Málákuse 7
7
Na Yésu na Bafalisiɛ́ŋ gúsuŋenenyi
(Mat 15.1-20)
1Bafalisiɛ́ŋ na gɛdam gá befúnyifúny bá bisele móolín Yelúsalɛm, abábɛ́gɔ́sɛ́d agá masiá má Yésu. 2Abaán bafɔ́nɔfɔ́n bá Yésu bómodió bányánan kand gubɛ́sɔ́gɔna, anaány gúnyá ɛmbɔ́g kadɛ gusɔgɛda. 3Búnyɛ ká Bafalisiɛ́ŋ anyɛ Beyúdɛn, dɛgúnyánan kadɛ gual ɔsɔgɔ bese ná bese agá nubesié; 4gigúl bómónusiónd agá nionyi, bádɛgúnyánan kand gubɛ́sɔ́gɔna agá nubesié; bágúládaan giod gá bisúŋígin bá besié bímodió anyɛ: Gɛnɔ́g gá gúsɔgɛd mudúga má nɔmɔ, gusuga bɛsuá bese na, museny má bɛkɔ́ŋ.#7.4 Bɔ́guɔ́yɔ kɔɔ́m gómodió ká: Bádigúnyánan ta buanda búmóm bósógus ondon agá nionyi kadɛ gusɔgɛda. Búnyɛ buɔ́ŋɔ́n agá imbɔbɔnɔ símodio ká: na [ambɛ́dɛ]. 5Bafalisiɛ́ŋ na befúnyifúny bisele guad guófún Yésu gɔg ká: «Góbúsió bágiág bafɔ́nɔfɔ́n sɔ́w diáládáná nubesié bás e? Bágúnyánan kand gubɛ́sɔ́gɔna.» 6Uwondinyi bɔ́ ká: «Esayí mabá na nɛɛ́m gɛsɛgɛl umɔ́ɔyɔ́ gán gúmányɛ gá nsuá ká nuguánda bɛgɔnd bá ɛŋɔs. Gɔɔ́gɔ anyɛ́ búnyá buɔ́ŋɔ́n agá mbɔbɔnɔ ká:
Band ebe gúŋgúmenyi beniídé, ɛdɛm sɔ́b gɔg nyɛ ayáyá nam.
7Nugúm unú bámfánaná dɛbá ta buanda,
gágual ká bisele bɔ́b bá bɛ́muát béfúnyifunyé band.
8Uganyɛ gɔ́b sɔ́n ká, nuguáŋɛ́gán bisele bá Gɔdányá, nubɛ́gɔ́dɛ́naan gual gá band.» 9Uwɔb nobusió uganyɛ ká: «Nugúbaga bisele bá Gɔdányá fiaŋ fiaŋ, ká núlɔ́bɛn agá nuanuá. 10Moyíso mɔyɛ́d ká: “Gúményí tiɔ́ na nigódió” uwand guɔyɛd sɔ́n ká: “Mɔnd gidigid usɛ́ganá sié ɔ́gɔ ká inyódió gúsɛgɛmanan na nigú.” 11Banuá gɔg nugúfúnyifunyi ká mɔnd mɔ́yɛd gá sié ta ɔ́gɔ gá inyódió ká: “Gidúgune gɛ́sɛ́gɛmananá ká ngúfá nyɛ Kɔlɔban, anaány gúnya ká búnyɛ́ bá Gɔdányá.” 12Nuguámɛnan mɔnd uwaány ká udiánd gúdúgún sié ɔ́gɔ ká inyódió. 13Anaány nudiɔ́gɔ́lɔ́nɔ́ gugál gá Gɔdányá gianta gá buanda, nuládaan bɛsɔ bá bɔtiɔ́ ɛbɛ́ nudúmbenyinyé banuá na banuá. Nuond nuala manda mómodió giod anyɛ amaány.»
Manda málaná ká Gɔdányá diádáb mɔnd
14Gɔɔ́gɔ Yésu máand gúbɛ́lɛ́gɛn giŋi gá band, uganyɛ gá gɛ́ ká: «Ɔ́numbɛ́dɔ́lɛ́gɛ́n banuá bem, nuónd nɔ́lɛ́ns ká: 15Buanda dɛbá kɔ́ búnyá búmébíŋín agá nuɔ́l ná mɔnd, buál ká úbá ɔbɛ́ agá eŋís yá Gɔdányá, gɔɔ́gɔ buanda buámanɛná nagadá wa ɔdɛm wá mɔnd, bɔ́bɔ́ buálaná ká úbá ɔbɛ́ agá eŋís yá Gɔdányá.» [ 16] #7.16 Búnyɛ buɔ́ŋɔ́n agá imbɔbɔnɔ símodió ká. Mɔnd unyá na idú sɔ́guɔ́b, wɔɔ́b. 17Yésu maál úmáadɔ́gan na giŋi gá band, uwebíŋín agá gians, bafɔ́nɔfɔ́n bág obófún wɔ́ buanda ubú nsab iyaány ɔ́yɔnɔ́. 18Uganyɛ gɔ́b ká: «Nudɛbá na nsiŋi banuá sɔ́n e? Nudɛgɔ́lɛnsan ká buanda ná buanda búleniné agá ɔɔnd búbíŋen agá nuɔ́l ná mɔnd diguála ká úbá ɔbɛ agá eŋís yá Gɔdányá e? 19Gágual ká búdigúbíŋen agág gá ɔdɛm, gɔɔ́gɔ agá dúna búbíŋené, buésúgúdényi agá niágɛ́dɛn.» Umɔyɔ́ anaány ká údíye ká bányɛ bágúnyánan manyán gidigid. 20Umɔ́yɛ́d sɔ́n ká: «Buanda buámaná nagadá wa mɔnd, bɔ́bɔ́ buálaná ká úbá ɔbɛ́ agá eŋís yá Gɔdányá. 21Gá guán, nagadá wa ɔdɛm wá mɔnd biád bá ɛmbɛ́dágɛ́dɛ́n ámanɛná. Bídídígen wɔ́ ká úbídɔ́bɔ, wébeen, wɔ́nɔnɛn, 22wánda musɔm, úbíléne muonyi giod, na ifíl, na munéŋén, na bugendi, na yaág, na mugálán, gubíbúlígenyi, na buál. 23Manda amaány gidigid mámanɛná nagadá wa mɔnd, mɔ́mɔ́ málaná ká úbá ɔbɛ́ agá eŋís yá Gɔdányá.»
Agánd udiábá gubién gá Beyúdɛn mádáb Yésu
(Mat 15.21-28)
24Yésu máal wadɔgan ány, uwɔb agá gus ɔgɔ́ tísɔn wá Tíl máabá. Uwebíŋín agá gians, udɛmamba ká bálɛ́ns ká unyɛ kɔ́, ta nɔ́, abálɛns. 25Agánd mabiánán ɔmbúlɔ waga, ɔmbúlɔ uwaány mabiánán giád gá gíliíndie. Anyɛ́ agánd uwaány mɔ́ɔb béfínenyi ɔfɛ́n wá Yésu, uwɔb fiaŋ fiaŋ uwanagɔɔ́n wɔ́ agá bɛgɔnd. 26Udɛmabá mbény yá Beyúdɛn; bémebién wɔ́ agá giéns gá gus bábɛ́laná Fenisí gínyá Silí. Umobísógólónyí Yésu ká ukɔ́ŋɛd giád gá gíliíndié gɛ́máabá agá nuɔ́l ná ɔmbúlɔ waga. 27Gɔɔ́gɔ Yésu mɔ́yɛ́dɛ́n wɔ́ ká: «Ál gútɛ́n baábayɔ boódúg, búdɛ́bá bese ká mɔnd gɔ́l gɛnyɔka gɔ́b wétínyi dubuábuá.» 28Agánd uwondinyi wɔ́ ká: «Ɛɛɛ́ɛ Búnyɛ́ nɔ́ Ɔgúnɔ́, ta anaány dubuábuá gúsugúsié wa tébéle, dúgúnyánan imfufu ɛsɛ́ baábayɔ gusenyé.» 29Yésu ganyɛ gág ká: «Anyɛ́ omónuóndínyí anaány, guúg, giád gá gíliíndié dɛgábá sɔ́n agá nuɔ́l ná ɔmbúlɔ wɔ́w.» 30Uwond agagá, uwɔnɔfuɔ́gɛ́n ɔmbúlɔ waga ɛmbɛ́diá agá nɛbɛd, giád gíliíndié mámaan guám agág gá nuɔ́l.
Yésu meéŋúgí mɔnd umáabá eduédue ɔwɔ́ nɔ́ gɛndɛgálɛ́diá
31Yésu guélíki agá gus ɔgɔ́ tísɔn wá Tíl máabá, uwadɔ́mbɛ́n agá tísɔn wá Sidɔ́ŋ, uwosiondín giáy gá manáŋ abɔ́sa unyá Galilé, wuúl úyúgaán batísɔn bát bábɛ́laná ká Dekapól. 32Obólónin wɔ́ eduédue, ɔwɔ́ nɔ́ gɛndɛgálɛ́diá, abábanyɛg gubísógólonyi Yésu ká údál wɔ́ ɔmbɔ́g agá ɔduɔ́. 33Uwɔgɔ́l wɔ́, uwɔb nág ayáyá wa giŋi gá band, uwɔsɔgɔlɛd wɔ́ idú na munɔ́nɔ́ mág#7.33 Munɔ́nɔ́ mág: Búnyɛ munɔ́nɔ́ má Yésu, sá má mɔnd uwány. , uwetuún bité, Ɛɛ́ŋ gubísíd gɛlámb gá mɔnd uwaány. 34Umáal ná gual anaány, uwedugi eŋís ugumuana, uweélúmid magɔ́gɔ́n, uganyɛ gá mɔnd uwaány ká: «Efáta», anaány gúnyá: «Bífuún.» 35Kɔ́ na kɔ́, idú sá mɔnd uwaány isiébífuun, gɛlámb igiéŋúg, uwedúm gugála bese. 36Yésu gusásɛ́d band ká bɔ́diɔyɛ́dɛ́n ta mɔnd. Ta nɔ́, gigúl gidigid umáabá wɔyɛdɛn band nɔ́, bébéyenyi gubeyenyi na guɔyɔ. 37Bémeméŋeméŋ giod, bɔ́yɔ ká: «Buanda gidigid walaná nyɛ bese, uguála ká beduédue ɔ́bɔɔn, bɛndɛgálɛ́diá gálagal.»
Actualmente seleccionado:
Málákuse 7: MMU2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión