Matayo 23
23
Yesʉ ʉkʉakania amanyisi imalago nɨ Apalisayo
Maliko 12:38-39; Lʉka 11:43,46; 20:45-46
1Sʉnga Yesʉ wɨkaaɨla iʉmbi lɨhi palʉng'wɨ nɨamanyisigwa akwe, 2‘Amanyisi amalagɨɨlyo nɨ Apalisayo akete ʉhumi kʉmʉtambʉila imalagɨɨlyo ang'wa Mʉsa. 3Kʉlʉlo ambi aya nɨakʉmʉmanyisa nʉkitʉma kɨhi nimʉilwa. Shanga ɨtenda aya nɨakʉmʉɨla. 4Itʉnga nʉkʉatɨka antʉ mɨligo nɨmɨlito nʉkʉatɨka mʉmaega, ingɨ nɨanso shanga ɨgema kʉkenka kʉmikonoao. 5“Nɨanso itʉma makani ɨhi ahʉme kʉkʉligwa nɨantʉ. Kitwe nʉ mʉmɨkono itugala matendele naandikile malagɨɨlyo nʉkipela maleza aʉsaningala nɨmalɨpu kʉkɨla antʉ ɨhi. 6Ɨlowa kikiɨ matʉntʉ akʉntongeela mʉmaloeelya mʉmatʉntʉ akʉntongeela mʉnyumba niya kʉtankanɨla ayahudi. 7Ɨlowa kʉlamʉkigwa mʉʉgalagalo nʉkʉkʉligwa nʉkitangwa ‘Mʉmanyisi.’ 8Ʉnyenye mʉleke kitangwa ‘Mʉmanyisi,’ kʉnsoko Mʉmanyisi wanyʉ ʉng'wɨ dʉ, ʉnyenye mɨhi mɨahemba ane. 9Leka kʉmitanga mʉntʉ wɨhi mʉnʉ mihɨɨ ‘Tata’ kʉnsoko Tata wanyu ingɨ ʉng'wɨ du, yʉyʉ nʉa kigʉlʉ du. 10Mʉleke kitangwa ‘Atongeeli,’ kʉnsoko mʉtongeeli wanyʉ ʉng'wɨ dʉ, nʉyo Kilisito. 11Ʉyʉ nʉ mʉkʉlʉ mʉng'waanyu nʉwatule mʉtʉng'wa wanyu. 12Wɨhi nʉkikʉlya ʉkʉninompigwa, nʉyʉ nʉkininompya ʉkʉkʉligwa.
Yesʉ ʉkʉakania ateele
Maliko 12:40; Lʉka 11:39-42,44,52; 20:47
13“Ʉkɨa wanyu amanyisi amalagɨɨlyo ang'wa Musa nɨ Apalisayo, mɨateele! Milʉgaɨla ʉmʉlango nʉwa kingɨɨlɨla mʉʉtemi wang'wi Itunda. Nawa nɨaloilwe kingɨla shanga mʉkʉaleka ingɨle. 14“Ʉkɨa wanyu amanyisi amalagɨɨlyo ang'wa Musa nɨ Apalisayo mɨateele! Mɨhola maintʉ aasʉngʉ nɨashɨɨwe nɨagoha, hangi mɨlompa malompi malipu. Kʉnsoko nanso ʉpisɨɨligwa wanyu ʉkʉtula ʉkʉlʉ.
15“Ʉkɨa wanyu amanyisi amalagiilyo ang'wa Mʉsa nɨ Apalisayo, nɨmɨateele! Miʉmbaʉmba mʉlʉzi nʉlʉkʉlʉ nʉkiʉmbaʉmba mihɨɨ mʉzeduma mʉntʉ nʉkʉtyata aya nɨmʉhʉɨɨe ʉnyenye. Anga mʉmʉlije, mɨkamʉtenda wɨngɨle kʉʉlʉngʉ nʉ moto shawɨlima nkʉa akabɨɨlɨ kʉkila ʉnyenye.
16“Ʉkɨa wanyʉ atongeeli mɨapokʉ! Ʉnye nimilʉnga ʉmʉntʉ anga walapile kʉ Nyʉmba ang'wi Itunda, ilapo lakwe shanga kɨntʉ; itɨgwa anga walape kʉ zahabu nɨpumigwe kʉ nyʉmba ang'wi Itunda, ilapo nɨlanso lɨkʉmʉpɨsɨɨlya. 17Ʉnyenye apʉngʉ hangɨ mɨapokʉ! Nɨkɨʉlɨ nikikʉlʉ nangalʉ. Zahabune ang'wɨ nyʉmba ang'wi Itunda nimatendya zahabu kʉtʉla nziza? 18Hangɨ mɨlʉnga mʉntʉ anga wilapɨle kitekeelo shanga kɨntʉ; ilagwa anga walapɨle kipegwa nɨkɨɨkilwe mitekeelo, ilapo nɨlanso lɨkʉmʉpɨsɨɨlya. 19Ʉnyenye apokʉ! Kɨntʉ kɨɨ nɨkɨkʉlʉ ikɨlo: Kipegwa nɨkansone, ang'wɨ itekeelo nɨkɨkɨtenda ɨkɨpegwa nɨkanso kitʉle kɨza? 20Ʉyʉ nʉilapɨla itekeelo nʉkilapila kitekeelo nʉ kʉmaɨntʉ ɨhi naletilwe mitekeelo nɨlanso. 21Nʉyʉ nʉkilapile kʉ nyʉmba ang'wi Itunda ʉlapile kʉnyʉmba yɨyo nʉ kʉng'wi Itunda nʉwishiɨ mʉnyʉmba nanso. 22Nʉyʉ nʉkʉlapa kigʉlʉ ʉlapile kituntu nɨla ʉhumi nɨlang'wi Itunda, nʉyʉ nʉwikaɨe itʉntʉ nɨlanso.
23Ʉkɨa wanyu amanyisi amalagiilyo ang'wa Musa nɨ Apalisayo, mɨateele! Kʉnsoko mɨpumye ɨkɨkʉmi kamaintʉ ansaɨlo niino anga ɨnseke nɨya nyenyi nɨ bizali ni jila, Ingɨ mɨhita kʉtenda makani nalagɨɨgwe mumalagiilyo, kʉtenda aya namʉloeeye Itunda, kʉaisɨɨlya ɨantʉ nʉkʉtula mɨahʉɨɨli, kʉtula nʉʉhʉɨɨli kʉng'wi Itunda. Nɨitɨga aya yaya lʉkʉlʉ mʉtakɨwe mʉkʉkamɨnkɨɨlya mʉleke kɨwa aya nɨmangɨɨza. 24Atongeeli nɨapokʉ! minimʉla ngi mʉgaɨ yanyu, ingɨ mɨmɨla ingamɨa!
25“Ʉkɨa wanyu amanyisi amalagiilyo ang'wa Mʉsa nɨ Apalisayo, mɨateele! Mʉgʉʉlya ikombe nɨ mabakuli kʉnzi, ingɨ mʉkatɨ mʉilekile yizʉe maɨntʉ nimʉligilye kʉ wii nʉʉbɨ nʉwa nkolo. 26Ʉewe Palisayo nɨmʉpoku! Ʉgʉʉlye hanza ɨkikombe mʉkati nʉkʉnzi ga kikʉtʉla kelʉ.
27Ʉkɨa wanyu amanyisi amalagiilyo ang'wa Mʉsa nɨ Apalisayo, mɨateele! Mihangaanga ibɨɨla niiʉgɨigwe nswakaala kʉgoza kʉzi iza, ingɨ mʉkati yizʉe makʉpa amiimba nɨ makani aʉolu. 28Nʉnyenye ga kʉmiho aantʉ migela mɨakende, mʉnkolo ingɨ mizʉe ʉteele nʉbi.
Ʉpɨsɨɨlya nʉʉpembilye
Lʉka 11:47-51
29Ʉkɨa wanyu amanyisi amalagiilyo ang'wa Mʉsa nɨ Apalisayo, mɨateele! Mʉkʉzenga ibiila niya amanga ang'wi Itunda nʉkʉnoneelya ibɨɨla niya antʉ nɨakende yigeeleke iza. 30Mɨlʉnga, ‘Angaɨze ʉsese aɨze kʉkoli matʉngo aanyakalɨ shanga aɨkʉziiaɨɨlya kʉabʉlaga amanga ang'wi Itunda!’ 31Kʉɨtɨ mʉkʉkomanɨɨlya ʉnyenye kɨna mɨana aatʉ naɨ aabʉlagile amanga. 32Ali kondeelyi ʉmʉlimo nʉwa anyakalɨ anyʉ aɨandilye! 33Ʉnyenye mɨwileli nʉwa nzoka, Mʉhumile ʉlɨ kʉhʉga ʉpɨsɨɨlya nʉwa moto nʉwa mahikʉ ɨhi nɨshanga wɨlima? 34Yɨyo nsoko ʉnene nɨmʉletela ʉnyenye amanga, antʉ nɨakete mahala nɨamanyisi; ʉnyenye mʉkʉabʉlagɨla mʉmʉsalaba, mʉkʉakʉa nkotya munyumba niya kutankanɨla ayahudi, nɨang'wɨ mʉkʉadagɨɨlya kɨsalɨ nɨ kɨsalɨ. 35Kʉɨtɨ ʉnyenye mʉkʉtula nigazo nɨla anyampala naɨabʉlagile antʉ nɨaza mʉnʉ mihɨɨ. Ee, kʉpʉma naɨʉbʉlagilwe ʉ Abeli nɨshanga aɨʉgazilye, kʉpikɨɨla naɨ amʉbʉlagɨe ʉ Zakalia, ng'wana wang'wa Balakia, panyʉmba ang'wi Itunda pakatɨ itekeelo nɨ payelʉ. 36Kʉmʉtambʉɨla ɨtai, ʉwileli ʉwʉ ʉkʉpɨsɨɨligwa kʉnsoko amakani yaya.
Yesʉ ʉkʉkɨlɨɨla kɨsalɨ kakʉ Yelusalemu
Lʉka 13:34,35
37“Yelusalemu! Ʉewe Yelusalemu! Nʉwɨabʉlaga amanga ang'wi Itunda nʉ kʉakʉa magwe awa nɨalagɨigwe kʉng'wako. Nkʉa inga nɨngemile kilingɨɨla ɨana ako kʉng'wane anga nkʉkʉ nisʉnja ɨana akwe mʉmanana, ingɨ ʉhitile. 38Alɨgwa, nyʉmba ako ɨkʉsaga ikʉmʉʉlʉ. 39Kʉʉɨla, kandɨɨlya ino shanga ʉkʉmona hangɨ kʉpikɨɨla itʉngo nʉɨkalʉnga, ‘Wakembetwe ʉyo nʉpembilye kʉlina lang'wi Isekʉlʉ.’”
Actualmente seleccionado:
Matayo 23: IBV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The New Testament in Isanzu @The Word for The World International and Isanzu Language translation. All rights reserved