabl ti'j cya'j ex tx'otx' tej cybant tu'n Kman Dios.
Tej tcub tbincha'n Dios tx'otx' ex cya'j, 5minti'tok jun awal twitz tx'otx', ex na'nxtok ttzaj pok'l c'ul, tu'nju na'nxtok ttzaj tk'o'n Kman Dios jbal, ex mi a'ltok jun xjal tu'n toc ten ak'nal twitz tx'otx'. 6Masque minti'tok jbal, pero ax tuj tx'otx' in jatz jlettok xmu's, ex atzun jlu in a'lin twitz tx'otx'. 7Cubtzun tbincha'n Kman Dios xinak ti'j tkukil tx'otx', ex ocx t-xupin Dios t-xew tuj ttxa'n tu'n tk'onte tchwinklal. Ictzun tten oc xjal te itz'.
8Cubtzun tk'o'n Kman Dios txkan awal tuj Edén tuj tjawitz k'ij, ex atzun cub tk'o'n aju xinak otok cub tbincha'n. 9Jawtzun tch'isan Kman Dios tuj tx'otx' lu tcyakil wik tze' tbanilxix que'yin ex ba'n tlo'njtz twitz, ax icx jaw tch'isan tuj tmij awal aju tze' in tk'o'n chwinklal, tuc'ix aju tze' tu'n tel nic'baj ti'j ba'n ex ti'j mya ba'n.
10Tuj Edén nne'tztok jun nima, atzun in baj a'lintok t-xol awal. Tetzlenxi tuj Edén, nne'ltok tpa'n tib, cyaje nima nne'ltok. 11Aju tnejel nima Pisón tbi; atzunju in baj tbetintok ti'jele tcyakil tx'otx' Havila tbi, jatum at k'an pwak. 12Tbanilxix aju k'an pwak at tuj tx'otx' lu, ax icx atzun in cnet tk'olil tze' tbanilxix tc'oc'jal, tuc'ix abj tbanilxix, ónice tbi. 13Aju tcabin nima Gihón tbi; atzunju in baj tbetintok ti'jele tcyakil tx'otx' Cus tbi. 14Aju toxin nima Tigris tbi; atzunju in baj tbetintok tuj tjawitz k'ij ttzi'yile tx'otx' Asiria. Aju tcyajin nima Éufrates tbi.
15Tejtzun tocx tk'o'n Kman Dios aju xinak t-xol awal tuj Edén tu'n toc ten ak'nal ti'j ex tu'n toc tc'ujla'n, 16xi tma'n te cyja': Ba'n t-xi tlo'na twitz tcyakil tze' at tuj tkan awal; 17atzunju twitz tze' tu'n tel nic'baj ti'j ba'n ex ti'j mya ba'n, mi'n txi tlo'na; katzun ma txi tlo'na, ax toc cymela, chi Dios te.
18Tmatzun Kman Dios cyja': Mya ba'n tu'n tten xinak tjunal. Cbel nbincha'ne jun tuc'il te onil te, chi Dios. 19Tcyakil txcup ex tcyakil chyu'j, tuc'ix tcyakil jil in lipan twitz cya'j, akeju otok che cub tbincha'n Kman Dios ti'j tx'otx', e tzaj ti'n twitz xinak, Adán*fn* tbi, tu'ntzun toc tk'o'n Adán cybi; ex teyle te junjun oc tbi ic tza'nx oc tk'o'n. 20Oc tk'o'n Adán cybi alumaj, cybi chyu'j ex txkantl jil in che lipan twitz cya'j ex cybi txkantl txcup ate' tjak' c'ul, pero cyxol cycyakil txcup lu, minti' cnet jun tuc'il te onil te. 21Tzajtzun ti'n Kman Dios nim watl tuj twitz Adán, ex tej in tantok, jatz ti'n Dios jun t-xu'c ex cyaj tmojba'n jatum otok jatz ti'n. 22Ti'jtzun xu'cbaj lu, cub tbincha'n Kman Dios jun xu'j. Tzajtzun ti'n twitz Adán. 23Tej ttil Adán aju xu'j, tma cyja':
Ate jlu c'oquel tbi xu'j, tu'nju ti'jx xinak ma jatz k'i'n, chi Adán.
24Tu'ntzun jlu, cyjel tk'o'n xinak tman ex ttxu', c'oqueltzun moje' tuc'il t-xu'jil, ex cycabil che oquel te junx.
25Cycabil xjal lu, ate Adán ex t-xu'jil, minti'tok cyxbalun tocsa'n, pero minti'tok in tzaj cych'ixwi.
Actualmente seleccionado:
Génesis 2: MAMH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Mam del Norte © Sociedades Bíblicas Unidas 1993