Málákuse 1
1
Sáŋa umáabá udénenyinyi gúbiése band
(Mat 3.1-6,11-12; Lúk 3.6,15-18)
1Nɛnama enie Ndág ya Nsɔ́m ya Yésu Kilíse Mɔɔn wá Gɔdányá banyɛganá, 2gɔɔ́gɔ anyɛ́ búnyá buɔ́ŋɔ́n agá mbɔbɔnɔ yá ibús yá Gɔdányá anyɛ Isayí ká:
Yaŋuá Gɔdányá ngesuŋinyi mɔnd na nsɔ́m,
ugenúgúfunin nŋili
3Ɔwɔ́ waád wémbínenyé agá giɔ́ndɔ́ ká:
Ánɔdábɔ́ná nŋili ya Ɔgúnɔ́,
núdényígenenyi iŋili ság!
4Kányɛ Sáŋa uméeduénín máabá agá giɔ́ndɔ́. Uwedúm guɔyɔɔn band ká bénúgi gusɔ́d gɔ́b, bébídu, Gɔdányá bád gɔnɛnɛn bɔ́ bɛfal bɔ́b. 5Band giod metúlúgúgén agagá, abábɛ́bála bɛfal bɔ́b, Sáŋa uweduenen bɔ́ agá asa wá Yuludɛ́ŋ. Bómóolónín Yelúsalɛm na agá bɔkɔɔ́m bómodió bá giéns gá gus bábɛ́laná ká Yudé.
6Gɛla ɛgɛ́ Sáŋa máabiánán agá nuɔ́l mabá nɔgánɔgá na dusɔ́ dúbɛ́fuágananá dusɔ́ dá nnyád. Gɛɛ́sa ɛgɛ́ umáabiánán agá nɛdál mabá gɛdábɔ́nán na gɛɛmf gá nnyam. Umobióyónyí na Kɔ́nta na buwɔɔ́ŋ umɔɔ́fuɔ́gɛ́n kɔ́#1.6 Manda amány gidigid nyɛ manda ɔmɔ́ bendídi bá Ísalayɛ́l mábá bóbióyonyi na mɔ́..
(Mat 3.11; Lúk 3.16; Sáŋ 1.26-27)
7Umɔyɔɔ́n band ká: «Mɔnd gúsién wuúlén agám gá gélem, unyɛ na bugaga wundúmbaan, ndɛbá na nɔndɔ ná gúgudimid ká nsúŋun nuoli nág ná mfaŋáŋá#1.7 Uguámba guɔyɛd ká udɛba na edényi wá giɔ́l agá eŋísi yá Yésu.. 8Yaŋuá ngúnúduenen agá madɛ́ga, ɔwɔ́, ugenúduenen na Mefúny má Gɔdányá.»
Nduén yá Yésu
(Mat 3.13-17; Lúk 3.21-22)
9Gɔɔ́gɔ mɔɔ́s amaány, Yésu uwonólín agá tísɔn wa Násalɛd, unyá agá giéns gá gus bábɛ́laná ká Galilé, uwasiám agá asa wá Yuludɛ́ŋ, Sáŋa gudu wɔ́. 10Gigúl ɛgɛ́ Yésu máam agá madɛ́ga, uwaán muána mébífuún, Mefúny má Gɔdányá selenin wɔ́ anyɛ nulɛŋ 11Ekelu uwuúlín ugumuana wɔ́yɔ ká: «Anyɛ mɔɔn wám wa ɔdɛm, nguɔ́bɔɔn bese nɔ́w.»
Yɔ́bɛ́dɛn yá Yésu agá gɛsɛɛ́sɛ
(Mat 4.1-11; Lúk 4.1-13)
12Kɔ́ na kɔ́, Mefúnyi má Gɔdányá amádɔ́m Yésu agá gɛsɛɛ́sɛ. 13Uwedúmbi kɔ́ medug etín ándɛ, Sátan#1.13 Sátan nyɛ ɔgúnɔ wa biád bá mefúnyi. Umabá nsua ɔsɔ́mɔsɔm wa Gɔdányá, uwal Gɔdányá ɔduɔ́ gulal, Gɔdányá uwakɔ́ŋɛd, uwuúl agá gus. ɔ́bɛ́dɔɔn wɔ́. Manyam má ɛyɔ́m mabá sɔ́n kɔ́, ɛngɛlɛs medúgúné wɔ́.
Bafɔ́nɔfɔ́n bá bosió
(Mat 4.12-22; Lúk 4.14-15; 5.1-5; 5.1-3)
14Bámáal bámáadɛ́gɛ́n Sáŋa béméefúgín wɔ́ agá gians gá mbíne, Yésu gɔb agá giéns gá gus gá Galilé gá guúl údúmbényí Ndág ya Nsɔ́m yílené agá Gɔdányá. Umabá wɔyɔ ká: 15«Gɛsɛgɛl ɛgɛ́ Gɔdányá máadán méesiég. Bufuŋ bá Gɔdányá ganyɛ agán gá masiá. Énunúgí gusɔ́d gán nuónd nuádáb Ndág ya Nsɔ́m.»
16Anyɛ́ umáaba wuúl wánda agá gɛsál gá manáŋ abúsa wa Galilé#1.16 Ndénye ya manáŋábúsa uwány mabiánán bakílomɛ́ta 21 ɛmɛndia 11., uwaán Símune na endimen wága Andelé bétenyi buoli agá madɛ́ga gágual ká bámabá bosógi muɔbɔ. 17Uganyɛ gɔg ká: «Ánɔŋlad, ngenuíyi bogógi band.» 18Ebédúmbi gɔbɛ́yɛ́bɛd mooli mɔ́b abálád wɔ́. 19Bábɛ́sɛdɛnɛ, uwáan baan bá Sebedé: na Sáka na endimen waga Sáŋa agá gilu bábábɛna mooli mɔ́b. 20Uwedúmbi gɔbɛ́lɛ́gɛn bɔ́; obósió bámátɛɛ́n sié wɔ́b Sebedé ány na bél buol bág, abádɔ́mb ɔlɔŋɔ na Yésu.
Yésu meéŋúgí mɔnd umáabiánán giád gá gíliíndié
(Lúk 4.31-37)
21Yésu na bafɔ́nɔfɔ́n bág abáb agá tísɔn wa Kapɛlɛnahúm. Buɔ́s bá gudúkid bá Beyúdɛn#1.21 Bómodió guɔ́yɔ ka: sábad., uwenebíŋín ɔgɔ́b gá gians gá mbísógól, uwedúm gúfúnyifunyi. 22Band bɔ́mɔɔ́bɛ́dɔ́lɛ́gɔɔ́n gufúnyifunyi gág meméŋeméŋ giod, gágual ká gudɛmabá anyɛ gá befúnyifúny bá bisele, gúmabá anyɛ gá ofuŋ udióbiófónó gá mɔnd. 23Agá gians gɔ́b gá mbísógól igiány, mɔnd wa giád gá gíliíndié mabá kɔ́, uwánsɛ́d magɔ́gɔ́n, uganyɛ ká: 24«Yésu wa Násalɛd, agúdiámba na buóny e? Éguúl ká esidífúfi e? Ngɔ́lɛnsan nɛnama ná bɔbɔndɔ ányá bese na bese: Anyɛ ewe wúleniné aga Gɔdányá!» 25Yésu guánsɛ́dɛn gɛ́, uganyɛ gá gɛ́ ká: «Lúŋu pɔ́, oónd aám agá nuɔ́l ná mɔnd uwaány!» 26Gɛ́gɛ́ gɔfɔ́gɛ́dɛn mɔnd uwaány na bugaga, igiám giíl giánsa magɔ́gɔ́n. 27Band gidigid bámáabá kɔ́ máasɛ́gaán eŋíd, bóbiófoon bɔ́bɔ́ na bɔ́bɔ́ ká: «Ebue, giág e? Gufúnyifunyi gá mɔnd ewe nyɛ gɛŋɛ́lɛŋɔ́siɔ, ugúfúnyifunyi anyɛ ofuŋ udióbiófónó gá mɔnd! Ugúmányɛ́ganɛn biád bá bíliíndié biónd bíɔbɔnɛn wɔ́!» 28Kɔ́ na kɔ́, manda ɔmɔ́ Yésu máalá amáb gá gúbiɔ́yɔ agá giéns gá gus gá Galilé gidigid.
Yésu méŋúgi band
(Mat 8.14-15; Lúk 4.38-41)
29Yésu na Isáka, na Sáŋa máal na guám agá gians gá mbísógól gá Beyúdɛn, ebédúmbi gɔb agá nuyá ná Símune nɔbɔ na Andelé. 30Inyódió agany Símune mabá ɛmbɛ́diá unúma; bámáal na guáma, ebédúmbi guɔyɛdɛn Yésu ká agánd uwaány gúnúma. 31Yésu uwabɛ́nyɛkɛnɛn wɔ́, uwɔgɔ́l ɔmbɔ́g wág, uwedugi wɔ́. Kɔ́ na kɔ́, gunúma uguáman, uwedúm gudúgúné wɔ́. 32Na niɔ́b niɔ́bɔ, ɔɔ́ny máal naguabɛ́dɛ́mɛ́n, oboólónin Yésu band gidigid bámáabá bánúma, na bámáabiánán biád bá bíliíndié bíméesésényí bɔ́. 33Band bá tísɔn uwaány gidigid mabɛ́gɔ́sá lúúu agá busió bá niíd ná gians. 34Uwéŋúgenyi anama yá gunúma giod ɔyɔ́ band máabiánán, uwond uwakɔ́ŋa biád bá bíliíndié giod. Udɛmáadábɛn bɛ́ ká bɛ́gálɛ́d, gágual ká bɛ́malɛnsán wɔ́.
Guélíki gá Yésu Kapɛ́lɛnahúm
(Mat 4.23; Lúk 4.42-44)
35Tútútú, na dulimbíne, Yésu guanyɔg, guadɔg, guám gá gɔb agá giɔ́sɔ́gɔliɔ́ gá guobísógólónyí kɔ́. 36Símune na bɔsɔ́gɔ́ bág abáb gá guamba wɔ́. 37Bámáal na guán wɔ́, bágányɛ gág ká: «Band gidigid gúguamba.» 38Uganyɛ gɔ́b ká: «Nsɛ́ dɛɛ́b kɔɔ́m góndodi, agá bɛdɔŋ bíndodi bínyá egúy na aya. Ngúbianan sɔ́n ká ndúmbenyi Ndág ya Nsɔ́m#1.38 Bómodió guɔyɔ ká mbaan y ya nsɔ́m.kɔ́, gágual ká, búbú imóol gá bú aya.» 39Anaány umóol wándánd agá giéns gá gus gá Galilé gidigid, udúmbenyi Ndág ya Nsɔ́m agá bians bá imbísógól bá Beyúdɛn biim, úkɔ́ŋa biád bá bíliíndié.
Yésu meéŋúgí uŋúnúŋun
(Mat 8.1-4; Lúk 5.12-16)
40Oŋúnuŋún#1.40 Aga band bá Ísalayɛ́l, beŋúnuŋún dɛmabá bágɛ́ga kɔɔ́m gómómu na band bámáabá bádɛ́nɔ́má. omodió móol aga Yésu uweguns enú#1.40 Bomodió guɔyɔ ká: eŋéndu.egegus agág góbusió uganyɛ gág ká: «Sigól! Émébíléne, anyɛ béguŋéŋúgi ond ansɔgɔn.» 41Mahan amádɛgɛn Yésu, uwaán wɔ́ gɔsɔ́g, uwasɛdɛn ɔmbɔ́g wág, uwebísíd wɔ́ uganyɛ ká: «Ɛɛɛ́ɛ, ngúbílene, iméguéŋúgí imónd, imágɔsɔgɔ́n!» 42Kɔ́ na kɔ́, nŋúnu iyaságɛ́n, mɔnd uwabia gɛsɔgɔna. 43-44Yésu dɛmɔnɔ gɛsɛgɛl umáagálá gá mɔnd uwaány, uganyɛ ká: «Bɛ́dɔ́lɛ́gɛ́n bese! Ɔdiɔyɛ́dɛ́n mɔnd, ɛmbɛ́ gebídíyé aga aság sag wa Gɔdányá#1.43-44 Efuísi bɛbiág uwány mabá Yelósalɛm., ónd éŋin bɛbiág Moyíso mɔ́ɔyɛ́d#1.43-44 Sáa Moyíso umɔɔ́biɔ́yɛ́dɛ́n manda amanyɛ, Gɔdányá umɔɔ́yɛ́d. ká béŋeen, anaány band galɛns ká éguéŋúg, oyond ayabia gɛsɔgɔna. Kɔ́ na kɔ́ Yésu ganyɛ gág gɔg ká: Dɔ́mbɔ!» 45Kányɛ, mɔnd uwaány máal udúmbaan, uwedúm guúl údúmbényí niɔy kɔɔ́m gidigid, nɛnama nɛ́nyá ká, Yésu dɛmabá sɔ́n báguanda agá tísɔn dambɔ́dambɔ,#1.45 Yésu dɛmabá wa guand guanda dambɔ́dambɔ agá tísɔn gá guúl údúmbényi Ndág ya Nsɔ́m. Udɛmanba ká band dúmbenyi wɔ́ gɛsɛgɛl. uwɔb gá gúgɛ́ga agá biɔ́sɔ́gɔliɔ́. Band móolónín mɔkɔɔ́m mɔkɔɔ́m gá gúsɛbaán agagá.
Actualmente seleccionado:
Málákuse 1: MMU2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión