Matáyoso 25
25
Nsab ya babɔla bát
1«Bufuŋ bá muana nyɛ anyɛ babɔ́la bát bɔ́mɔ́ɔgɔ́l balámba bɔ́b abáb gá guelumén na muátɛ gigiŋ. 2Ɔgɔ́b gá ɔlɔŋ babɔ́la batán maba bieg, bátán bianan nsiŋi. 3Anɛ́ bɔ́mɔ́ɔgɔ́lɔɔ́n balámba bɔ́b, bieg bá babɔ́la dɛmabɛ́yɔkɛn megud. 4Babɔ́la bá nsiŋi, ɔbɔ́gɔ́l balámba obónd abábɛ́yɔkɛn megud agá indog. 5Anɛ́ muát gigiŋ méelíl gusiam, babɔ́la gidigid abáb gá gulɔ́ŋɔ abánadɔ́mbánɛ́n gá dunɔ́. 6Na ɔdɛm wá budug, ɔbɔ́b ekelu wɔ́yɔ ká: “Muat gigiŋ ewe o! Ánuámaán, nuógolí wɔ́.” 7Anaány babɔ́la abaány gidigid máanyɔ́g abágaan balámbá bɔ́b. 8Bieg bá babɔ́la ganyɛ gá bɔ́sɔ́gɔ bámáabá na nsiŋi ká: “Sígól ɔ́nudɛ́bɔ́ŋɛ́n megud, gágual ká balámba bás ganyɛ gá gufú.” 9Bɔsɔ́gɔ́ bámáabá na nsiŋi obóndinyi ká: “Ágó! Mádɛgagúsá gá basuá gidigid. Ánɔ́b guɔ́nd mán aga bedús manda.” 10Bámabá bábaan gá guɔ́nd megud, muát gigiŋ siámán; babɔ́la bámáabá bábɛ́dábɔ́nán ebébíŋín ɔlɔŋ naga agá gɛndaŋiá gá budɔ́mb, ebefuug niíd ná gians. 11Agá gélem ány, bɔsɔ́gɔ́ bámáab gá guɔ́nd megud ebésiege, bágányɛ ká: “Ɔgúnɔ́, Ɔgúnɔ́ difúunín!” 12Uwondinyi bɔ́ ká: “Agá meliŋítas nŋúnuɔ́yɔɔn ká ndɛgɔ́nɔ́lɛ́nsaan.” 13Yésu guɔ́yɛ́kɛnɛn ká, ánɔbá nŋanyuá, gágual ká nudɛgɔ́lɛnsan ta buɔ́s, ta gɛsɛgɛl gá guúl gám.
Nsab ya bél buól bádadɔ
(Lúk 19.12-27)
14«Búgabá anɛ mɔnd umáabaán gá ɔŋɛnd. Uwabɛ́laan bél buol bág, uwɔ́ gutɛ́nɛn bɔ́ bɔnɛ́m bág. 15Uwéŋeen bɔ́ muonyi na mɔɔn a gɛdám ɛgɛ́ unyá wa gual buol: Omoom buanda anyɛ mantɛd má bɔtɔ́sɛn mátáan, ondodio buanda anyɛ mantɛd má bɔtɔ́sɛn mándɛ, sɔ́gɔ ondodi buanda anyɛ ntɛd ya tɔ́sɛn, uwɔ́ gɔdɔ́mb. 16Ewe wa mantɛd má bɔ́tɔ́sɛ́n mátaán, uwebídúnúne uwabia nŋɔ́yɛkɛnɛnɔ ya buanda anyɛ mantɛd má bɔ́tɔ́sɛ́n mátaán. 17Nɛnama nímoom ewe umáabiá mantɛd má bɔtɔ́sɛn mándɛ, uwebídúnúne uwabiá nŋɔ́yɛgɛnɛna ya buanda anyɛ mantɛd má bɔtɔ́sɛn mándɛ. 18Sɔ́gɔ́ umáabiá ntɛd ya tɔ́sɛn uwenedímé gus, uwɔsɛg ntɛt ya mása waga kɔ́. 19Gɛsɛgɛl máal na gɔdɔ́mbɔ, Mása wa bél buol abaány uwosiondo, uwófún bɔ́ anyɛ́ bányá guala na muonyi mág. 20Eŋél buol umáabiá mantɛd má bɔtɔ́sɛn mátán uwɔb uwedíye nŋɔ́yɛkɛnɛnɔ ya muonyi mantɛd má bɔtɔ́sɛn mátaán uganyɛ ká: “Mása, amamfá mantɛd má bɔtɔ́sɛn mátaán, mómodió eme inyá gɔbɔ́d.” 21Mása waga gányɛ gág ká: “Aaa! Anyɛ ginɔ́g gá eŋél buol unyá na nuládád. Gá buanda bá síɔdɛd, emédíyé nuládád. Ngagubɛ́dɛ́n giod gá manda, ólo gasɛ́balágá nam.” 22Ewe umáabiá mantɛd má bɔtɔ́sɛn mándɛ uwuúl gá igág gɛsɛgɛl uganyɛ ká: “Mása, amamfá mantɛd má bɔtɔ́sɛn mándɛ; mómodió eme mándɛ inyá gufɔ́m.” 23Mása waga ganyɛ ká: “Aaaa! Anyɛ ginɔ́g gá eŋél buol unyá na nuládád. Gá buanda bá siɔdɛd, emédíyé nuládád. Ngagubɛ́dɛ́n giod gá manda, ólo gasɛ́balágá nam.” 24Sɔ́gɔ umáabiá mbámb yá muonyi imoom uwuúl uganyɛ ká: “Mása, mmalɛnsan ká anyɛ mɔnd unyá gulal; oguógo kɔɔ́m amáal adɛnyɛmɛ, agaya kɔɔ́m emeén adɛgɔ́n; 25na buwa gidigid, iyedíme gus iyɔsɛ́g muonyi mɔ́w, mɔ́w mú, gɔ́lɔ́.” 26Mása waga guondinyi ká: “Ɔbɛ́ wá eŋél buol na bɔnɔn agá ɔlɔŋ, amalɛnsán ká nŋuógo kɔɔ́m ndiányɛmáná, ngaya kɔɔ́m imáal ndɛgɔn. 27Búmóofoón gɔg ká, ág muonyi mám agá gɛsasɔ gá bɛlɛ́ma, yaŋuá na gusiondo, yɔgɔ́l mú na bɛdálág. 28Ánɔsɔ́gád ntɛd ya tɔ́sɛn yaga nuéŋin yɛ́ gá sɔ́gɔ́ ubiananá buanda anyɛ miliyóŋ. 29Bunyɛ ká, mɔnd gidigid unyá na buanda, bɔ́gɔ́yɛ́kɛnɛn wɔ́, ugabá agá gudeg, ewe gɔg udiábáná na buanda, bégéli ta ubú únyá na bɔ́. 30Agá giáy gɛ́lɛ́ŋaná eŋél buol wá bunɔn, énuémi wɔ́ agá ɔɔnd agá mbíne, agá kɔɔ́m bábáŋaná bábíbánda bikeled.”
Nigál ná gusúgúdenyi
31«Gigúl ɛgɛ́ yaŋuá Mɔɔn wá mɔnd ngenuúl agám gá nugúm ɔlɔŋ na bɛɛngɛlɛs gidigid, ngelukumin agám gá niluku ná bufuŋ nganyɛ ofuŋ. 32Bágagɔ́sa band bá egúl gidigid yá gus agág gá busió, údándɔ́na band gɔɔ́gɔ anyɛ́ ogiíg bidug dándɔ́naná bɛdɔ́mbá na imbúny; 33ugaágaan bɛdɔ́mbá agág gá ɔmbɔ́g ɔnɛ́m, imbúny ɔmbɔ́g adád. 34Ány ofuŋ gɔnuɔ́yɛd gá ebe báganúbá ɔmbɔ́g ɔnɛ́m ká: “Banuá ɔbɔ́ Babá wam nyá gunúfɔ́na, énuúl núsidáŋáb niaf na bufuŋ búnyá budábɔ́nán gán gá busió, gutɔ guedúm agá gɔlɔŋ gá gus. 35Gágual ká mmabá na nsana, unuaŋafɛn, iyɔ́bɔɔ́n nɛɛ́da, unuembúnsi, iyabá eŋenyi, unuŋgóli; 36iyabá inú gɔdɔ, unuaŋág bɛla; iyanúma, unuɔnsiyɔlɔ; iyabá agá gians gá mbíne unuasiŋan.” 37Kányɛ besi gonuóndinyi ká: “Ɔgúnɔ́, niík dɛ́máaguánaán anúma nsana, idiaguafɛn ta ɔ́gɔ ká na nɛɛ́dá idiegubúnsí e? 38Niík dɛ́máaguánaán aŋuá eŋenyi, idiogugóli ta ɔ́gɔ ká inú gudɔ idiaguág bɛla e? 39Niík dɛ́máaguánaán anúma ta ɔ́gɔ ká agá gians gá imbíné, idiɔsiguyɔlɔ e?” 40Ány ofuŋ gónuóndinyi bɔ́ ká: “Agá meliŋítas nŋúnuɔ́yɔɔn ká, gigul gidigid ɛgɛ́ númáal ta yaádayáday ímoom buandá agám gá belimene, yaŋuá uwaány numáaŋalá” 41Gá ebe bá ɔmbɔ́g adádɛ, ugɔyɛdɛn bɔ́ ká: “Ánɔŋdɔ́mbɛn pát ugúné, nunyɛ na gilɔm. Ánɔbɔ agá yoóg yá kand nɛmanɛ́ná ínyá ɛ́dábɔ́nán gobusió bá ahand na basɔ́mɔsɔm bág. 42Gágual ká mmabá na nsana banuá ta guŋafɛn; nɛɛ́da iniáŋnɔ́ma, banuá ta gumfá madɛ́ga má gubúwá; 43mmabá eŋenyi, banuá ta guŋgóli, iyabá inú gudɔ, banuá ta guŋág bɛla; iyanɔ́má iyond iyabá agá gians gá imbíné banuá ta gusiyɔlɔ.” 44Kánɛ bɔ́bɔ́ sɔ́n bógonuondinyi ká: “Ááa! Ɔgúnɔ́, niík dɛ́máaguánaán ta na nsana, ta na nɛɛ́da, ta anɛ eŋenyi, ta inú gɔdɔ, ta na gunɔ́ma ta ɔ́gɔ ká agá gians gá mbíne, basuá ta gugudugún e?” 45Ofuŋ gondinyi bɔ́ ká: “Agá meliŋítas, ngúnuɔ́yɔɔn ká, gigúl gidigid ɛgɛ́ númáal nudiál bú ta yaábayábáy ímoom, yaŋuá numéen nudiŋala.” 46Kányɛ gúnyá ká, band abaány ánɔ́b agá guɔ́bɛ́g gá kand nɛmanyɛ́ná, besi baáb agá gusɔ́d gá medúg mem.»
Actualmente seleccionado:
Matáyoso 25: MMU2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión